Rukwaro Romiposalemi 39
39
Yowe pithoye makurupero ghange
1Kwamwimbithi. Manongweneno. Mupisalemi waDavita.
2Na ningire eshi: Koneke thiwana pamoyo wange,
no ya ni haruritha yi na kughamba.
Na haka kukumuma kanwa kange,
ngeshi ku hana niman̂anyena hayi.
3Thimumamume na karire no kuporongana,
yo na porererire no kughamba temba,
ngambi kenge na tjitjupire thikuma.
4Dha karire tjitju dhodhiyi mumwange.
Tokotoko dhange ne mudiro vene mumwange.
Yo na ghamberire eshi:
5Fumu, ni dimukithe eshi, diyuwa munye mbo ni fa,
nomayuwa mangatji ghana ni thigharera,
ni dimukere eshi, mwaka munye mbo ghuhura moyo wange.
6Mone eshi, owe wa rikanyitha mayuwa ghange mughupu wagho,
mumeho ghoye, moyo wange ne yira thinye vene.
Ene mawe, hanu wahe mbana fererera.
7Munu ne kupara yira muyirota,
no ghana kutoghoropa yonyara‐nyara.
Ghana kutereka yidya,
ene mbadi ghana kudimuka yu mbo gha yidya.
8Koghadi makurupero ghange shime ndi owe Fumu?
Owe ne yowe makurupero ghange keho.
9Ni ghamwene kwawan̂ore dhange wahe
no wa ni thigha kumusherero wawathuta.
10Mbadi na kuheta, na yandhera kanwa kange,
yoyishi, yowe wa yi ni retera.
11Ni tundithe tokotoko dhi wa ni kokera.
Mupango ghu wa ni kambekire,
ghuna kashitha ngcamu dhange.
12Ngeshi ho humbitha munu kudiharwero dyendi,
ghuna kumwan̂itha yira thumbanyungu.
Shemwa, hanu wahe ne kudhongonoka.
13GhoFumu, yuve ne ndapero dhange,
tegherere kuyikumbera yomaghamweno ghange,
no wa kara nyiki kumahodhi ghange,
yoyishi, maghamweno ghange ne paPoye gha kara,
pithoye ghomukakunikorera, thika di wa
korerire hatukuru wange wahe.
14Hekudyange, ni shwaghithe yihumbitha yoye,
eshi ni kone kushamberera karo,
kughutho ghokuyenda ku na tamba,
munyima ne mbadiko me.
Currently Selected:
Rukwaro Romiposalemi 39: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
