Rukwaro Romiposalemi 9
9
Fumu ne kughamwena wa ha pira maghamweno
1Kwamwimbithi: kurwimbitho, roPayifa yamurumyana.
2Na haka kukukugha ghoFumu
nomutjima wange ghoghuhe.
Na himi kukuthimwetwedhera,
kungcamu dhoye dhodhihe
dhoyitenda yomakomweneno.
3Kukoye na haka me ni shamberere, no kushamba.
Na haka kwimbera Dina dyoye, ghoMukakupiterera.
4Apa wa hokokire, ha tjirire han̂ore dhange.
Ha pundaghukire no ha fire.
5Mupanguri ghomakurupero,
pakahungumana padipuna dyoye,
wa ni neghedhire ghuhunga.
6Wa haran̂anyine marudhi kate tarara.
Hayi ne ha fire,
no ha dhimanine mena ghawo kuroruhe.
7Yina pu yokwawan̂ore,
kuthighara po ne ndjavingiri.
Wa ghundhununine mambara ghawo,
no mbadiko yu ghana kuwavuruka karo.
8Roruheya Fumu ne padipuna dyendi,
no kurudyo rodipuna dyendi,
gha kwinduka mukughamba ghushemwa.
9Gha paka muhunga ngambera ghokwawahe,
no gha raghura yiruwera yoyiredhu kumarudhi.
10Kwawa hana kuwera mughukukutu,
matjirero ne kwaFumu,
no mondo mumanako ghoyinyanda.
11Yo hana kukukurupera wahe,
awa hana kunongonona Dina dyoye.
Yoyishi owe Fumu,
wa toperera hakakukumbera maghamweno kukoye.
12Mwimbe kudifumanekero dyaFumu,
yu gha tunga muSiyoni,
no mu thimwetwedhe mako yoyitenda yendi!
13Aye kuvuruka hahunga,
yokuwahuthera ne yifa.
Aye mbadi ghana kunyatha yikugherera
yawa ha di mukunyanda.
14Hekudyange, ni fere n̂eke,
no ghu kenge kuyinyandeka yi,
ha ni tendire hakakunidhimba,
Owe ne yowe wa ni tumunine mudikorogho dyoyifa.
15Munyima ho na kuthimwetwedha yitenda yoye yoyihe yodikuto,
ho ni kone kukushogherera mumakorogho ghaSiyoni
ko yi ghuna ni wanitha.
16Marudhi ne mudikwina gha wera
edi ha kuthimena hathinda.
Mapadhi ghawo ne ghana kundhingera mudikwe
edi ha tegha hathinda.
17Kemo gha kudimukithire thinda Fumu.
Gha neghedhire ghuhunga
no gha kwatire yiharuri noyitenda
yonyara dhendi.
18Hayiharuri ne,
dya wa rikanya dyango dyawakamwishi,
no marudhi ghomahe agha gha dhira
kundhundha kwaNyambi.
19Yashemwa, hakakunyanda ne,
kadi ha kuvurama kuroruhe
no mataterero ghawakakunyanda,
mbadi mbo gha kara kurorohe munyara‐nyara.
20GhoFumu, tjinaghane po
eshi gha dhire kukununeka munu thinda.
Humbithe marudhi.
21Ho wa yarithe nowoma ghoFumu,
ha kone kukudimukera hathinda eshi wo ne hanu vene.
Currently Selected:
Rukwaro Romiposalemi 9: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
