Rukwaro Romiposalemi 56
56
MwaNyambi, mo na paka makurupero ghange
1Kwamwimbithi: kembo “Kadikutji oku ghadi kuyitondo yoyire.” Mupisalemi wa Davita. Mutanuro, munyima dhokuyuva eshi, Hafilisiteyine ne, hana ka mu tura muDikwina dyon̂otwa.
2Ha ningi kwendi eshi, ghu ni fere n̂eke ghoNyambi,
yoyishi padi hanu awa hana kunitjidha‐tjidha,
hakan̂ore awa hana kunikutha‐kutha, kutunda kumathiku‐thiku
kate parunguro.
3Murughurura, kate parunguro hana kunitjidha‐tjidha me,
no karo ame ne na kara nawan̂ore hohengi thikuma,
owe Shokuru.
4Mudiyuwa di mbo ni yapa,
paPoye vene mbo ni kurupera.
5MwaNyambi yu na kukugha n̂ando dhendi,
mwaNyambi mo na paka makurupero ghange,
no mbadi na kuyapa.
Nye gha kona kutenda nange, munu ghodibotwa?
6Awo hepitha moyo wange roruhe noyirundera yawo,
maghano ghawo ghomahe ghomayi ne,
papange vene gha nyika.
7Kuyundhamena hana kuniyundhamena no kunundamena,
karo mathithina ghange hana kuyakawera,
no kuniminawera mate eshi, ha ni paghe.
8Hekudyange, kughukore ghuno,
mbadi ha dhira kukona kuwana mahumbithero!
Ninge ghu wa dhongonone po ghukenya ghoye,
ghoNyambi!
9Yinyanda yange ne mbadi wa yi thara parupitayendo roye,
no Owe ne ghomuhengaghuri wange.
Murukwaro roye, kemo yapwa kutjanga karo.
10Diyuwa di mbo nitha maghamweno kuKoye,
mbana ghu han̂ore dhange no ku ni yakunuka.
Eyi ne na yi dimuka eshi:
Nyambi ne kumutara wange gha kara.
11MwaNyambi yu na kukugha n̂ando dhendi,
mwaFumu yu na kukugha n̂ando dhendi,
12makurupero ghange, mwaNyambi na gha paka,
no mbadi na kuyapa thinu.
Thinye ne sho gha kone kutenda nange munu?
13GhoNyambi, ame ne na kona ku kumitha mo medhero ghange ghoku‐Koye,
no na himi kukutupwera muyambo ghomatumero.
14Yoyishi Yowe wa ni yokora mukufa,
no dipadhi dyange temba di wa pundaghukithire,
no na kona kukon̂otwedha ndhira dhange naNyambi
yoyi na mona thishe thomoyo.
Currently Selected:
Rukwaro Romiposalemi 56: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
