Rukwaro Romiposalemi 50
50
Mukakupara thiwana, yo mbo ni ghamwena
1Mupisalemi waAsafi.
Fumu ne yoNyambi, ghoNyambi pithendi.
Kughamba ghana kughamba,
kwitha ghana kwitha kaye kokahe,
kutunderera kumuvero ghodiyuwa, kate kuditokera.
2Kushwagherera muSiyoni, kuna kukuhokora Nyambi mumashani,
dyango di dya piterera mango ghomahe.
3Kwiya ghana kwiya Nyambi wetu,
mbadi ghana kuporera.
Kughutho wendi, mudiro ghuna kutumbuka ko,
mumbadi dhendi ne dingundunga dishokuru.
4Kwitha ghana kwitha diwiru nomuve kun̂ando
dhodiko dyendi, eshi:
5“Mu kongwedhe pofotji wa ha kurupera mumwange,
nomuyambo wawa ha nunga ghundambo nange.”
6Eyi sho di yuvithe diwiru,
yaghushemwa, yoshi Nyambi ne yoMupanguri.
7“Yuve ghodiko dyange, na haka kupaka n̂ando dhange.
Na himi kukunongwenena we Isragheli.
Yame Nyambi, ghoNyambi ghoye!
8Wa ninga eshi yoyi ghuna dhiranga kuyamba yo na
dhira kukupa mahumbithero,
owe ne roruhe ghuna yambanga kughutho wange
muyambo ghoye ghokukon̂erera.
9Mbadi na shana ndwedhoghana muhambo dhoye,
ngambi n̂ombo muthikora thoye,
10yoyishi, yiyama yomumuthitu yoyiheya ne Yange no
yishereka yomumarundu diyovi.
11Yinyunyi yoyihe yomumarundu, na yi dimuka,
no yoyihe yi yina kunyakita mumuthitu ne Yange.
12Kadi wa kukona kukwipura me,
oku nafu ndhara,
yoyishi muve no yi ya kara po yoyiheya ne Yange.
13Endi me kudya ndwedho dhi muna yambanga,
ngambi kunwa ghunyinga ghon̂ombo?
14Dikuto kumuyambo ghu wa reta kwaNyambi.
Ruwere matawero ghoye kwaMukakupiterera.
15Nithe ne mudiyuwa dyoyitokota,
Name mbo na kughamwena,
owe ne mbo ghuna ni kutekera.”
16Kwawa ha mu shwena ghana kuninga Nyambi eshi:
“Nye ghuna kughambera miragho dhange ghofotji kughofotji,
no kukupaka ghothinda kughundambo wange,
17oku we ghuna hambuka yi na kukuhonga,
no mbadi ghuna kuthotera ko yi na kughamba?
18Pakumona mwidhi we, ghuna kutjoverera nendi,
endi ku ghuna wana kambenene,
ghuna kutjora ghurugho.
19Kate kuyahuka we, shimengwa ghupata keho,
rudimi roye ne thunguthanena nombango.
20Owe ne shimengwa ghoye keho yo wa kuvureka,
no kumupa maghukukutu.
21“Ni porere keho oku pakutenda we yi ndi?
Nye keho mbo ghayara we, eshi Me ne yira yowe!
Ene kadi kemo, Ame na kukuneghedha mahumbithero ghoye,
no kukutokotitha!
22Mu tegherere kumashingero ghano,
amwe mwa dhira kutawa mwaNyambi,
maghana mbo ni mu pagherera no kughamwena po temba ghumweya.
23“Mukakunikutekera,
yomukadikuto pakureta muyambo.
Na mukakupara thiwana,
yo mbo ni ghamwena.”
Currently Selected:
Rukwaro Romiposalemi 50: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
