Yihokora 6
6
Mashutweneno ghoyingangera
1Ame na mono Ndjwighana apa ghana yandhurura thingangera thofotji. Ho na yuvu thikamoyo thofotji thopayine, thina kuninga yira mughuma ghomudikitero eshi: “Wiye no mone!” 2Ni mone ne ko ne mbi ghomukenu. Noyu ghana dhini po, ghana kara noghuta ghongcunu. Hana mupa n̂ata no ghana kayenda yira mwidhi ghokawitha.
3Pakuyandhurura thingangera thoghuwadi, na yuvu thikamoyo thoghuwadi thina kuninga eshi: “Wiye no mone!” 4Ha shwagha po mbi ghomukihu. Kukwendi yu gha dhinine po ha mu pire eshi, gha tundithe thiraro pamuve. No ha kone kukupagha. Gho ha mu kwatekire dimende dishokuru.
5Apa gha yandhururire thingangera thoghuhatu, ko kuyuva kwange thikamoyo thoghuhatu thina kuninga eshi: “Wiye no mone!” Ni mone ne ko ne mbi ghomwiru. Noyu ghana dhini po ghana kwata thiyedhekerero munyara. 6Ha ni yuvu diywi kundjambi dhodiyuwa dyofotji mukatji koyikamoyo yine edi dina kuninga eshi: “Kandjato kofotji kotumbi kupita dinyinga dyofotji. Tundjato tuhatu tomahangu nato karo dinyinga dyofotji. Ene kadi wa kupetha maghori novinyu!”
7No apa gha yandhururire thingangera thoghune, ko kuyuva kwange diywi dyothikamoyo thoghune dina kuninga eshi: “Wiye no mone!” 8Ko kumona kwange mbi ghothimbundu, noyu ghana dhini po, dina dyendi ne, Kufa. Noditungwedhi dyawafu dina mu kuthu. Munyara dhawo gha tapa ngcamu dhokupagha mutara ghofotji ghokaye nomamende, nodiyerenge, nodihamba no kuyikudhekera yopakaye.
9Apa gha yandhururire thingangera thoghukwoko, ko kumona kwange mwimi dhothinyaku midhimu dhawa ha paghire, pamurandu ghon̂ando dhaNyambi no pamanongweneno ghawo. 10Ko kukugherera kwawo nomaywi ghomakuru eshi: “Owe mupongoki nomukaghushemwa noMupanguri, rure rokukuma papi sho tu taterere eshi withe kundhango hakapamuve, awa ha tu paghire no kuwahumbitha?” 11Kehe yu ghopapawo ha mu pire thivata thothikenu. Ha wa yuvitha eshi. Tango ha taterere kapupi kamanana kate thi rikanye thitara thawayendhawo, awa sha pwe kupagha yira wo.
12Ko kumona kwange apa gha yandhururire thingangera thoghukwoko noghofotji eshi, muve wa kin̂ine thikuma. Diyuwa dyerupire yira ketji ghothikumba. Kaghonda ka vindigherire yira manyinga. 13Nungwedhi dhokuwiru dha wire pamuve yira thitondo thoghukuyu ethi tha rundumukire mbuyo dhatho kudingundunga dishokuru. 14Diwiru dya kuhanyine yira mbapira dhi hana kupeta. Marundu ghomahe no yirudhi ya hanyaghukire mumango ghayo. 15Hafumu wahe hopamuve nawathimbi, nawatungi, nawakamakuto kupiterera mayovi nawakamukeya, ha kuhorekire mumambirikatji no mumangurungoma ghomarundu. 16Gho ha ningire kumanrundu no kumawe eshi: “Mu tu mbandukere. Maghana sho tu mone rupara roYu ghana hungumana padipuna no kughukenya ghoNdjwi temba. 17Yoyishi diyuwa dishokuru dyoghukenya wendi ne di neya. Yidye sho gha thare ko?”
Currently Selected:
Yihokora 6: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
