Rukwaro Romiposalemi 49
49
Mbadi wa kona kutokota eshi hanu ne mbadi ha kona kukara hatungi
1Kwamwimbithi ghoyimba. GhomukaKoragite. Mupisalemi.
2Mwamako mwahe, mu tegherere kuno,
namwe mwa tunga kaye mu turumuke mwahe,
3kehe munu kadi kwa kuthighara ngambi yu
gha kukarera, mutungi ngambi muhepwe!
4Kanwa kange, mbo kana ghamba ghunya‐nyami mughukenu,
eyi mbo ni ninga, kughushemwa mbo yi nongonoka.
5Na haka kununga ghuturumuthi mughukukutu no
mbo na tjwathanitha yidimuka,
oku pakushika yiketari.
6Nye sho ni tokotere mumanako ghomaghukukutu,
oku hana ku ni pambeka hakambango yoyiyi,
7ngambi hanu wa ha kurupera paghushwi wawo no
kuhuna noghutungi wawo?
8Munu yofotji ne kadi wa kukona kushutura
ghumweya pakumufera ndi,
naNyambi ne kadi wa kumukomonona vene ndi?
9Paro dhomoyo wamunu ne dha yeyuka thikuma.
Yoyishi, ngambi gha ruwere kadi ya kurikanya
10eshi mbo gha pare roruhe,
endi mbo gha dhire kufa.
11Eyi kuna kuyimona yomuhe:
hanyanyami kufa yira hathuta nawanu vene,
no kuthigha ghushwi wawo kwawamweya.
12Mbira ne dyodighumbo dyawo kuroruhe,
kutunda kwawanahoka,
kate kwawanahoka wawo ghomatunga ghawo,
ngambi kenge ha wanine fuma pamena ghawo.
13Ngambi nohoro gha kara munu,
mbadi mbogha para kuroruhe,
munu ne kuwana ghuhura thika yiyama.
14Eyi ne yo gha kuwanena munu thika di
gha yi kukuruperitha,
ghomahurero ghawa ha kununeka hathinda.
15Kufa kwawo ne yira ndjwi yu hana raghura, eshi ghafe,
mukungi wawo ne kufa vene.
Mbadiko thimweya, ho mba were mumbira,
nomwawafu mbo yina dhongonoka yi ha kurupera,
mbadi mbo yi kara shime kukwawo yi.
16Ame ne mbo ghana ni shutura Nyambi
mungcamu dhokufa munyara‐nyara,
no mbo na kara nowendi.
17Wa tokokota kughutungi wawanu,
noyimuna yawo eshi yingi,
18yoyishi mbadiko thi mba shimba pakufa kwawo,
noyimuna yawo mbadi mbo yi wa kutha.
19Yirumbera kuparitha munu mughuwa,
ngambi ha mu kughu hanu eshi thiwana yimudi,
20shemwa mbo ghana yendi mudikwina yira hakerekandongo wendi,
no mbadi mbo gha mona munyenge karo.
21Ngambi ha kara munu mukamwagha‐mwange, endi mughuthuta,
kudhongonoka kwendi ne yira yiyama.
Currently Selected:
Rukwaro Romiposalemi 49: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
