Yihokora 21
21
Diwiru dyodipya no muve ghoghupya
1Ha ni mono kwange diwiru dyodipya no muve ghoghupya, yoyishi diwiru dyokutanga no muve ghokutanga ne ya dhongonokire no dikuruviya mbadi dya karire po karo. 2Ame Johannesi ha ni mono mbara dhokupongoka, Jerusalema ghomupya ghana kutunda kwaNyambi mudiwiru, ghana kuroghitha yira mwenga yu ghana pu kuyenga kwakatughuru wendi. 3Munyima ha ni yuvu diywi dyodikuru dyokushwagha mudiwiru dina kuninga eshi: “Mone, thinyaku thaNyambi ne pawanu thidi, no mbo ghana tungu kukwawo. Awo mbana kara hakadiko dyendi, naNyambi thinda mbo ghana kara kukwawo yira Nyambi wawo. 4Ene Nyambi mbo ghana kuyura maruhodhi ghomahe ghomeho ghawo. Yifa mbadi mbo yi kara po karo no yikudhekera temba no madiro temba no maghukukutu temba. Yoyishi yinu yokutanga ne yina dhimana.”
5Noyu gha hungumanine padipuna ghaningire eshi: “Mone, Ame kuna kutendurura yoyihe.” Ha ningi kukwange eshi: “Tjange, yoyishi man̂ando ghano ne ghaghushemwa no ghamakurupero.” 6Karo ha ningi kukwange eshi: “Eyi ne yina piti! Yame Alfa no Omika, matangero no mahurero. Hakakufa dinota mbona wapa meyu ghomumavetu‐vetu ghomoyo, nyara‐nyara. 7Mukakuwitha mbo ghana yoro yoyihe, ame ne mbo na kara noNyambi wendi, aye ne mbo ghana kara mwanange. 8Ene hambumba nawakakudhira kutawa, nawathururu, nawayipaghi, nawakarungu, nawarodhi, nawakakukarera hanyambi hombango, nawakambango wahe, ndhango dhawo ne dirara dyomudiro nomaretha. Eyi ne yoyifa yoghuwadi.”
Jerusalema ghomupya
9Namuengeli yofotji ghopawakwoko nohawadi, awa ha karire noturonga toyinyandeka kwoko noyiwadi yoghuhura, gheyire kukwange no gha ghambaghurire nange eshi: “Wiye kuno, na ni kuneghedhe madyaho, muna Ndjwighana.” 10Ha ni twara mumupepo padirundu dishokuru dyodire, ko kunineghedha mbara dhodhikuru Jerusalema ghokupongoka, oyu gha shurukire mudiwiru dyaNyambi. 11Adho dha karire noghurwedhima waNyambi, no thishe thadho yira kawe kondhiro no yira kurwedhima ko kristari noyasipisi 12Dha karire no mbadi dhodhikuru dhodhire, no makorogho dikumi nomawadi. Kumakorogho kwemanine haengeli dikumi nohawadi, no papwire kutjanga mena ghomako dikumi nomawadi eshi, ghogha ghawana Isragheli. 13Kudiva makorogho mahatu, kumbunda makorogho mahatu, kughucuma makorogho mahatu, kuditokera makorogho mahatu. 14Mbadi dhombara dha pwire kunenekanya kumba padikumi noruwadi. Popo pa tjangire mena ghawapostoli dikumi nohawadi. 15Noyu gha kuvurekire nange, gha karire nothiyedhekeritho thomutagha thomangondo, no tho gha yedhekerithire mbara nomakorogho ghadho nombadi dhado. 16Mbara dha tenamine mumitara dhine, ghure wadho pofotji yira mughuyaghayu. Aye gha yedhekerithire mbara nomutagha ghomangondo, ho gha wanine mihanyamo mayovi mawadi mughure wadho no mumbadi dhandho no mudhimba wadho, dha kurikanyine. 17Munyima gha yedhekerire mughupatji wadho mayovi dithere nomayovi makumi mane nomayovi mane thika di hayedhekera munu oyu gha rikanya kwamuengeli. 18Mu mbadi mwa karire mughagha ghoyasipisi. Mbara dha rwedhine yira mangondo, no dha kenakenine yira divitiri. 19Mashokekero ghombadi dhombara ha gha vungavungire no kehe rudhi romawe ghomawa. Diwe di ha shokekithire pakutanga dyoyasipisi, dyoghuwadi dyosafiyeri, dyoghuhatu dyokalicedoni dyoghune dyosimaraga 20dyoghukwoko sarodonikisi, dyoghukwoko noghofotji saridiyusi, dyoghukwoko noghuwadi kirisoriyeti, dyoghukwoko noghuhatu beriri, dyoghukwoko noghune topasi, dyodikumi kirisopurasi, dyodikumi nodyofotji ametisi. 21Makorogho dikumi nomawadi ghombara, ghomakwarara dikumi nomawadi, pa kehe dikorogho pa karire dikwarara dyofotji. Mukara ghombara wamangondo no wa twedhimine yira divitiri.
22Tembeli mbadi na dhi monine mo mumbara, yoyishi Fumu Nyambi ghomukangcamu dhodhiheya noNdjwighana ne dhotembeli dhamo. 23No mbara mbadi dha nyandire diyuwa ngambi kaghonda eshi yi sheghenyene mo, yoyishi thishe thaNyambi tha sheghenyenine mo, no Ndjwighana ne munyenge wadho. 24No marudhi gha ha ghamwenine mo, mbana yendaghura muthishe thadho, nawafumu hopamuve mbana reta yishamberera no dikuto dyawo mumwadho. 25Mutenyamwiru mbadi mba yandhera makorogho ghadho, yoyishi mbadi mbo mu kara makokore. 26Awo mbana reta mo yishamberera no dikuto dyomarudhi. 27Ene mbadi mbo thingena mo ethi tha rombyathana kughuyi no kutenda ghukore nombango, shimengwa wa hapwa kutjanga mumbapira dhomoyo dhaNdjwighana.
Currently Selected:
Yihokora 21: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
