Haheburayi 9
9
Diyugho dyopamuve nomiyambo dhamo
1Ghundambo ghoghukuru‐kuru, wa karire no yikarera nodiyugho dyopamuve. 2Tende ghoghundambo, ghapwire kutenda ngeno, ngonda dhokughutho edhi ha tire eshi dhokupongoka, mwa karire yikora yomashera notishi ghomaghuroto ghomuyambo. 3Munyima dhongonda dhoghuwadi, ha toyire mo eshi dyango dyokupongoka thikuma.
4Amo mwa karire thinyaku thomangondo ghothiwe mwene thomuyambo nodimbangu dyoghundambo, edi dyapwire kuyenga mitara dhodhihe nomangondo. Mudimbangu di mwa karire kandimbe komangondo nomana mo nomutagha waAroni oghu wa hokire nomawe ghomayarara nomuragho ghoghundambo po. 5Peghuru dhodimbangu, pemanine hakerubimu muthishe thaNyambi, nawa hambire mando ghawo kumuhuko ghomashemwithanitho. Kuyinu yi mbadi twa kona kuyithothonona karo shime. 6Thika di yapwire kuroghitha, hapristeri nga hengenanga kehe pano mungonda dhokutangerera dhoghundambo ha karughanene mo. 7Ene mungonda dhomunyima, hapristeri hohakuru pithawo nga hengenango mo. Ayo ne nga yikaranga rofotji mumwaka. Ene mbadi papirire manyinga ghokukuyambitha hathinda no diko kumirandu dhawo dhishidimukera. 8Mupepo ghoKupongoka gha tjwathanitha pano eshi, thero dhongonda dhokupongoka mbadi dha kona kuyandhuruka, oku shime dha karera po shime ngonda dhotende ghoghundambo ghokutanga. 9Yoyiheya yi, ndupu dhomunako dhon̂anyin̂anyi yina kutuneghedha. Yitapa yomuyambo nomiyambo dhokupagha kuyamba hana kuyiyamba, ene mbadi wa kuthotera ko oyu ghana yi tupura. 10Yoyishi ayo ne ya tamba kuyidya no kuyinwa no kumihingo dhokukutjaka dhomaghukushuki. Edhi ne miragho vene dhopathinaghunu ha paka po. Dhi kare po kate mbo dhiye nako edhi mbo gha paka po Nyambi yikara mwene. 11Ene Kristusi kare gheya, Aye ne Mupristeri Shokuru, ghoyitenda yoyiwa eyi yidi po pan̂nyi‐n̂anyi. Aye mukareri ghotende dhoghundambo dhokupiterera, no dha yara, edhi gha dhira kutenda munu. Kuninga eshi, mbadi dhopakaye kano. 12Mutende dhokupongoka dhi, parofotji ghengenine mo Kristusi nomanyinga ghendi thinda, mbadi nomanyinga ghon̂ombo no ghomandana temba. Kuninga eshi, gha rikanyithererire makomweneno ghororuheya. 13Ene apa ha kashire hakakupira ghukushuki nomanyinga no ghomandwedho no‐mututwi ghomandema, ha kushukire shemwa. 14Parungatji ne keho sho gha tu kushukithe Kristusi, kuyighayara yoyitenda yetu yokututwara kukufa eshi, tu kone kukarera Nyambi ghomuyumi. Payinu yi po gha karerire thinda Kristusi muyambo ghokuyara paMupepo ghoKupongoka pakukuyamba kwaNyambi.
15Yodyigho, Aye ne yokatji koghundambo ghoghupya. Aye gha fire mukukomonona hanu maharwero ghawo, kughutho ghoghundambo ghoghukuru‐kuru eshi, awa hapwa kwitha mbo ha kone kuyora maturekero ghororuheya. 16Eyi ne ya kara yira mbapira dhondhangho: Karo ya kona kunegha eshi mukandhagho ne ghafa. 17Yoyishi ndhagho dha kona kukara pathinamuragho pakufa yu gha dhi raghire. Ene dho, mbadi dha kona kukara nongcamu oku thinda yu gha dhi raghire shime muyumi. 18Yo ha pakerire po ghundambo ghoghukuru‐kuru nomanyinga. 19Apa gha manine kuyuvitha Mosesi yomumiragho dhodhi, gha tumburire manyinga ghomandana no ghon̂ombo pofotji nomeyu, nodifuno dyodikihu gha katjakeritheko mbapira dhomuragho nawanu wahe, 20no gha ningire eshi: “Agha ne ghomanyinga ghoghundambo oghu gha mu pakera po Nyambi.” 21No tende dhoghundambo nadho no yoyiheya eyi nga ha rughanithanga muyikarera, nayo yapwire kutjakera karo nomanyinga pamuhingo ghofotji. 22Popo, momu yikushukerere yinu yoyihe nomanyinga thika di wa ghamba muragho. Karo ngo mbadiko manotwero ghomanyinga, ngo mbadi pa karire mathigherero ghomaharwero.
Kristusi ne yomuyambo ghokuyara
23Yinu yopamuve, mapituritho vene ghoyinu yomudiwiru, no po ya nyandera yikushukitha yino. Ene yomudiwiru, ya kara nomiyambo dhokupiterera yino. 24Kristusi, mbadi ghengenine mundhugho dhokupongoka, edhi ha tendire hanu dhothitemununitho thoghushwemwa. Mbadi kemo. Aye ne mudiwiru ghengenine thinda gha kakuhokore kughutho waNyambi pan̂anyi‐n̂anyi pamurandu wetu. 25Aye mbadi ghengenine mo kukukuhukuruka kukuyamba thinda, thika di ghengenangire mupristeri shokuru kehe mwaka kungonda dhokupongokerera nomanyinga agha gha dhira kukara ghendi thinda. 26Ngo kemo, ngo gha nyandire Kristusi rwingi pakare kutunda kumatangero ghokaye. Ene pano, rofotji vene gha hokokire na gha tundithe maharwero pamuyambo wendi kate paghuhura ghokaye. 27Munu ne ha mu himena mukufa parofotji, munyima ndani ghana kwiya matetero. 28Kemo dyo ha yambire karo Kristusi parofotji mukutunditha po maharwero ghawengi. Ngo gha hokokire karo paruwadi, ngo mbadi gheyire kukutunditha maharwero. Ene, ngo makomweneno gha retire kwawo ha mu taterera.
Currently Selected:
Haheburayi 9: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
