Yihokora 8
8
Kuna kuyandhurura thingangera thoghukwoko noghuwadi
1No apa gha yandhururire thingangera thoghukwoko noghuwadi, ko kutenumuka mudiwiru kurikanya ngwa nako dhodihenda. 2Ko kumona kwange haengeli kwoko nohawadi hokwimana kughutho waNyambi awa ha pire matorombita kwoko nomawadi.
3Heya muengeli ghumweya, ghemane nokambarundu komangondo kughutho ghothinyaku. Ha mu pire ghungongorwa ghowingi eshi gha ghu tupure pofotji nomandapero ghawakakupongoka wahe, pathinyaku thomangondo kughutho ghodipuna dyaNyambi. 4Mwithi ghohapo wa shwaghire pofotji nomandapero ghawakakupongoka, munyara dhamuengeli ghu dhine kughutho waNyambi. 5Ha tumbura muengeli kambarundu kohapo no gha ka yarithire nomudiro ghopathinyaku no kukavukumena pamuve. Ha gha tanga mavuma no mudikitero no mwethero no makin̂eno ghomuve.
6Haengeli kwoko nohawadi nomarumarumbendo ghawo kwoko nomawadi, ha kwindukire kufudha.
7Muengeli ghokutanga gha fudhire torombita wendi ko kurokwa mbwe nomudiro ghokukukosha nomanyinga, yi were pamuve. Ko kupya mutara ghofotji ghokaye noyitondo yagho no mwengerere ghoghuhe wa pire.
8Muengeli ghoghuwadi naye gha fudhire torombita wendi. Kokuhokoka thinu thokuninga yira dirundu dina kupya kumudiro no kudiyundwera mudikuruviya. Thimingwa thoghuhatu thodikuruviya, tha thitunukire manyinga. 9Munyima kokufa thoghuhatu thomumeyu. No thikepa thoghuhatu tha dhamine.
10Muengeli ghoghuhatu kokufudha torombita wendi. Ko kuturuka dimutungwedhi mudiwiru, dyokuninga yira munyenge ha di wera pathimingwa thoghuhatu thorware no pamavetvetu. 11Dina dyoditungwedhi di ne ghuhungu. Nothimingwa thoghuhatu thorware natho tha karire ghuhungu, hengi hanu awa ha fire kumeyu gha yoyishi gha karire mahungu.
12Ko kufudha muengeli ghoghune torombita wendi. Ha thi kukosho thimingwa thoghuhatu thodiyuwa nothokaghonda nothomatungwedhi yi kare wiru. Thomutenya mbadi tha tapire thishe, nothoghuthiku karo kemo.
13Ame ha ni mono no kuyuva kakugho kamuengeli yu gha terembire kuwiruwiru ghuninga eshi: “Mawe ne, mawe ne, mawe ne kwawahatunga pamuve, kumaywi ghomatorombita agha gha thighara ko ghawaengeli hahatu!”
Currently Selected:
Yihokora 8: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
