Rukwaro Romiposalemi 35
35
Ghamwene moyo wange ghushihuru
1WaDavita.
GhoFumu, kanane n̂ando dhange kwawakakuniheta,
wingene pawan̂ore dhange,
2kungure yiteve yawo no ni ghamwene.
3Tumbure muho, ho tetere hakakunikutha‐kutha.
Na haka kuyuva di ghuna kughamba eshi:
“Na kukughamwena!”
4Ninge wa hana kushana moyo wange,
ghu wa hukere ghuyi no ha pire maghamweno.
Nawa hana kushana kunimanitha po,
ha tjire, no ha kudhekere kumataterero ghawo.
5Gha wa tjidhe muengeli waFumu,
yira mungu kumupepo.
6Pake mundhira dhawo makokore no‐kaherumute,
ho gha wa kutha‐kuthe muengeli waFumu.
7Yoyishi mbadi ha wanine thinu thokunitegha kayeye,
ngambi kunithimena dikwina.
8Wa manithe popano pakapupi!
Wa thighe ha we hathinda mukayeye kawo!
Wa thighe ha were hathinda mudikwina di ha kuthimena.
9Ame ne mbo na shogherera mwaFumu,
no mbo na yumbaghuka kumaghamweno
gha ghana kureta.
10Yipo yange yoyihe, yina kuninga eshi:
“Fumu, yidye gha kara thika We,
ghokushutura hakashu kwawakangcamu,
no dye ghokushutura mukashu namuhepwe
koyu ghana kumwidha?”
11Awa ne hatunonga hoyihimadhona
wo hana kuningenena.
Kuna kunirundera, yinu yokudhira kudimuka.
12No kuniruweritha, ghuyi kughuhunga,
no hana shananga nako mwene dhokuniwana.
13Ene pa ha korwire,
na tokotire yira mughukukutu ghoyifa:
yitere yothidiro na shupatire, ho na dhirerire kuyidya.
14No mbadi na porerire pakuwaraperera,
yira mushere no mina.
Na terenganine, yira yu ghana tokotera nyina
no na kungowekire muthidiro.
15Apa no ni di mughukukutu,
yina wa roghera wo, no kuna kukununga yokukwange.
Ame ni shi dimuka eshi pathinu munye,
wa payaghure wa hakanyinya,
no ha pire mahurero.
16Eyi na kupundaghuka, awo ne dikendjo vene,
hana nimanena no kunipambeka.
17GhoFumu, mwaka munye wa kuyidhidhimeka yi?
Ghamwene moyo wange ghu shi huru kwawanu
homushedho, awa hana kunikutha‐kutha yira rwembo.
18Po mbo ni ka kutumera mumakonganeno ghomakuru,
no kukukugha kughutho wawatawi wahe.
19Wa tawa eshi wa ha dhira kukara han̂ore dhange
kupira nothinu temba,
no ha shamberere kukwange.
No wa toperera wa hana kuninyandeka nothidhimbo,
ha wane yoyiwa kukwange.
20Mbadi ha shana thiraro,
awo, kwiya noyirundera kwawanu wa hana kupara muthiraro.
21Hana yahura tunwa twawo papange,
ghuninga eshi: “Kemo, tuna yi kumonena twathinda.”
22Fumu, Owe ne wa yi mona eshi, kadi kemo.
Wa porera ghoFumu.
No wa kara kayenda nange ghoFumu.
23Ni tjinaghane, ghoNyambi wange.
Hekudyange, tende thinu kun̂ando dhange.
24Owe ne ghomuhunga.
Ni ghambwerere thiwana muyinu yange yoyihunga,
ghoHekudyange no Nyambi wange,
eshi ha pire yoyiwa papange.
25Kadi ha kuninge hathinda eshi:
“Yo twa shanine kuwana yi.”
Endi ha ninge eshi:
“Tuna thi dhongonona po.”
26Tawe eshi, waheya wa hana kushamberera kuyinyanda yange,
ha tokote no ha ndundumene.
Awa hana kunikokoka ghunyatha,
ha shwahuke no ha tjitjupe.
27Ene wa hana kuhima eshi, ha ni
hedhumune muyighamba yawo,
ha shogherere no ha shamberere.
Wa tawedhe ha ninge roruhe eshi:
“Fumu ne mukuru.
Gha kunga eshi mupikendi ne gha wane thiraro.”
28Rudimi rwange, mbadi mbo ru porera kumakurupero ghoye,
mbo na kufumaneka diyuwa no diyuwa.
Currently Selected:
Rukwaro Romiposalemi 35: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
