Hakaroma 14
14
Wa tetera ndhango muyendhoye
1Tambure muyendhoye yu gha kasha mumatawero. Ene wa mu kanana yiyedhekera yendi eyi yakutjaka no yoye. 2Ghumwe gha tawa eshi munu kukona kudya yoyiheya. Ghumwe ne mukashu mumatawero. Yidya yendi ne rwidhi pitharo vene. 3Oyu ghadya yoyihe, gha shamuna mukakudya rwidhi pitharo. Namukakudya rwidhi pitharo keho, mbadi gha kona kutetera yu ghadya yoyihe. Yoyishi ghana mu tambura Nyambi. 4Yowe dye ne we ghuna kutetera mupika muyendhoye? Thinda hekudyendi yo mbo gha mu tetera, ngambi ghuhunga gha tenda ngambi ghuyi. Ene ye mbo ghana tendi mughuhunga. Yinu yokenge yo, mbo ghana yidimuka thinda Fumu.
5Kwaghumweya dya kara diyuwa dyofotji kupendhighana kukwendi kupiterera mayuwa ghamweya. Kwaghumweya ne mayuwa ghomaheya gha kara yipendhighana kukwendi. Kehe yu gha kona kuyidimuka thinda muyighayara yendi. 6Oyu ghokuyirughanitha pamuhingo ghoghuwa, ghana kuyitenda kudifumanekero dyaFumu. Oyu ghokudya yoyihe, naye ghana kuyitendera kudifumanekero dyaFumu. Yoyishi Nyambi ghana kutumera. Noyu ghokudhira kudya yoyihe, naye kudifumanekero dyaFumu ghana kuyitendera. Naye karo Fumu ghana kutumera.
7Noyofotji temba ghopapetu ghokukona
kukuparitha thinda,
no mbadiko yu ghokukufera thinda.
8Ngeshi ku tuna kupara,
kudifumanekero dyaFumu tuna kupara
no ngeshi ha tu fu,
kudifumanekero dyaFumu tuna kufera.
Ngambi ngo tu pare ngambi ngo tu fe,
atwe ne twa kara kwaFumu.
9Payinu yino, po gha fererire Kristusi no gha karire karo muyumi. Eshi gha kare Fumu wawafu nawayumi. 10Ene we, nye ghuna kutetera muyendhoye? Nowe, nye ghuna kushamwena muyendhoye? Twahe mbo tuna hokoka kughutho ghodipuna dyaNyambi. 11Yoyi yapwa kutjanga eshi:
“Shemwa ngeshi ha ni para,
dyo ghana kughamba Fumu,
kughutho wange mbo gha tongamena manwi ghomahe,
no marudimi ghomahe mbo ghana nongonona eshi,
Yame Nyambi.”
12Yodigho, yomuhe ghopapetu dyo mbo gha tapa yitenda yendi thinda kwaNyambi.
Wa haruritha muyendhoye
13Keho ne twa kutetera twathinda ndhango. Wa tenda kwamuyendhoye thinu thokumutokotitha, no wa mu paka mudihudhi. 14Yoyishi me ne na dimuka Fumu Jesusi. Na yidimuka, yo na kuyinongonona eshi, mbadiko thokupira ghukushuki thothinda. Ene ngeshi ghumweya ha ghayara eshi, mbadi tha kushuka — kukwendi ne mbadi tha kushuka. 15Ngeshi ho tokotitha muyendho ye koyi ghuna kudya. Mbadi ghuna kupara shime muruhakitho. Wa yongaritha muyendhoye yu gha fererire Kristusi pathidya thoye. 16Mwa tenda yinu yoyiwa yi mudi nayo, yi wane dina dyodimango. 17Yoyishi ghufumu waNyambi ne, kadi thinu thokudya no kunwa temba. Agho ne wa ghuhunga, thiraro no yishamberera eyi gha tupa Mupepo ghoKupongoka. 18Oyu ghokukarera Kristusi pamuhingo ghuno, gha kara muwa kwaNyambi no dikuto kwawanu.
19Mu ninge tu toghorope, kuyinu yoyiheya yi ya reta thiraro no kuyenda kughutho. 20Mwa yipitha yirughana yaNyambi, pamurandu ghoyidya. Yidya yoyiheya ne ya kushuka. Ene mbadi ya rogha eshi ghu yi tokotere. 21Ya rogha ngeshi munu mbadi wa kudya nyama, ngambi kunwa vinyu ngambi kutenda kehe thinu thokuharuritha muyendhoye. 22Pake matawero ghoye, gha kare thinu pakatji koye naNyambi. Mukafiyaghudhi munu yu ghokudhira kukutetera thinda, kuyinu yi ha mu fundhwera. 23Ngeshi ghumweya ha tamangera shemwa, ene ye ne pakudya, ghapwa kutetera kare. Yoyishi mbadi gha yitenda popamatawero ghendi. No kehe thi thokudhira kutenda munu mumatawero ne, maharwero.
Currently Selected:
Hakaroma 14: MHW1986
Highlight
Share
Compare
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
