Yihokora 9
9
Torombita ghoghukwoko
1Apa gha fudhire muengeli ghoghukwoko torombita wendi, kokumona kwange ditungwedhi dina kuturuka kuwiru, di were pamuve. Adyo ha di pire tjapi dhoditunga dyomwishi. 2Ko kutjapurura ditungwedhi mwithi. Ha ghu shwagha mo mwithi yira ghomudirara dishokuru. 3Momo mumwithi mo dya shwaghire dimba no dya dyadyaverire pamuve. Dimba ha di pire ngcamu thika di ha pire ngcamu nge pamuve. 4Hadi tongwera dimba eshi: Dya petha muhonyi, no mwengerere no kehe thitondo temba. Shimwengwa pithawo hanu wa ha pira thitareka thaNyambi, patuhungupara twawo. 5Ene dimba mbadi ha di fundhwerire kupagha hanu, kuwatjitjupitha rure rotughonda kwoko. Tjitju dhawo ne yira munu yu ghana humu nge. 6Mumayuwa gha hanu mbana shana yifa. Ene mbadi mba yi wana. Mbana ruru kufa, yifa mbo yina wa tjira.
7No mwiyero ghodimba, wa karire yira mbi dhina ndjangamena kuyita. Pamitwi dhadyo pa karire yira n̂ata dhomangondo no marupara ghadyo yira ghawanu. 8No dya karire nohuki yira ndjendja dhawakamadi. Mayegho ghadyo yira ghonyime. 9Dya shupatire yiteve pamiyidi yira yoyikuvo. Mupughumeno ghomando ghadyo, yira mupughumeno ghombi edhi dhina kutjirera kuyenda kuyita. 10Dya karire nomithira yira dho‐nge nomarunonga kumithira. Ngcamu dhadyo dha karire mukuhumbitha hanu tughonda kwoko. 11Fumu wadyo ne muengeli ghomwishi. Dina dyendi mu Thiheburayi ne Abadoni mu Thihirika ne Apoliyoni.
12Thihumbithitha thokutanga, tha pitire. Ene shime yiwadi kunyima dhatho.
Torombita ghoghukwoko noghofotji ngambi thihumbithitha thoghuwadi
13Muengeli ghoghukwoko noyofotji ko kufudha torombita wendi. Ha ni yuvu kwange diywi dina kushwagha mumanyigha mane, ghothinyaku thomangondo, ethi tha karire kughutho waNyambi. 14Diywi di, dya tongwerire muengeli eshi: “Shuture haengeli hane awa ha kara mumighodhi murware rushokuru rwaEghufrati.” 15Munyima ko kawashutura haengeli hane. Awa ha kwindukire kukuroghithera nako no kaghonda no mwaka, eshi ha paghe mbunga dhoghuhatu dhawanu. 16Thitara thawakayita hombi ne mamiliyoni mathere mawadi. Name na yuvire thitara thawo. 17Mu thishwaghameho thi, na monine mbi nawa ha dhinine po noyiteve yoyikihu yira mudiro. No yongongoro yira diwiru no yira yokawe ko kucokora. Mwitwi dhombi ne yira dhonyime. Mutunwa twadho mwa puyumukire mudiro no mwithi no tuwe tomudiro. 18Yinyandekitha yishahatu yi, yomudiro no mwithi no tuwe tomudiro, eyi ya tundire mutunwa twadho, yo ya paghire mbunga dhoghuhatu dhawanu. 19Yoyishi ngcamu dhombi dha karire mutunwa twadho nomumithira dhadho. Kumithira dhadho yira yiyoka nomitwi ko, no kumithira ko ya karire yinyandekitha.
20No hanu awa ha thigharire ko payinyandekitha yi, mbadi ha kuthighurire kuyitenda yawo yokukanderera hashatani, ngambi hanyambi homangondo no hoyikuvo no homawe no hoyitjwandjo yo kudhira kumona no kuyuva no kuyenda temba. 21Karo mbadi ha kuthighurire kughupaghi wawo no kughurodhi wawo no kuruhonda rwawo no kuwidhi wawo.
Currently Selected:
Yihokora 9: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
