Yihokora 5
5
Yondjwi no yorukwaro rokungangera
1Na mono rukwaro mudyoko dyorudyo rwayu gha hungumana padipuna. Rukwaro oru rwapwa kutjanga mwimi, peghuru ne rwapwa kungangera noyingangera kwoko noyiwadi. 2Kokumona kwange muengeli ghongcamu, oyu gha kughererire nodiwyi dyodikuru eshi: “Yidye yu gha fumana kuyandhurura rukwaro ru no kushutununa yingangera yaro?” 3Ene noyofotji temba ghomudiwiru ngambi ghopamuve ngambi ghomwishi dhomuve, oyu gha kona kuyandhurura rukwaro ru ngambi kukenga mo. 4Ho na kudira thikuma yoyishi kadi wa kuwana yu gha fumana kuyandhurura rukwaro ru no kutoya mo temba no kukenga mo temba. 5Ko kuninga nyami ghumweya kukwange eshi: “Wa dira, ngo mone eshi, Nyime yu gha tunda mudiko dyaJuda ne yomidhi dhaDavita. Yo gha kona kuyandhurura rukwaro ru no kushutununa yingangera yaro kwoko noyiwadi.”
6Ha ni mono kwange mukatji kodipuna no moyoyiyumi yine no mwawamayami, gha nemana Ndjwighana ghokuninga yira hana mu pagha. Nyigha dhendi ne kwoko nodhiwadi no meho kwoko nomawadi. Meho gha no nyigha dhi ne dhoMipepo kwoko nodhiwadi dhaNyambi, edhi dhapwa kutuma mukaye kokahe. 7Ko kwiya Ndjwighana, kokutumbura rukwaro munyara dhorudyo rwa Yu ghana hungumana padipuna. 8Apa gha tumburire rukwaro, ko kufurumana yikamoyo yine nawamayami makumi mawadi nohane kughutho ghoNdjwighana. Kehe nyami gha kwatererire thivandjero no karonga komangondo kokuyara ghungongorwa. Agha ne ghomandapero ghawapongoko. 9Ko kwimba kwawo dimbo dyodipya eshi:
“Owe wa fumana kutambura rukwaro.
No kushutununa yingangera yaro.
Yoyishi wa pwire kupagha,
no wa tu ghurire kwaNyambi nomanyinga ghoye,
atwe twa tunda mu kehe diko no mu kehe ndimi no
mumarudhi ghomahe.
10Ghuna tu tendi diko dyoghupristeri mukukarera
Nyambi wetu.
No mbo tuna rawera kaye.”
11Ko kumona kwange no kuyuva maywi ghawaengeli hohengi, hokudhingumwetwedha dipuna pofotji noyikamoyo nawamayami. Wingi wawo ne mayovi dikumi no mayovi dikumi hokudhira kukona kutara. 12Ko kukugherera kwawo eshi:
“Ndjwighana yu ha paghire,
yo gha fumana kuwana ngcamu no ghutungi no
ghunyanyami no mangcamu no dikuto no difumanekero.”
13No kehe thivareka thomudiwiru no thopamuve, no thomwishi dhomuve thomudikuruviya no yoyihe na yi yuvu yina kuninga eshi: “KuKwendi yu gha hungumana padipuna no kwaNdjwighana difumanekero no dikuto no ghufumu no ngcamu kuroruhe.” 14Yikamoyo yine ya ningire eshi: “Amen!” Nawamayami makumi mawadi nohane, ha tongamenine no ha mu kandererire oyu gha para kuroruhe nororuheya.
Currently Selected:
Yihokora 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
