Yihokora 16
16
1Ko kuyuva kwange kakugho kokakuru ko kushwagha mutembeli, kawaengeli kwoko nohawadi, kana kuninga eshi: “Yende ghu notore pamuve turonga toghukenya waNyambi.”
2Munyima ha shwagha muengeli ghokutanga, gha ka notore karonga kendi pamuve. Ko kuwawana dihamba dyoyitombo, awa ha karire nothidimukitho thothishereka no kukanderera kuthishereka.
3Muengeli ghoghuwadi ha notora karonga kendi mudikuruviya. Dikuruviya ko kuthitunuka manyinga yira ghamufu. Yoyiyumi yoyihe yomudikuruviya ko kufa kwayo.
4Muengeli ghoghuhatu gha notwerire karonga kendi murware no mumavetuvetu, ha yi thitunuka manyinga. 5Ha ni yuvu muengeli ghopameyu ghana kuninga eshi: “Fumu ghomuhunga. Yowe wa karo po ndi? Noyu gha karire po? Yowe mupongoki, yoyishi Yowe wa tuma yipangura yino. 6Mone eshi, awo ne ha notorire manyinga ghawapongoki no ghawaporofeta. Owe ghuna gha wapa ha gha nwe. Kemo yo waroghera.” 7Ko kuyuva kwange ghumwe ghana kushwagha kuthinyaku ghuninga eshi: “Kemo, Fumu Nyambi ghomukangcamu dhodhihe no mukaghushemwa. Yipangura yoye ne yihunga.”
8Muengeli ghoghune gha notwerire karonga kendi padiyuwa. Eyi ne ha wa tumenine dyekeshera, dyokuwavavura hanu. 9Hanu ha pwire kuvavura nodyekeshera dishokuru. Awo ne ha shedhire Dina dyaNyambi oyu gha kara nongcamu, dyoyinyandekitha yino. Ene mbadi ha pirukire ha mupe fuma.
10Muengeli ghoghukwoko gha notwerire karonga kendi, padipuna dyothishereka. Ghufumu wawo wa dhimanine. Patjitju dhawo ha tafunine marudimi ghawo. 11Ko kushwahura kwawo Nyambi patjitju dhawo nopayitombo yawo. Ene mbokapwe, mbadi ha kuthighurire kuyitenda yawo.
12Muengeli ghoghukwoko noyofotji gha notwerire karonga kendi, murware rushokuru Eghufrati. Meyu gha ghapwererire, dhi roghe ndhira dhawafumu hokudiva. 13Ko kumona kwange mukanwa kodikongoro, no mukanwa kothishereka no mukanwa kamuporofeta ghombango, mipepo dhihatu dhodhiyi dhina kwiya, yira manyudya. 14Edhi ne dhomipepo dhawashatani dhokutenda, yitetukitho. Dha tunda kwawafumu hopamuve nomukaye kokahe. Adho dhi wa kongwedhe kuyita yodiyuwa dyodikuru, dyaNyambi ghomukangcamu dhodhihe.
15“Mu mone, Ame na kwiya yira mwidhi. Mukaruvigha mukakurawa no kukunga yivata yendi, maghana sho gha rendarende thiheha no sha mone yothihonyi yendi.”
16Nawo ha kukongwedhire mudyango edi ha toya mu Thiheburayi eshi: Armagedoni. 17Muengeli ghoghukwoko noghuwadi, gha yuperire karonga kendi muwiru. Ko kushwagha diywi dyodikuru mutembeli ghomudiwiru, edi dyaningire eshi: “Yina piti.” 18Ha gheya maywi nomudikitero nomwethero, nomakin̂eno ghomakuru ghomuve. Agha gha dhirire kukara panganyi. Ya karire eshi, dyarero hakapamuve mbadi sha kare po, kumughuma ghomakin̂eno ghomuve ghashokuru. 19Mbara dhishokuru dha pwire kuyakunutha muyipindi yihatu. Maghumbo ghawanu gha dhingunukire. Babiloni shokuru gha mu hanyaghurire Nyambi eshi gha mupe kopi ghovinyu ghoghukore wendi. 20Yirudhi yoyihe, ya hanyaghukire no marundu kadi gha wana. 21Mbwe dhishokuru dhokuninga yira mamuwe, dhi rokwire muwiru dhi were hanu, Nawanu ha nyeghenyine Nyambi, kuyinyandeka yombwe. Yoyishi yikuru thikuma yinyandeka yendi.
Currently Selected:
Yihokora 16: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
