Yihokora 15
15
Haengeli kwoko nohawadi nomahumbithero ghoghuhura
1Ha ni mono kwange karo mudiwiru thidimukitho thothikuru thothitetu eshi: Thawaengeli kwoko nohawadi, awa ha karire nomahumbithero kwoko nomawadi ghokumanithera. Yoyi mahumbithero gha ne po wa kunyikerire ghukenya waNyambi.
2Popo ha ni mono dikuruviya dyokutwedhima dyokuvunga nomudiro. Ene hakakuwitha thishereka nothitjwando thatho nothidimukitho thatho nothitara thokudina dyatho, na wa mono ha nemana padikuruviya dyokutwedhima noyivandjero yaNyambi. 3Awo ne hembire dimbo dyaMosesi ghomupika Nyambi no dyoNdjwighana no ha ningire eshi:
“Yikuru yitenda yoye no ya tetukitha,
ghoFumu Nyambi ghomukangcamu dhodhihe.
Gha hungama no gha ghushemwa mayira ghoye
ghoFumu wawapongoki.
4Yidye yu mbo gha dhira kukuyapa we Fumu,
ngambi kushwena kufumaneka. Dina dyoye?
Yoyishi pithoye wa pongoka,
no marudhi ghomahe mbo ghana kanderera
kughutho ghoye,
yoyi yitenda yoye yoyihunga ne yina hokoka.”
5Munyima dhoyinu yino, ha ni mono kwange tembeli ghotende wawatunonga homudiwiru, ghana yandhuruka. 6Nawaengeli kwoko nohawadi noyihumbithitha yawo kwoko noyiwadi, ko kushwagha mutembeli. Ha pwire kuyenga noyivata yokukushuka yokurwedhima yoyikenu no kukwindakanya mikata dhomangondo mumiyidi dhawo. 7Ndani thofotji thopayikamoyo yine, tha tapire turonga kwoko notuwadi tomangondo kwawaengeli, otu twa yarire ghukenya waNyambi oyu gha para kuroruhe nororuheya. 8Tembeli dha yarire mwithi ghokushwagha mufuma dhaNyambi no mungcamu dhendi. Ene noyofotji temba gha konine kwingena mutembeli, oku shime no kupwa temba yihumbithitha kwoko noyiwadi yawaengeli kwoko nohawadi.
Currently Selected:
Yihokora 15: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
