Rukwaro Romiposalemi 37
37
Tape moyo ghoye kwaFumu
1Mupisalemi waDavita
Wa porera kemo kwawaringi‐ringi,
no wa kudhekere kuyinu vene,
2yoyishi, mbo hana dhongonoka yira muhonyi,
no kupepumuka yira mwengerere.
3Kurupere vene mwaFumu no tende yoyiwa,
tunge no rughane ghuturumutha kughutho.
4Shane yishamberera yoye mwaFumu,
no mbo ghana kupa yi wa rumbera mutjima ghoye.
5Tape moyo ghoye kwaFumu,
ho mu kurupere, mbo ghana kukorera.
6Ghupira murandu ghoye,
mbo ghana ghu hokora yira diyuwa,
no ghuhunga ghoye, mbo ghuna kenaghana yira mutwekatji.
7Yodigho, tjimape mwaFumu muthipore,
no wa kudhekera yipara mwene yawaringi‐ringi.
8Wa pata, thighe ghukenya,
wa kudhekera, eyi ne kureta yitjitjupa.
9Haringi‐ringi, mbana pu kutjidha,
ene wa ha paka makurupero mwaFumu,
wo mbo ha tunga ditunga.
10Shime kapupi, gho mbo ha pire po
wa ha shwena Nyambi.
Mbo ghana wa shana munu oku hadi,
ene mbadi mbo ha wa wana.
11Awa hana kudjata pan̂anyi‐n̂anyi,
wo mbo ha tunga ditunga
no mbo hana kushambereritha koyi ha rumbera.
12Oyu gha shwena Nyambi, gha shana mapwero ghamuhunga
no gha twepitha mayegho ghendi papendi.
13Fumu ye ne pakuheka yu gha mu shwena,
yoyishi, ghana mono diyuwa dyendi.
14Mukakushwena Nyambi, gha nyenya thimende
no gha rema ngcunu,
kukupagha mukakunyanda namuhepwe,
no kushinya yu gha tamba mundhira mwene.
15Ene yimende yawo, mbo yina tuyura mitjima dhawo hathinda,
no mangcunu ghawo mbo ghana pu kutjinaghura.
16Hahunga hohapu,
hasha ha piterera ndhira thawayi hohengi,
17yoyishi, ngcamu dhawo mbo dhina pu kuhayaghura.
Ene Fumu, mbo ghana kara mughamweni wawahunga.
18Moyo dhawahunga, Fumu gha dhi koneka,
no yi ha muna, mbo yina wa karera mumoyo wawo ghoghuhe.
19Munako dhoyinyanda, mbadi mbo ha kara nyara‐nyara,
no munako dhoghuhepwe, awo ne mbana wana yoyihe.
20Hayi mbana dhongonoka,
nawa ha dhimba Fumu mbo ha nan̂a,
yira madyero ghorupeya gha ghana kumudiro,
dyo mbo ha dhimana.
21Hayi, kuyadhima ene kadi wa kuruwera
hahunga, kufera n̂eke no kughamwena.
22Oyu ghapwa kukandadheka kwaFumu,
mbo ghana tungu ditunga,
ene yu ghapwa kukuta kukwendi,
mbo ghana pu kutjidha.
23Fumu ne yo gha paka po matambo ghamunu,
no ndhira dhamukakumumenya‐menyitha,
ghana kumukwatitha.
24Ngeshi ha ghu ghokenge yo, mbadi ghana kurara,
yoyishi kumupindutha po Fumu.
25Na karire no mungaghu, pano ne na kurupara,
ene mbadi na monine muhunga mughuthighana,
ngambi hanahoka wendi,
mbadi ha kumberire thidya.
26Ngeshi poyidi yinyanda, ghana kuyitapa
mukudhira kuyihutha karo,
nawanahoka wendi mbo yina wa roghera.
27Mu yakunuke kughupata no mu tende yoyihunga,
po mbo ghu tunga ditunga.
28Yoyishi, Fumu gha haka ghuhunga
no mbadi ghana kumwagherera hakakumukarera.
Mbo ghana wa kutekera roruhe.
Ene hanahoka wawayi, mbo ghana wa pagha.
29Hahunga mbana tungu ditunga
no mbo hana kara mo kuroruheya.
30Eyi gha ghamba muhunga ne yaghunya‐nyami,
eyi ghana kuninga, ya kununga noghuhunga.
31Eyi gha hokora Nyambi wendi,
mumutjima wendi ya kara,
no matambo ghendi, kadi gha kutamangera.
32Muyi ghondamena muhunga,
no kushana kambenene ko kumupagha.
33Fumu ne mbadi ghana kumuthigha mungcamu dhamuyi,
no mbadi ghana kumutetera ndhango,
oku gha nemana kughutho ghodipuna dyondhango.
34Taterere kwaFumu no kare mumayira ghendi.
Aye mbo ghana kupindutha karo no mbo ghuna tungu ditunga,
no mbo ghuna mono madhongonokero ghamuyi.
35Ame ne na mona eshi kukura kwamuyi,
yira didyanyatji
36eyi na na pitera po karo, kadi wa kumuwana po,
na mu shanine ne mbokapwe.
37Ene mone keho kwamukafuma,
kenge kwamuhungami:
mukamaghano oyu gha ghayarire yokughutho.
38Awa ha nyatha Nyambi,
mbana pu kudyadyangedha nodipadhi,
makurupero ghokughutho ghawayi,
mbo ghana pu,
39hahunga ne mbo ghana wa ghamwena Fumu.
Aye ne yomatjirero ghawo, munako dhoyinyanda.
40Fumu ne kuwaghamwena no kuwashutura,
yoyishi kuKwendi honda.
Currently Selected:
Rukwaro Romiposalemi 37: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
