Rukwaro Romiposalemi 44
44
Wiye no tu ghamwene
1Kwamwimbithi. GhomukaKoragite, Mutanuro.
2GhoNyambi, nomatwi ghetu twathinda twa yiyuvire,
hawihetu ha yi tu thimwetwedherire,
eshi pakare‐kare We,
wa tendire thitenda thothikuru kwawatukuru.
3Nonyara dhoye ghothinda wa tjidhire marudhi,
no wa tapire matungo mwene kudiko dyoye.
Wa manithire ngcamu dhomarudhi,
kukutapa horo kudiko dyoye.
4Ene kadi nodimende
dya munine diko dyoye ditunga
no kadi nongcamu dhawo hathinda,
ha withire yinu yi,
ene pangcamu dhoye no pamahimeno ghoye
no ku ghudi po ghothinda
yoyishi wa wa hakire.
5GhoNyambi, yowe Fumu wange,
tape kwawanahoka waJakopu mawithero.
6Nomaghamweno ghoye, twa kona kupagha han̂ore dhetu,
no mbo tuna witha hakakutwiman̂anyena muDina dyoye.
7Yoyishi, mbadi na kukurupera paghuta wange ghongcunu,
nothimende thange mbadi mbo thi ni pa mawithero,
8oyu ne yowe wa tu pire mawithero ghokwawan̂ore dhetu
no kudhimangedha mahukero ghawo.
9Kutunda po twa kughire Nyambi diyuwa dyodihe,
no twa fumanekire Dina dyendi roruhe.
10Shemwa apa no ghuna tu mwagha,
ho tuna wana mashwahukero.
Yoyi, mbadi ghuna kukupakerera shime nawakayita wetu.
11Ghuna tawa eshi,
ha tu tjidha‐tjidhe hakakutwiman̂anye,
awo ne kuna kuyimanitha ghuhima.
12Ghuna kututapa: Atwe ne yira ndjwi
dhi hana kupagha.
Karo ghuna tu tapathanitha mukatji komarudhi.
13Owe ne kutapa diko dyoye munyara‐nyara,
no mbadiko thi ghuna kukudhekera muyinu yi.
14Ghuna tu paka mumanyathero ghawakamaparaghumbo netu kupira nothinu,
yisherera no yikumadheka yawahe,
yina tu dhingi.
15Ghuna tu tendi thisherera mukatji komarudhi,
nodishamu mukatji kawanu.
16Kehe diyuwa na kuyendaghura ghukukotjeka muhonyi thikuma,
tjitju ne kudhitoya vene murupara rwange,
17thiyuva thange ne musherero wawan̂ore
no mushedho ghu ghuna kushwagha mwawakanyinya.
18Yinu yoyiheya yi ne yina tu dimbama,
ngambi kenge twa dhira kukuvurama,
no mbadi twa nyathire ghundambo ghomakurupero ghoye.
19Mbadi twa pemuka,
no mundhira dhoye, mbadi tuna hambuka mo.
20Ngambi kemo, ghuna mana kutuharan̂anya,
ditunga dyetu ne mangumbwarara didi,
ho ghuna tu ngambwera nodikokore.
21Ngo mbadi twa kughererire kuDina dyaNyambi wetu,
endi ngo twa rombire maghamweno kwanyambi waye,
22ngo mbadi gha yi tawire Nyambi,
oyu gha dimuka roruhe maghudhindo ghomutjima.
23Pamurandu ghoye tuna feranga roruhe,
tu kare yira ndjwi dhi hana kupagha.
24Wiye no tu ghamwene ghoFumu! Nye ghuna rarera?
Ngo pinduke! Mbadi wa kona kutumwagherera roruhe!
25Nye ghuna kudhira kuthotera kuyinyanda
yetu no kughumango wetu?
26Yoyishi, tuna mangoperera kate kurukungu,
no kumuve tudi.
27Ngo wiye no tu ghamwene
no ghu tu shuture, pakutuhokwera ghundambo ghomakurupero ghoye.
Currently Selected:
Rukwaro Romiposalemi 44: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
