Rukwaro Romiposalemi 18
18
Nyambi keho yo gha kona kuwitha
1Kwamwimbithi. Dimbo dyaDavita ghomupika Fumu.
Man̂ando gha gha pakire
po kwaFumu, mudiyuwa di
gha mu ghamwenine Fumu kungcamu dhawan̂ore dhendi,
no kungcamu dhaSaghulu.
2Gha ningire eshi:
Na kuhaka thikuma ghoFumu, Yowe ngcamu dhange.
3Fumu ne mondo ghange, no mughamweni wange,
no dimbarawe dyange,
Nyambi wange, dimbarawe dyange, mondo ghange,
thiteve thange no mushuturi wange ghongcamu,
thundo thange thokutanara.
4Ngambi ku hana ku ni sherera,
na kukugherera kwaFumu,
shemwa ghana kunishutura kwawan̂ore dhange.
5Mighodhi dhokufa, dhina ni ghama,
mupoposhero ghoyinyanda ne ghuna ni tutukwitha.
6Menge ghawakamwishi, ghana ni kwata,
no yiraha yokufa, yina ni kokerera.
7Mukunyanda kwange na kukugherera kwaFumu.
Kemo, maghamweno na kukugherera kwaNyambi wange.
Aye ghana kuniyuva mumarombe ghendi yikugherera yange,
no ghana kutegherera edi na kukugherera maghamweno kuKwendi.
8Muve wa kin̂in̂e no wa tutumine
mathina ghomarundu, gha kan̂ine no gha kin̂ine,
yoyishi gha patire.
9Mumayuru ghendi mwithi wa shwaghire mo,
no mudiro ghomukanwa kendi, wan̂ithire yoyihe,
mwimi dhendi ne makara ghokwekeshera.
10Gha tombire diwiru no gha shurukire,
makokore ne kumapadhi ghendi gha karire.
11Ha dhini Kwendi pamuengeli no gha tukire,
mando ghendi ne ghambire kumupepo.
12Ko kukufika kwendi mudikokore,
no meyu ghodivundundu noruvuyi ne makungambwero ghendi.
13Pakutwedhima Kwendi, gha ngambwathanine mavuyi,
ho dha rokwire mbwe no mushoro.
14Eyi ne gha yi dikitithire Fumu mudiwiru,
naMukakupiterera, gha yuvithire diywi dyendi
mumbwe no mumushoro.
15Gha kondhire disho dyendi,
no gha haran̂anyine han̂ore,
no gha tjidhire hengi pofotji nawo nomushoro.
16Rundanda rodikuruviya, rwa tjimbukire,
ndhama dhomuve dha kambukire,
yoyishi wa wandukerire nodingundunga dyoghupata ghoye.
17Ko kughonyonona nyara dhendi kutunderera
kudiwiru gha ni koke,
no kunitupurura mumangumbi.
18Ho gha ni komononine kwawan̂ore dhange,
wa ha karire nongcamu,
nawakakunidhimba wa ha karire nongcamu kukwange.
19Diyuwa di ha ni mbandukerire,
kufa kwange ne pepi kwakarire,
ene Hekudyange, gha ni kungire kuyinu yi.
20Ko kunishwaghitha Kwendi kumukeya ghoghuyaghayu,
no kunikomonona yoyishi gha ni hakire.
21Ghuhunga wendi, gha ghu ni hokwerire Fumu,
gho gha tendire nange yoyihe yoyishi,
na pira murandu.
22Karo, yoyi ame ne na kwatire miragho dhaFumu,
no mbadi na harurire kwaNyambi wange,
23muyiraghura yendi yoyihe na yendaghurire,
no mbadi gha ni horekire yihokora yendi.
24Na karire muhunga kurupara Rwendi,
no na konekire kuthothiheya thi gha shwena.
25Fumu gha ni hokwerire ghuhunga wendi,
yoyishi na pirire murandu mumeho ghendi.
26GhoFumu, owe wa negha matjimapero kwawahatjimapa,
no ghuhunga kwawahunga,
27ghukushuki, kwawakushuki,
mukadifurumeko ne ghuna kumumwagha.
28Diko dyokutokota, ghuna kudikomonona,
no ghuna kumbirupitha hakadihuna.
29Hekudyange, sheghenyithe munyenge wange,
Nyambi wange, nipe thishe oku nidi mudikokore.
30Pamaghamweno ghoye,
na ndandumukera hamweya wingi wawo.
Ho na kutjakaghuka naNyambi wange mughumbo ghombara.
31Ethi gha tenda Nyambi, tha rogha,
no thi ghana kuninga, tha kena.
Kehe yu ghokushana mondo kukwendi ghana kumughamwena.
32Shemwa, yidye gha kara eshi Fumu gha kare Nyambi?
Yidye gha kara diwe yira Nyambi wetu?
33Nyambi ne gha ni dhingera nongcamu dhendi,
Aye gha roghitha ndhira dhange.
34Mapadhi ghange, gha gha pituritha kungurungu,
ho gha ni tanaritha payikanduko.
35Gha honga nyara dhange kuyita,
no moko ghange kukunyama miko dhodhikukutu.
36Makomweneno gha wa ni retera,
agha gha ni kunga,
rudyo roye ne ghomaghamweno ghange,
pamaghamweno ghoye po na wanena ngcamu me.
37Wa ni pa matjakukero ghomayaghayu,
no mangongotji ghange mbadi gha ghomoka.
38Na kuthire han̂ore dhange kate kuwawana,
mbadi na thighukire oku mbadi hana fererera.
39Ghuhunga na wa thaghurura,
eshi ha dhire kwimana karo.
Kumapadhi ghange ko ha nan̂enena.
40Hekudyange, nongcamu dhoye wa ni dhingera kumarwanamvo,
ho wa tjidhire hanyathi kughutho wange.
41No wa finyaghukithire han̂ore dhange
po na konenine kupagha hakakunidhimba wahe.
42Nawo maghamweno hana kwitha,
ene mbadiko yu ghokuwaghamwena,
nawo kwaFumu hana kwitha,
ene mbadi ghana kuwahutha.
43Na kuwadyadyangedha yira rukungu kumupepo,
ho na wa yupu yira matapa mumikara.
Kemo dyo na wa thaghurura.
44Wa ni ghamwena kwawakakuniman̂anyena,
no wa ni paka mukuru kumarudhi ghomagenda.
Ho dina ni ghovamena diko di na dhirire kudimuka.
45Kehe yu gha ni dimuka, ghana ku ni yuva.
Hakamatunga, kukwange hana kukokawa.
46Hamweya kushwagha hana kushwagha muyundo
yawo, ha kuhokore kukwange.
47Fumu ne muyumi, na kumukugha yoyishi yodiwe dyange.
Na kukugha Nyambi wange yu gha ni shutura.
48Mawithero ne Nyambi gha gha ni pa.
No gha rawera mako gha ni tongamene.
49Gha ni kunga kwawan̂ore dhange.
Ghuhunga, Owe mbadi wa tawa eshi ha ni
kwate hakakuniman̂anyena,
gho wa ni shutura kwawakanyinya nange.
50Gho Fumu, payinu yi na kukufumaneka kughutho ghomarudhi,
no na kukwimbera mupisalemi ghofuma
kudikuto dyoDina dyoye.
51Yodiye Yu, yo gha tapire mawithero kwafumu wendi
no gha neghedhire ghundambo ghomakurupero
kwaYu gha wethire,
eshi Davita no kwawanahoka wendi kuroruheya.
Currently Selected:
Rukwaro Romiposalemi 18: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
