Yihokora 14
14
Ndjwighana nawa gha komononine padirundu dyaSiyoni
1Ko kumona kwange Ndjwighana gha nemana padirundu dyaSiyoni. Pofotji nawanu mayovi dithere no makumi mane nohane. Awa ha pwire kutjanga Dina dyendi pathuhungupara twawo. 2Munyima ha ni yuvu kwange mupughumo mudiwiru, ghokuninga yira mupughumo ghomeyu no mudikitero ghoghukuru, nomaywi ghoyihumba agha ha shikire hakayihumba. 3Hembire dimbo dyodipya kughutho ghodipuna, no kughutho ghoyikamoyo yine no wawamathimbi. No mbadiko yu ghokukuhonga dimbo di, shimengwa wa hamayovi dithere dyofotji no makumi mane nohane, awa ha komononine pamuve nondjewandjewa. 4Awa ne wa dhirire kukukoshakosha nawakamadi. Ha karire yira hashengeteya hokukushuka. Awa wo ha kuthakuthire Ndjwighana kokuhe oku ghana kuyenda. Wa pwire kughura mukatji kawanu yira wo hakakutawa waNyambi no waNdjwighana. 5Mutunwa twawo mbadi ha wanine mo mbango. Yoyi ha pirire murandu kudipuna dyaNyambi.
Haengeli wa ha yuvithire ndhango dhaNyambi
6Ko kumona kwange muengeli ghumweya ghana kutuka mukatji komawiru, kukuyuvitha mbudhi dhororuheya kwawakapamuve no kumarudhi ghomaheya, no mashimurukero no mandimi no mako. 7Ha ningi nodiywi dyodikuru eshi: “Mu yape Nyambi no mumufumaneke. Yoyishi nako dhoyipangura yendi ne dhi neya. No mumukanderere yu gha varekire diwiru no muve no dikuruviya no mavetuvetu.”
8Muengeli ghumweya gha huthire ko no ghaningire eshi: “Ghana yunguruka, ghana yunguruka Babiloni. Mbara dhishokuru, edhi dha paghire marudhi ghomahe kumarovu ghadho no kurungu rwadho.”
9Ko kuwahutha muengeli ghoghuhatu yu ghawarandire, ghukugherera thikuma eshi: “Ngeshi po ghadi yu gha kanderera thishereka nothitjwandjo thatho no kukara nothidimukitho thatho parupara, ngambi padyoko dyendi. 10Naye yokunwa kuvinyu ghoghukenya waNyambi. Oyu ha dhira kuvunga no kumupundera muthinwitho thoghukenya wendi. Aye mbo ghana pu kuhumbitha nomudiro nomaretha, kughutho wawaengeli hokupongoka no kughutho ghoNdjwighana. 11Mwithi ghothihumbithitha thawo mbo ghuna kara kuroruheya. Nawo mbadi mba wana maturumuthero mutenya noghuthiku, awa mba kanderera kuthishereka no kuthitjwandjo thodina dyatho.”
12Omu mo wa kara ghudhughutjima wawakakupongoka. Awa ha dhidhimeka mumiragho dhaNyambi no ha kunga matawero ghomwaJesus Kristusi.
13Ko kuyuva diwyi dyomudiwiru dina kuninga kukwange eshi: “Tjange eshi, hakaruvigha awa hana kufera mwaNyambi.”
Mupepo kuninga ghana kuninga eshi: “Kemo yashemwa, awo mbana ka turumutha kumaghukukutu ghawo, no yitenda yawo yoyiwa mbo yina wa kuthu.”
Yipokora yokaye
14Munyima ko kumona kwange divuyi dyodikenu, noyofotji yira Mwana munu ghana hungumana padivuyi. Non̂ata dhomangondo pamutwi wendi. Munyara dhendi ne dikerevere dyoditwe. 15Muengeli ghumweya gha shwaghire mutembeli. Ha kugherera nodiywi dyodikuru koyu gha hungumanine padivuyi eshi: “Kan̂are dikerevere dyoye no ghu keshe. Yoyishi nako ne dhineya kukoye eshi ghu‐keshe. Mukesho ghopamuve ne ghuna piterera kupya.” 16Noyu gha hungumanine padivuyi, gha withire dikerevere dyendi pamuve, ko kupwa kukesha muve.
17Namuengeli ghumweya gha shwaghire mutembeli ghomudiwiru. Naye gha karire nodikerevere dyoditwe.
18Ene muengeli ghumweya oyu gha karire nongcamu kumudiro, ha shwagha kuthinyaku no gha kughererire koyu gha karire nodikerevere eshi: “Keshure nodikerevere dyoye no kongwedhe mashokombwa ghomandjembere ghokaye. Yoyishi mashokombwa gha ko ne ghana pi.” 19Muengeli gha vukumine dikerevere dyendi pamuve, gha keshithe ko dindjembere dyopamuve. Munyima ko kuvukumena kwendi yi muthikamitho thothikuru thoghukenya waNyambi. 20Yishokombwa ha yi djovererire muthikamitho thopanunda dhombara. Ghudhungi ghomupoposhero ghomanyinga agha gha shwaghire mo ne, gha kumine kate kumayuru ghombi.
Currently Selected:
Yihokora 14: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
