Rukwaro Romiposalemi 41
41
Ni fere n̂eke Hekudyange
1Kwamwimbithi. Mupisalemi waDavita.
2Ya rogha kwamunu yu,
ghana kutokomena mukashu.
Fumu, mbo ghana mu ghamwena mudiyuwa dyoyinyanda,
3karo mbo ghana mu kungu no kumuparitha,
no ditunga dyodihe, mbo dina kuyongo
edi yina kumuroghera.
GhoFumu, mbadi mbo mu tapa kuyirumbera yawakore wendi.
4Fumu mbo ghana mu koneka muyikorwa yendi.
Ngeshi mbo gha korwe, mbo ghuna mwirukitha.
5Na ningire eshi: “Ni fere n̂eke ghoFumu!
Nirukithe, kuKoye na harura.”
6Han̂ore dhange ghuyi hana ku ni ghayarera eshi:
“Mwaka munye gha kufa, no kudhongonoka dina dyendi?”
7Pa kuna nirekura ghumweya,
ghana kughayara eshi yina pu.
Keya na gha mone edi yidi ghuyi
no ka yithimwetwedha kwako.
8Waheya wa ha ni dhimba,
kunimanena ghu ni hohotera,
yighayara yawo yokukwange ne yiyi vene:
9Eshi, yina mu wana yikorwa yoyifa yu,
kenge ghana rara, mbadi mbo gha pinduka karo!
10Ngambi muyendhange ghothikan̂arero
oyu na kurupera,
noyu na rerire manako ghomahe,
kunitungwera mughongo vene.
11Ni fere n̂eke Hekudyange,
no ni pinduthe pano,
ho wa tendere yi hana tendi kukwange.
12Na yi dimuka eshi, wa ni haka,
han̂ore dhange ne mbadi mbo ha ni witha.
13Yowe wa ni kwaterera,
yoyishi na pira murandu,
no ni pake roruhe kukoye.
14KwaFumu Nyambi waIsragheli,
ko dina kwiya difumanekero kate kumatambo ghokughutho.
Amen, kemo, amen.
Currently Selected:
Rukwaro Romiposalemi 41: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
