Rukwaro Romiposalemi 17
17
Ndapero dhamukakupira murandu yu ha kuthakuthire
1Ndapero dhaDavita
Hekudyange, tegherere kuyighamba yange yoyihunga,
yuve thiwana kuyikumbera yomaghamweno ghange.
Niyuverero ndapero dhange,
edhi na kutenda mughuhunga ghoghuhe.
2Owe mbo ghuna rikanyitha mumaghamweno ghange.
Meho ghoye,
ghana kumona roruhe ghothinda
yoyihunga.
3Ngeshi ngo ni yereke,
ngambi ho ni rondonona muturo,
no kunifukunya thiwana
ngo mbadi sho wane thothimango.
4Ko yi ha tenda hanu,
mbadi na ghamba ko yoyimango.
Ame ne marawero ghoye na kwata.
5Kehe kanaro kange ne katanarera
momu wa ni neghedhera.
Mapadhi ghange ne, mbadi gha hambuka mo.
6Kukoye na kukugherera ghoNyambi wange,
yoyishi mbo ghuna ni hutha!
Tegherere kukwange no yuve yi na kughamba.
7Ni neghedhe makurupero ghoye, ghothitetu
Owe wa ghamwena waheya pakuwondeka kwawan̂ore dhawo.
8Ni ghamwene yira dinona dyodiho dyoye,
ho nundeke mumumvure ghomando ghoye,
9kwawanu hohamango awa hana kushana,
kunimbandukera,
no kwawan̂ore hokupagha,
awa hana ni
dhingumwetwedha.
10Kupira nothinyandekitha,
kununeka hana kukununeka ghughamba yinu,
11awo ku ni dhingumwetwedha kokuhe ku na kuyenda
no ha shana ku ni dhongonona vene.
12Ha kara yira nyime yu ghana kwinduka kukukwata thinu,
no yira nyime yu gha nondamena.
13Wiye ghoFumu no wa tetere,
no wa pambeke ha kuvame.
Ni ghamwene nodimende dyoye kungcamu dhawanu hohamango.
14GhoFumu, ni ghamwene nonyara dhoye kwawanu wa.
Hafe no kudimukera temba, manithe moyo dhawo,
no wekutithe noyinyanda,
eyi wa wa turekerire,
no ha turekere ko hanawo yokurikanya,
no kuturekera ko shime hana wawanawo.
15Ene kukwange,
mbo nemana kughutho ghoye,
yoyishi ghuhunga ne kumutara wange ghu di.
Mbo na shamberera pakupinduka kwange,
oku ghu di po We.
Currently Selected:
Rukwaro Romiposalemi 17: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
