Rukwaro Romiposalemi 25
25
Ni dimukithe mayira ghoye
1WaDavita.
GhoFumu, kuKoye na kuthighuka me,
2paPoye na kutjimapera ghoNyambi wange
wa ni fitha honyi,
no wa tawa eshi, ha shogherere han̂ore
dhange koyi yina ni hokokera.
3Mbadiko yu ghokupaka makurupero mumoye,
gha wane dishamu.
Awa hokuswhena kukurupera mumoye,
hana kuwana dishamu.
4GhoFumu, ni dimukithe mayira ghoye,
no ni honge mayira ghoye.
5Tawe eshi, ghushemwa ghoye ghu ni yendithe
no ni kuhongere mo,
yoyishi, Yowe Nyambi wange no mughamweni wange.
Mumoye na kupaka kehe diyuwa mataterero ghange.
6GhoFumu, vuruke kuruhakitho no makurupero,
eyi wa neghedha roruhe.
7Wa ndhundha kumaharwero no kughuyi wange,
ghokutunda kuwanuke wange.
GhoFumu, ni vuruke mumatjimapero,
yoyishi ghomunongo.
8Fumu ne munongo no muhunga:
Thinda ghana kuneghedha hayiharuri ndhira,
9no kuhokwera hakakupira maghamweno ghuhunga,
no kuwahonga ndhira dhendi.
10Ruhakitho no matjimapero, ghomayira ghokuyenda Fumu,
pofotji nawa ha kunga ghundambo no miragho dhendi.
11Hekudyange, pamutja ghoDina dyoye,
ni thigherere maharwero ghange,
yoyishi makuru.
12Ngeshi ha karera ghumweya Fumu,
ghana kumuhonga eshi,
ndhira munye sho gha torore,
13kemo sho gha wane yoyiwa, yi mbo yi mu roghera,
nawanahoka wendi mbana tungu ditunga.
14Fumu, gha tumbura hakakumukarera mumatjimapero,
no ghana kuwadimukitha ghundambo wendi.
15Roruheya na kukambeka meho ghange paFumu,
yoyishi, yo gha kushwaghitha mapadhi ghange mudikwe.
16Ni thetuke ghoFumu, no ni fere n̂eke,
yoyishi mudingoshi ni di, no napu kumwagha.
17Mukunyanda kokukuru ni di,
ngo ni shuture kutjitju dhange.
18Mone vene eshi, ngepi di nidi mughuyi,
no ngepi di na kuwana ghukukutu.
Na kanderera, ni thigherere maharwero ghange ghomahe.
19Mone kuwingi wawan̂ore dhange ne,
no ngepi di hana kunidhimba thikuma.
20Ni kunge no ghu ni ghamwene,
wa tawa eshi ni shwahuke,
yoyishi kuKoye na kunda me.
21Mumoye na kupaka makurupero ghange,
eshi mbo ni kunge mukupira murandu no mughuhunga.
22GhoNyambi, ghamwene Isragheli
muyinyanda yendi yoyihe.
Currently Selected:
Rukwaro Romiposalemi 25: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
