Rukwaro Romiposalemi 34
34
Fumu ne pepi gha kara
1Dimbo dyaDavita. Gha ka karire kwaAbimelegi, oku ghana ghundumuka. Abimelegi ne ko ka mu tjidha,
naye gha ka tundire ko.
2Mbo na kughu Fumu kehe pano,
no fuma dhendi, mbo dhina kara roruhe pamiromo dhange.
3Mbo nembera dikuto dyaFumu,
mukamaghukukutu, mbo ghana yi yuvu
no mbo ghana shamberera.
4Mwimbe pofotji nange, yoghukuru waFumu,
no tu yeyure Dina dyendi pofotji.
5Na kughererire kwaFumu, Naye gha ni huthire.
Ho gha ni kungire kuyifa yoyihe.
6Awa ha wanine ghukukutu, kuKwendi
ha dighamenine no ha sheghenyine kuyishamberera,
no mbadi ha kudhekerire kumataterero ghawo.
7Pawakakunyanda, pithange na kughererire.
Ho gha ni yuvire Fumu,
no gha ni ghamwenine muyindhivi yange.
8Muengeli waFumu, gha dhingumwetwedhire
mondameno ghendi kwawa ha karerire Fumu
no gha wa ghamwenine.
9Mwiye na mu mone, no muna kuwana eshi,
Fumu ne muhunga!
Ya rogha thikuma kwamunu yu ghana kunda kukwendi.
10Mu mu karere Fumu, amwe mwa kara wendi!
Mukakumukarera, mbadi ghana kunyanda.
11Ngambi nyime naye kukara ghuhepwe
no ghana kufa ndhara.
Ene wa hana kukumbera maghamweno ghaFumu,
mbadi hana kupira ko kanu kuyinu yoyiwa.
12Mwiye hanuke, mu tegherere kukwange!
Na haka kumuhonga eshi,
ngepi di ghokukarera Fumu.
13Oyu gha haka moyo,
no kurumbera kupara rure, mukudjabwana yoyiwa,
14gha shinge rudimi rwendi kughupata
no miromo dhendi kumbango.
15Mu yakunuke kughupata, no mu tende yoyiwa,
gho mu shane thiraro no kuthikutha!
16Fumu, gha kenga kwawahunga
no gha tegherera kuyikumbera yomaghamweno ghawo.
17Hapata ghana kuwemanena,
no kuharan̂anya yighayadhara yawo yopamuve.
18Ngeshi ha rombo hahunga maghamweno,
ghana kuwayuva Fumu
no ghana kuwaghamwena muyikudhekera yawo yoyihe.
19Fumu ne pepi gha kara nawakakutokota
no gha ghamwena hakakutamangera.
20Ngambi ha di mu wana muhunga dihudhi dyokukuma papi,
ghana kumughamwena Fumu kuyoyiheya.
21Fumu, gha kunga yirama yoyihe yamuhunga:
22Ghupata ghu hana kutenda hakakushwena Nyambi,
mahurero ghawo hana kutenda:
no yi ghana kutenda kwawan̂ore dhendi
no kwawahunga, gha yi kure ndani.
23Fumu ghana kutenda mukeya kwawaka‐kumukarera.
Oyu ghokunda kuKwendi, mbadi mbo ha
mu tenda yira mukamurandu.
Currently Selected:
Rukwaro Romiposalemi 34: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
