Rukwaro Romiposalemi 55
55
Tape yitokota yoye kwaFumu
1Kwamwimbithi: nothivandjero. Mutanuro waDavita.
2Yuve ndapero dhange ghoNyambi,
no wa kuthunda‐thunda ne kuyikumbera yange.
3Tegherere kundapero dhange no ni huthere:
yitokota yange ne, mbadi yina kunipa maturumuthero.
Ame ne na tokota thikuma, 4kumishedho dhawan̂ore dhange,
no kurupetho rwawanu hohamango ropapange.
Awo ne hana haka kuniwitha noghuyi wawo,
no mughupata wawo hana kunitjokedhera han̂ore dhange.
5Pano nidi ne ghuna kukokera mutjima wange,
woma ghokufa ghuna ni wana,
6woma noyitutukwa yina ni wana,
yirama yange yoyiheya, kututuma yina kututuma.
7Ame na ghayara eshi:
mawe, ngo na karire nomando yira dikutji,
ngo na tukire no kushana matungo,
8thiwa thapo ne ngo kokayenda tukerire
no katunga mumamboreya,
9na haka kuyereka kutjira wangu kudipepo dino,
dyodingundunga.
10Hekudyange, wa haran̂anye po, no vunga‐vunge ndimi
dhawo, ha dhire kukuyuva. Yoyishi, ame ne na mono
mambandukero no thivunganyi mumbara dhino,
11mutenya no ghuthiku hana kukughumba, kumbadi
dhombara, mwimi ne maghuyi no maghukukutu ghadi mo.
12No mumbara mwa karire thivunganyi, pambandha
dhombara ne, ghukukutu no mbango.
13Ngo han̂ore dhange wa ha na kunipetha, ngo na
dhidhimeka, ngambi ngo mukakuniman̂anyena yu,
gha shanine kunifupipitha, ngo na mu yedhire.
14Ene pano ne yowe vene, ghomurume yira yame,
ghomusherewange, no muhakwa wange ghomuhunga.
15Pan̂anyi‐n̂anyi, nga tu kutendi ghundambo,
noghunyanyuka ho nga tu yendi pofotji kundhugho dhaNyambi.
16Kufa ngo gha kumbandukere han̂ore dhange! No ha
dhire kuyidimukera eshi, ngepi di hana
shughumukera mwawakamwishi,
yoyishi, mumayugho ghawo no mumitjima dhawo ne,
ghuyi wa kara mo.
17Ene me, kwaNyambi na kukugherera, kwaFumu yu
mbo gha ni ghamwena.
18Parunguro, nomathiku‐thiku no pamutwekatji
kushivana na kushivana no kutothima, ene Ye,
kuyuverera ghana kuniyuverera yikugherera yange.
19Ene Ye, mbo ghana ghamwena moyo wange, no kunipa mawithero, ngambi kenge di mbo ni twamwa kurwa nawengi.
20Nyambi yu gha raghura kuroruheya, mbo ghana yuvu,
no kuwadheka, yoyishi ha shwena kupiruka no kumukarera temba.
21Mukan̂ore dhange, rupu gha nungire makuyuvero,
ngambi, aye ne kutjora maturekero ghendi.
22Rudimi rwendi rwotu yira maghadhi, ene mumutjima
wendi ne mwa yara yita, no man̂ando ghendi ne, gha
ghendhumuka yira maghori ene agho man̂ando ne,
mamende ghokukona kutwitha.
23Pake yitokota yoye paFumu,
Naye mbo ghana kukungu.
Aye mbadi mbo gha mwagherera muhunga,
mumaghukukutu ghendi.
24Ene hanu wa, ghoNyambi, mbo ghuna wa mwaghera mumbira.
Hayipaghi wa hokenge yo, nawakambango
mbo hana fu muyipara yawo yoyimango.
Ene me, paPoye na kurupera.
Currently Selected:
Rukwaro Romiposalemi 55: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
