Rukwaro Romiposalemi 40
40
Fumu ne mukakunighamwena
1Kwamwimbithi. Mupisalemi waDavita.
2GhoFumu, ame ne na rurire kumaghamweno ghoye.
Naye gha fumberire kukwange,
no gha yuvire yikumbera yomaghamweno ghange.
3Ho gha ni kokire muthipiro thokufa,
no kunipatuthura mudibobo,
ho ghana nimeka padiwe,
no kuniyenditha padinganda.
4Gha ni pakire dimbo dyodipya mukanwa,
edi ne dya difumanekero kwaNyambi wetu.
Hengi mba di yuva, no kumukutekera,
no kukurupera paFumu!
5Ya rogha kwamunu ghokupaka makurupero ghendi paFumu,
no kushwena kuhata kuyinu yomakokore,
no kwawanu wa ha kara muthineneko
kwawanyambi hombango.
6Hekudyange noNyambi wange,
Owe wa tendire yitetu yoyingi,
no ghuna kutuvuruka roruhe,
mbadiko yu gha pitura We.
Na shana kuyithimwetwedha no kuyighamba,
ene yingi mu kuyitoyaghura.
7Mbadi wa haka muyambo ghokupagha,
ngambi ghoyidya,
endi ghokukon̂erera, ngambi ghomaharwero
mbadi wa ghu kumbera,
eyi wa hima We ne ghutawedhi.
8Yo na ghamberire eshi: “Ni neya,
thika di ha yi ni tjangerire pakare‐kare,
murukwaro rokupeta.
9Nyambi wange, kutenda mahimeno ghoye,
thohirumbera thange thokutanga,
n̂ando dhoye ne moyo wange ghoghuhe.”
10Na ghambire noyishamberera yoyikuru muthigongi eshi:
“Yowe wa ni shutura.”
Mbadi na porerire,
wa yidimuka ghoFumu!
11Kumashutwero ghoye, kadi nothinda na kughunguvura,
kumaghamweno ghoye ghomakurupero
na yi ghambire.
Ghuhunga ghoye nomakurupero ghoye,
mbadi na yi dhindire mumbongarero dhishokuru.
12Hekudyange wa ni yumena thin̂eke thoye,
ghuhunga ghoye nomakurupero ghoye,
yi ni kunge roruhe,
13yoyishi, ghana ni dimbama mahudhi nomahudhi,
no ghuyi wange ghuna ni witha,
mbadi na kudimuka eshi kupi sho ni tambe.
Yina vuru kupiterera huki dhopamutwi wange,
ho na tovoha me.
14Na kanderera, ni ghamwene ghoFumu!
Fumu, wiye ghu ni ghamwene wangu!
15Awa hana kushana moyo wange,
ha were hathinda muyinyanda,
no ha kudhekere kumataterero ghawo
nawa ha shana kumona yifa yange,
ha tjire no ha shwahuke.
16Awa hana ku ni sherera, ha humbe yoyishi
hathinda hana kumwaghera muyinyanda.
17Shambererithe wahe wa hana kukushana,
no ha yumbaghuke paPoye,
nawa hana kukurupera maghamweno kuKoye,
ha ninge roruhe eshi: “Fumu ne mukuru!”
18Ame ne nothinu vene, karo nomuhepwe,
ene Fumu, ku ni ghayara.
Yowe mughamweni nomukungi wange,
GhoNyambi wange tambuke, wa kudhugha‐dhugha!
Currently Selected:
Rukwaro Romiposalemi 40: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
