Rukwaro Romiposalemi 10
10
Hahunga hana kukumbera maghamweno ghokwawan̂ore dhawo hodihuna
1Nye yi ghuna karera kokayenda, ghoFumu?
Nye ghuna kuhukera kangaranyima mumanako ghoyinyanda?
2Awa ha shwena Nyambi,
kuna kukutha‐kutha nodihuna
munu ghokupira maghamweno.
Hapwe kukwata pamaghano ghawo ghomaringi‐ringi,
agha ha nunga hathinda.
3Mukakushwena Nyambi, kare nga kunyanyukera,
mo yi gha kurupera eshi, gha yi wane.
Oyu ghokuhima ghutungi thinda,
payinu yaghumweya,
kare gha kughayarera ruvigha.
Kukwendi Nyambi ne thanye.
4Ghana kukenduka diyuru muwiru eshi:
“Nyambi ne kadi wa kutapa mahumbithero!”
No mumaghano ghendi ghomahe, mbadimo Nyambi.
5Yoyihe yi ghana kutenda roruhe, kukwendi ne yiwa.
Yokutetera ndhango ghoFumu,
kayenda‐yenda kukwendi
no kadi ya kuthandha.
Aye ne kughon̂a ghunyatha hon̂ore dhendi.
6Yighayara yendi eshi,
mbadi mbo ni pundadhoka me
no dihudhi temba mbadi mbo ni wana.
7Waheya ye ne kuwaramba matuka,
no kuwaghayarera dihudhi no ghuyi.
8Karo ye ne kukokawera hahunga kumatete
no kuwapagha mukahore‐hore.
No kuyundhangera mudikokore.
9Kenge yo noghuyundhangera,
ghana kushana kanyingo yira nyime mudiputa.
Aye ghana kunyomena muhunga gha mu kwate.
Pakumukwata ghana kumungambwera dikwe dyendi,
10no kumushinya thikuma ghumupumura.
Kemo dyo gha kwatanga hahepwe.
11Thinda ghana kukuninga eshi:
“Mbadiko thi ghana kunishinga Nyambi kuyinu yi,
kuthivura ghana kuyithivura.
Ava ye eshi, mbo gha yi mone.”
12Ngo wiye ghoFumu!
Neghedhe ngcamu dhoye ghoNyambi!
Perere‐poye, wa vurama hakakupira maghamweno.
13Ngepi di ha kona kushamuna Nyambi,
hakakumushwena,
no kughayara eshi mbadi mbo gha wa wana?
14GhoFumu, owe ne wa yi mona roruhe,
yinyanda no yitokota.
Hekudyetu, yi koneke no yimanithe po.
Papoye ha mu thighera mukadihudhi,
ngambi thighana, Yowe mughamweni wendi.
15Tundithe po ngcamu dhoyu gha kushwena no dhathipaghi,
karo humbithe ghuyi wendi!
Wa mu thigherera nokamanana temba kughuyi wendi.
16Hekudyange, gha kara roruheya Fumu,
han̂ore, gha wa tjidha muditunga dyendi.
17GhoFumu, yikuhema yawakakupira maghamweno
ne wa yi yuvire.
Ho wa wa pire matjimapero ghomapya.
Ndapero dhawo wa dhi yuvire.
18Muthin̂eke thoye, werekire thighana namukakunyanda.
Kemo eshi,
pano pamuve mbadiko yu mbo gha para nowoma.
Currently Selected:
Rukwaro Romiposalemi 10: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
