Haheburayi 8
8
Mupristeri Shokuru ghoghundambo ghoghupya no ghoshemwa
1N̂ando dhodhikuru edhi twa ghambanga ne dhino eshi: Atwe twa kara noMupristeri Shokuru, yofotji Yu mbo gha kahungumana kurudyo rodipuna dyoGhufumu mudiwiru. 2Aye mukareri ghoyinu yokupongoka, ndhugho dhotende dhoghundambo ghoghupya edhi gha shokekire thinda Nyambi kadi munu. 3Kehe mupristeri shokuru, ha mu paka po mukutupura ndupu no kuyamba miyambo. Yodigho ne Oyu yofotji, gha kona naye kukara nothinu thokutupura. 4Ngo gha karire shime pano pamuve, ngo mbadi gha konine kukara mupristeri. Yoyishi mukukutha muragho, hapristeri ha kara po mukuyamba yitapa. 5Awo ha karerire vene thitjwandjo no mudhidhimbi ghoghutungi ghokupongoka ghodiwiru. Apa gha wanine Mosesi matawedhero ghoghunyambi ghokushokeka tende ghoghundambo. Nyambi gha ningire eshi: “Koneke no rughane yoyihe thiwana thika di na kayikuneghedhire padirundu.” 6Ene pan̂anyi‐n̂anyi, Kristusi ne ghana wana thirughana thoghupristeri thokupiterera, pamurandu ghokuninga eshi, Aye ne ghana kara katji koghundambo mwene oghu wa kara pamaturekero ghoshemwa.
7Ngo mbadi yapirire po yimweya paghundambo ghokutanga, ngo mbadi ha nyandire po karo ghundambo ghoghuwadi. 8Ene Nyambi gha humbithire diko kughukashu wadyo pakuninga eshi:
“Mu mone, mbo gha neya mayuwa,
dyo ghana kuninga Fumu,
apa mbo ni nunga mughundambo ghoghupya ndhugho
dhaIsragheli nondhugho dhaJuda.
9Ghundambo ghoghupya mbadi mbo ghu kara yira ghu
na kupakererire nawanyakudyawo
mudiyuwa di na wa kwatire padyoko
ni wa tundithe muEgiptena,
yoyishi mbadi ha hakire ghundambo wange,
name ho na wa mwaghererire,
dyo ghana kuninga Fumu.
10Oghu no ghoghundambo ghu na
na shanine kupakerera pofotji nondhugho dhaIsragheli,
munyima dhomayuwa gha,
dyo ghana kuninga Fumu eshi:
Mbo na paka miragho dhange mumaghano ghawo,
no mbo na dhitjanga mumitjima dhawo;
Ame mbo na kara noNyambi wawo,
nawo mbana kara hadiko dyange.
11Po mbo gha dhira ghumweya kuhonga muyendhendi
ngambi kwawendi eshi:
‘Dimuke Fumu.’
12Waheya mwanuke nomukuru, mbo hana ni dimuka.”
13Mukughamba kughundambo ghoghupya, Nyambi gha tjwathanithire pakutanga ghundambo ghoghukuru‐kuru, oghu wa kurupara no wapira mudyo no kuharan̂anya wangu.
Currently Selected:
Haheburayi 8: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
