Rukwaro Romiposalemi 59
59
Nyambi ne mughamweni wange ghongcamu
1Kwamwimbithi: nodimbo eshi: “Mbadi wa kona kuwadhimitha po!” Mupisalemi waDavita. Mutanuro, munyima dhokuyuva wo eshi, pamarawero ghaSaghulu, hana dhingumutwedha ndhugho dhaDavita no hana shana kumupagha.
2Ha ningi kwendi eshi,
ni ghamwene kwawan̂ore dhange ghoNyambi,
ni kunge kwawakakuniman̂anyena,
3karo ni ghamwene kwawayi,
ni shuture kwawayipaghi yawo!
4Haringi‐ringi wa, hana nundamena eshi ha ni paghe,
no hana shana ku ni mbandukera.
Ene me, mbadi na harura,
no mbadi na shinya me, owe Fumu!
5Ame ne na pira murandu,
ene ngambi kemo shime ha ni ghundukera ha ni mbandukere.
Wiye no ni ghamwene! Ngo mone eyi hana kutenda!
6Owe ne yowe Fumu Nyambi,
ghoMukangcamu dhodhihe no Nyambi waIsragheli.
Ngo wa paranye, no humbithe rudhi ru roghunyathi!
Mbadi wa kona kufera n̂eke, hakore wa hohanyathi.
7Awo ne roruheya hana keyanga parunguro,
no kughonena yira mbwa,
ghuyendaghura mumikara.
8Tunwa twawo ne tuna takura kakangafudhi,
no kundhanya mayegho ghawo,
yoyishi yighayara yawo eshi,
mbadiko yu ghana kuwayuva.
9Ene Owe, Fumu, kuheka ghuna kuwaheka,
marudhi ghomahe, kusherera ghuna kughasherera!
10Na haka kukambeka matjimapero ghange paPoye,
Yowe ngcamu dhange dhokupiterera.
Yoyishi, Yowe matanarero ghange ghofiyaghudhi!
11Nyambi wange, yo makurupero ghange,
no mbo ghana ni ghamwena,
karo Nyambi mbo ghana ni monitha hakakuniman̂anyena.
12Mbadi wa kona kuwapagha wangu,
yoyishi maghana dya kuvurama diko dyange,
mahumbithero ghawo.
Wa tjodhaghure thiwana‐thiwana nongcamu dhoye,
ho wa dheke kwishi Owe, Fumu, ghomughamweni wetu,
13kuman̂ando ghawo,
no kumaharwero ghomutunwa twawo.
Ninge ha wa kwate pamurandu ghodihuna dyawo,
no payikuto yi yina kushwagha mutunwa twawo no
mbango dhi hana kughamba.
14Wa dhimitherere po noghughandhi ghoye,
no wa manitherere po tarara.
Ndani po sho ha dimukere waheya eshi,
Nyambi ne yomuraghuri
waJakopu no kaye kokahe.
15Awo ne ka huka roruhe parunguro,
no kughonena yira mbwa,
ghuyendaghura mumikara.
16Karo awo, hana kuyendaghura roruhe mukundamena kumarambo,
ene ngeshi mbadi yina wa rikanya,
hana kuyangaghura vene.
17Ene me po mbo ni kukughera ngcamu dhoye,
no mbo na yumbaghuka kehe mathikuthiku,
kumakurupero ghoye,
yoyishi, owe ne ghomughamweni wange ghongcamu,
no mondo ghange munako dhoyinyanda.
18Na haka kwimbera difumanekero dyoye,
Owe mukangcamu dhange Shokuru,
yoyishi Yowe ghomughamweni wange ghongcamu,
no Yowe Nyambi wange ghomakurupero.
Currently Selected:
Rukwaro Romiposalemi 59: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
