Yihokora 7
7
Yombunga dhomako ghawaIsraghelite
1Munyima dhoyinu yi, ko kumona kwange haengeli hane mumitara dhine dhokaye. Awa ha shingire mipepo dhomumitara dhine ghokaye eshi; mbadiko mupepo ghu sho ghu pungere pakaye ngambi padikuruviya no kukehe thitondo temba. 2Ko kumona kwange karo muengeli ghana kwiya kumuvero ghodiyuwa, nothitareka thaNyambi ghomuyumi. Ha kugherera kwendi nodiywi dyodikuru kwawaengeli hane awa ha fundhwerire eshi ha shinye kaye no dikuruviya. 3Ha ningi kwendi eshi: “Mwa shinya kaye ngambi dikuruviya, ngambi yitondo, oku mbadi tuna tareka tuhungupara twawapika Nyambi wetu noditarekero.” 4Ho na yuvire thitara thawa ha pwire kutareka pakatji komako ghomahe ghawakaIsraghelite eshi, mayovi dithere dyofotji nomayovi makumi mane nomayovi mane (144 000). 5Awa ha tundire mudira dyaJuda mayovi dikumi nomawadi awa ha pwire kutareka, hakadira dyaRubeni mayovi dikumi nomawadi awa ha pwire kutareka, hakadira dyaGani mayovi dikumi nomawadi awa ha pwire kutareka, 6hakadira dyaAseri mayovi dikumi nomawadi awa ha pwire kutareka, hakadira dyaNaftali mayovi dikumi nomawadi awa ha pwire kutareka, hakadira dyaManase mayovi dikumi nomawadi awa ha pwire kutareka, 7hakadira dyaSimiyoni mayovi dikumi nomawadi awa ha pwire kutareka, hakadira dyaLevi mayovi dikumi nomawadi awa ha pwire kutareka, hakadira dyaIsakari mayovi dikumo nomawadi awa ha pwire kutareka, 8hakadira dyaSebuloni mayovi dikumi nomawadi awa ha pwire kutareka, hakadira dyaJosefu mayovi dikumi nomawadi awa ha pwire kutareka, hakadira dyaBenyamini mayovi dikumi nomawadi awa ha pwire kutareka.
Yawamarteri mughufumu waNyambi
9No munyima apa na monine yinu yi, ha ni mono kwange dinyangambo dyoyinu yishitara. Yomumarundu ghomahe nomumako ghomahe no mwawaguva wahe nomandimi ghomahe. Ko kwimana kwawo kughutho ghodipuna no ghoNdjwi oku hana kuyengi noyivata yoyikenu nomite dhomakindhu mumanyara ghawo. 10Ko Kukugherera kwawo nomaywi ghomakuru eshi: “Ruvigha kwaNyambi wetu oyu ghana hunguma padipuna no kwaNdjwi.” 11Haengeli wahe ha dhingumwetwedhire dipuna nawamayami noyikamoyo yine. Ko kukotama marupara ghawo kughutho ghodipuna no kukanderera Nyambi. 12Ha ningi eshi: “Kemo! Makughero no yishamberera no difumanekero no ngcamu no mangcamu kwaNyambi wetu kate kuroruhe nororuheya. Kemo.”
13Ko kuninga yofotji ghopawamayami kukwange eshi: “Awa hana pu kuyenga noyivata yoyikenu ne hadye, no kupi ha tunda?”
14Ame na mu huthire eshi: “Hekudyange, wa yi dimuka.”
Aye ha ni hutha eshi: “Wowa ha tundire mumaghukukutu ghomakuru wo ha yoghire yivata yawo, no kuyitenda kapeyo mumanyinga ghoNdjwi. 15Yo hana kukarera kughutho ghodipuna dyaNyambi mutenya no ghuthiku. Noyu gha hungumana padipuna mbo ghana wa tambera tende wendi. 16Mbadi mba fa karo ndhara no dinota temba no mbadi mbo di wa sheghenyena diyuwa no kuwapyapyarera temba. 17Yoyishi Ndjwi yu gha kara mukatji kodipuna ne, mbo ghana wa ditha. Ene mbo ghana wa dithera kumavetuvetu ghomoyo. NaNyambi mbo ghana kuyura mahodhi ghawo ghomahe.”
Currently Selected:
Yihokora 7: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
