Yihokora 22
22
1Muengeli ko kunineghedha rware rokendhuruku romeyu ghomoyo ghokutwedhima yira kristari, agha gha shwaghire mudipuna dyaNyambi no dyaNdjwighana. 2Rware rwa poposhire mukatji komukara ghombara. Ku marungengera ghorware kwa karire thitondo thomoyo, thokwima mbuyo padikumi noruwadi, no mu kehe kaghonda thina kutapa mbuyo dhatho. Mahako ghatho ne merukitho ghomarudhi.
3Ene mbadi mbo thi kara mumbara ethi thapwa kukuta, shimengwa dipuna dyaNyambi no dyaNdjwighana. Nawapikendi wa mba mu karera. 4Awo mbana mono rupara rwendi, no Dina dyendi mbo dina kara pamarupara ghawo. 5Ghuthiku mbadi mbo ghu kara ko, no mbadi mba nyanda munyenge nothishe thodiyuwa temba, yoyi mbo ghana wa munekera Fumu Nyambi, no mbana pangura yira hafumu kate kuroruhe nororuheya.
Mashingero ghopaghuhura no medhero
6Ko kunitongwera muengeli eshi: “Nando dhino ne dhamatjimapero no dhoghushwemwa. Fumu Nyambi wa waporofeta hokupongoka yo ghana tumu muengeli wendi gha neghedhe hapikendi, eyi sho yi hokoke pawangu‐wangu.”
7Ha ningi Jesusi eshi: “Mone, tamba niye. Mukaruvigha mukakupungura man̂ando ghano ghoyipumba ghomurukwaro runo.”
8Oyu ne yame Johannesi, oyu gha yi monine no kuyuva. Ene apa na yiyuvire no kuyimona, ko kuwera kwange kumapadhi gha muengeli yu gha yi ni neghedhire ni kanderere. 9Ha ni shingi eshi: “Perere poye! Yoyishi yame mupika muyendhoye no wa wayendhoye no wa waporofeta no wa wahapungura man̂ando ghorukwaro runo. Kanderere Nyambi!” 10Munyima ha ni tongwera eshi: “Wa dhinda man̂ando ghoyipumba ghorukwaro runo, yoyishi nako ne pepi dhidi. 11Oyu gha kutenda ghuyi, gha vuritheko karo kutenda ghuyi, oyu ghana potathana nodidhiro, gha potathanenene, muhunga, gha hungamenene, mupongoki gha pongokerere.”
12Ha ningi Jesusi eshi: “Mone, na kumu wanguwangu, no yiruwera ne kukwange yidi, eyi sho ni ruwere keheyu popayitenda yendi. 13Yame Alfa no Omega, matangero no mahurero, mukakutanga no mamanithero.”
14Hakaruvigha hakakutenda miragho dhendi, awo hana kuwana matawero ghokuthitondo thomoyo no ghokwingena mumakorogho ghombara. 15Ene podhidi mbwa panunda nawarodhi, nawakarungu, nawapaghi, nawakahanyambi homango, nawa ha tokomena yishewe no kuyitenda, mbadi mbengena mo.
16“Yame Jesusi na tumu muengeli wange eshi, gha mu nongwenene yinu yino kughutho ghombunga dhawakakutawa. Yame mudhi no Mwanahoka waDavita no Nota‐ghomurughura.”
17Mupepo namwenga, kuninga hana kuninga eshi: “Wiye!”
Noyu ghana kuyuva yi, naye ghaninge eshi: “Wiye!”
Mukakufa dinota, gheye; oyu ghana haka meyu ghomoyo, gheye na gha ghatumbure nyaranyara.
18Yoyishi ame kuna kudimukitha kehe yu ghana haka kuyuva man̂ando ghoyipumba ghomurukwaro runo eshi: Ngeshi ghumweya ha wedherera payinu yino, mbo ghana muwedhererera Nyambi yinyandeka eyi ha tjanga murukwaro runo. 19No ngeshi ghumweya ha tundithapo thinu paman̂ando ghoyipumba yomurukwaro runo, mbo ghana mutepwera po naye Nyambi yomurukwaro romoyo noyomumbara dhokupongoka eyi ha tjanga murukwaro runo.
20Oyu ghana kunongonona yi, ghana kuninga eshi: “Shemwa, na kumu wangu‐wangu.”
Kemo, wiye, Fumu Jesusi!
21Thin̂eke thakHekudyetu Jesus Kristusi, thi kare nenu mwaheya.
Currently Selected:
Yihokora 22: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
