Rukwaro Romiposalemi 45
45
Mutanuro wafumu
1Kwamwimbithi: kurwimbitho, rokumutemo wamukaKorahite. Mutanuro. Dimbo dyoruhakitho.
2Ame ne na pu kukoka kuyinu yoyiwa,
gho na kutwara mutanuro wange kwafumu,
rudimi rwange ne yira kamutjangi yu, gha yi twayera.
3Owe ne ghomuwa kupiterera waheya,
pamiromo dhoye, man̂ando ghoyimenya‐menya
gha shwagha po,
yoyishi, mumoyo ghoye ghoghuhe Nyambi gha kukandadheka.
4Wiye ghomutjima, tende ghuwa kun̂anani,
wiye mughufumu ghoye no tegherere.
5Ghufumu ghoye ne wangcamu!
Nunge ghushemwa kughuyi
no ghuhunga kwawakakupira maghamweno!
Owe ne wapwa kwitha kuyitenda yoyiwa.
6Mandamba ghoye ghomatwe, gha withere mako kumapadhi ghoye,
no gha tuyaghure mitjima dhawan̂ore wafumu.
7Yivareka yoye yoyihe, ya tanara roruhe kudipuna dyoye,
ghuhunga ghoye, ghuna kughuhokora nomutagha ghoye.
8Wa haka ghuwa no wa dhimba ghuyi.
Yoyishi yu wapa fuma,
wa mu wethithire we Nyambi noyishamberera gha
kare fumu mukatji kawayendhendi.
9Thiwe thomira no thiwe thomunde ghoyitondo
yimweya, thina yara payivata yoye,
noyishika yokughutho ghorombe ghoye,
yo yina kukushambereritha.
10Kughutho ghoye kunemana herekadhi yu ghana pu kuyenga nomakwarara,
kurudyo roye ne kunemana fumukadhi mumangondo ghaOfiri.
11Tegherere we mwana, tegherere thiwana:
yakunuke kudiko dyoye no kwawapoye.
12Yoyishi ghukushu ki ghoye, wa yudhaghura fumu.
Owe ne ghowendi, no yo sho kutekere.
13Ghomwana Tirusi, hatungi hodiko,
hana kushana ghuwa ghoye noyitapa.
14Mughutwedhima ghana kwimana fumukadhi paya
muyitere yomangondo yondhiro.
15Ghana kuyengera wina no kuna kumuyegha‐yeghitha kwafumu.
Naye thinda nawakamadighana hakakumukutha,
nawashere wendi kuna kuwareta kukoye.
16Muyishamberera yoyikuru hana kuwareta
no kutjinaghana murombe wafumu!
17Kare nohana awa mba rundurura hanahoka woye,
no mbo wa pake eshi mbo ha raghure ditunga dyodiheya.
18Padimbo dyange di wane fuma Dina dyoye,
kwawanahoka wahe eshi mbo gha kukughe mako ghomahe.
Currently Selected:
Rukwaro Romiposalemi 45: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
