Rukwaro Romiposalemi 31
31
Manako ghange ne munyara dhoye
1Kwamwimbithi. Mupisalemi waDavita.
2Hekudyange, kuKoye na kunda me.
Wa tawa eshi, ni kare mughukukutu!
Ni shuture yoyishi ghomuhunga.
3Ni tegherere, no ni ghamwene wangu.
Kare ghodiwe dyomatjirero ghange,
no dirundu dyomaghamweno ghange.
4Shemwa, Yowe diwe dyange no dirundu,
dyomondo ghange.
Padikuto dyoDina dyoye, mbo ghuna ni
piterera kughutho no kuniyenditha.
5Ni shwaghithe mudikwe di ha ni tegha,
yoyishi Yowe matjirero ghange.
6Munyara dhoye na kutapa moyo wange,
yoyishi Yowe ghuna ni shutura,
Nyambi ghomatjimapero no Hekudyange.
7Name na dhimba hakakukununeka,
awa ha kara yinu vene,
ho na paka makurupero ghange mwaFumu.
8Na shana kuyumbaghuka no kushogherera,
kuruhakitho roye romakurupero:
Owe ne mbadi wa tokomenine koyi ya ni tjitjupithire,
wa monine vene eyi ha pambekire kumoyo wange,
9no mbadi wa ni tapire mungcamu dhamukan̂ore dhange.
Dyango dyomukeya vene wa ni pire.
10Ni fere n̂eke ghoFumu, yoyishi
mukunyanda ni di.
Meho ghange ne ghana kasha kuyitokota,
kemo yoyiheya yi, mumwange yi di.
11Moyo wange ne ghuna yongara kuyitokota,
no myaka dhange ne dhamaghukukutu.
Pamurandu ghoyinyanda, dhina hayaghuka ngcamu dhange,
no kwan̂itha yirama yange.
12Ame ne nothisherera thawan̂ore dhange,
thikuma ne kwawakamaparaghumbo.
No muyapi wawadimuki wahe.
Awa hana kunimona mumikara, hana kutjira.
13Napwa kuvurama, yira kare nafa,
ho na pitura yira thinu tha kashama,
no tha hoghoroka.
14Kokayenda na kuyuvera matungwero ghange,
eyi kumitara dhodhiheya yi di.
Hengi hana kuniman̂anyena
no kutenda dighano dyokunipaghitha.
15Ene paPoye na kurupera ghoFumu,
ho na kuninga eshi: Yowe Nyambi wange.
16Manako ghange ne munyara dhoye.
Ni ghamwene munyara dhawan̂ore,
no dhawakakunikutha‐kutha!
17Hokoke kumaghamweno ghange,
ni ghamwene muruhakitho rokupira thimweya.
18Wa ni shwahura ghoFumu,
pakukugherera kuKoye me.
Awa ha kushwena, wo ha kona kushwahuka,
no kuwaporeritha mwawafu.
19Porerithe hakambango,
awa hana kukara muyaya kwawahunga no kuwanyatha.
20Ngepi keho ghukuru ghoghuhunga
ghu wa pungwera, hakakukukarera,
oghu wa neghedha mumeho ghawa hana kunda mumoye.
21Ghuna kuwaghamwena oku ghudi po,
kumanungero ghawanu.
Owe ghuna kudhinda awa ha wapa murandu.
22Mu kughe Fumu,
yoyishi ghana ni neghedha makurupero,
payitenda yothitetu, yira pa na karire mumbara dhoyita.
23Muwoma wange na ghayarire eshi:
Yina ni wana keho me, yoyishi Nowe
ghuna ni mwagherera.
Ene shemwa, makuhemo ghange ne wa gha yuvire,
apa na kumberire maghamweno.
24Mwaheya mwe muna kuvighara yaFumu,
mu neghe ruhakitho rwenu kuKwendi!
Fumu ne kughamwena wa hana kumukurupera,
ene wa hana mwiman̂anyena,
ghana kuwahumbitha thikuma.
25Yodigho, mu tanare ne no mu kare noghudhughutjima,
mwaheya mwe mwa paka makurupero mwaFumu.
Currently Selected:
Rukwaro Romiposalemi 31: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
