Rukwaro Romiposalemi 57
57
Neghedhe ghukuru ghoye ghoNyambi
1Kwamwimbithi: nodimbo eshi: “Mbadi wa kona kuwadhimitha po!” Mupisalemi waDavita. Mutanuro, munyima dhokuyuva eshi kwaSaghulu gha tjirerire, gha konde mudingurungoma.
2Ni fere n̂eke ghoNyambi! Ni fere n̂eke,
yoyishi kukoye na kushana mondo
no mbo nondu mumando ghoye,
kate mbo yipwe yinyanda yange.
3Ame ne kwaNyambi Shokuru, na kukugherera,
kwaNyambi yu mbo gha ni ghamwena.
4Mahuthero ghendi, mbo ghana shwagha mudiwiru no
mbo ghana ni ghamwena.
Aye mbo ghana witha, hakakunikutha‐kutha.
NaNyambi mbo ghana hutha yi,
muruhakitho rwendi no mumakurupero ghendi.
5Ame ne, yame no nidi mukatji kawanyime,
pakatji kawanu awa hana shana kunidjadjaghura.
Mayegho ghawo ne man̂odhi no masho,
marudimi ghawo ne mamende ghomatwe.
6Neghedhe ghukuru ghoye ghoNyambi, peghuru dhodiwiru,
no ngcamu dhoye peghuru dhokaye.
7Awo ha ni tegha kayeye kumapadhi ghange,
yoyi, hana shana ku ni tjodhaghura,
ha ni thimena dikwina,
ene hathinda ha wera mo.
8Apa no ne na fiyaghuka, ghoNyambi!
Na fiyaghuka karo shemwa!
Na haka kukwimbera dimbo,
shemwa na haka kukwimbera.
9Ame na himi kupinduka murughura,
nodin̂udi no kuvitha diyuwa ni di tende ghukihu!
10Ame na haka kukukugha mukatji komako, ghoFumu,
mukatji komarudhi, mo na haka kukwimbera ghusho,
11yoyishi ruhakitho roye, rwa kuma kate mudiwiru,
no makurupero ghoye, kate mumavuyi!
12Neghedhe ngcamu dhoye ghoNyambi, kuwiru,
no peghuru dhopakaye.
Currently Selected:
Rukwaro Romiposalemi 57: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
