Yihokora 17
17
Mahanyaghukero ghaBabiloni Mukamadi ghorungu nothishereka
1Namuengeli ghopawakwoko nohawadi, gheyire noturonga kwoko notuwadi, na gha ghambaghure nange no ghaningire kukwange eshi: “Wiye kuno ni kuneghedhe nagharungu, oya gha nemana pamashandjiva. 2Oyu gha tendire rungu nawafumu hopamuve. Hakapamuve ha tererire kuvinyu ghorungu rwendi.”
3Ha ni tumu Mupepo kumamboreya. No na ka monine mukamadi oyu gha hungumanine pathimbumburu thokukihuruka. Ethi thayara nomena ghomushedho ghokwaNyambi, nomitwi kwoko nodhiwadi nonyigha dikumi. 4Mukamadi gha pwire kuyenga nomahina ghomakihu nomangondo nomakwarara. Munyara dhendi, gha kwatererire kopi ghomangondo, ghokuyara ghuyi ghorungu rwendi. 5Parupara rwendi ha tjangire po dina eshi: “Mukakunda, Babiloni shokuru. Nyina rungu noghuyi ghoghuhe ghopamuve.” 6Ha ni mono mukamadi ghana terera kumanyinga ghawapongoki, nomanyinga ghawatunonga waJesusi.
Ho na tetukire thikuma pakumumona kwange. 7Munyima ghaningire muengeli kukwange eshi: “Yinye yina kukukutha? N̂anyi ni kutongwere yokunda yamukamadi no yothishereka, thomitwi kwoko nodhiwadi nonyigha dikumi, ethi thina mu shimbi. 8Thishereka thi wa monine, mbadi wa thi monine. Mbo thina vumbuka muditunga dyomwishi, dyomayongarero. Nawakapamuve awa ha dhira kutjanga mena ghawo murukwaro romoyo, kutunda kumatangero ghokaye, mbana tetuka pakumona thishereka, ethi tha karire po. Ene, mbadi tha karire po.
9“Apa no panyanda dighano dyoghunyanyami. Mitwi kwoko nodhiwadi, ghomarundu kwoko nomawadi, agha ghahungumanine mukamadi. 10Marundu gha ne wo hafumu kwoko nohawadi. Hakwoko ha na ghu, yofotji ne poghadi. Yofotji ghumweya, shime mbadi gha neya. No ngeshi gheye, ghana kuna kara kapupi kamanana. 11Ene thishereka thi tha karire po, mbadipo n̂anyin̂anyi. Thoghukwoko noghuhatu, natho tha rikanya kwawakwoko nohawadi no kuyenda kumayongarero.
12“Nyigha dikumi dhi wa monine, wo hafumu dikumi wa ha dhirire kukara mudiko dyoghufumu. Ne, ha wana ngcamu dhokupangura yira hafumu pofotji nothishereka muthitunde. 13Awo ha kuyuvire pofotji no ha tapire ngcamu dhawo nomarawero ghawo kwathishereka. 14Mbana tendi yita naNdjwighana. Ndjwighana, mbo ghana wa witha. Yoyishi, aye ne hekudya wawahekudya no Fumu wawafumu. Awa hokukupakerera nendi, hapwa kwitha no hapwa kutorora no ha tjimapa.”
15Ko kunitongwera muengeli eshi: “Meyu gha ghuna mono, apa ghana hungumana mukamadi ghorungu ne, wo hamako nomambunga nomarudhi nomandimi. 16Nyigha dikumi edhi wa monine pathishereka, awo ne mbana ndhanya ruhonda no mbana mu thighi mughuthighana, nomuwira, no kufununa nyama dhendi no mbana mu tumekere nomudiro. 17Yoyishi Nyambi gha pakire mumitjima dhawo thitambo thi gha haka eshi, thi kone kurikanya. Ha tape marawero kuthishereka, kate mbo gha rikanye man̂ando ghaNyambi.
18“No mukamadi yu wa monine, dhombara dhishokuru, edhi dha raghura ghufumu ghoghuhe ghopakaye.”
Currently Selected:
Yihokora 17: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
