Haheburayi 10
10
Miyambo dhoghundambo ghoghukuru‐kuru
1Muyambo ne wa kara vene mudhidhimbi ghoyirughana yoyiwa, eyi mbo yiya kughutho. Ene yinu yi mbadi yaghushemwa. Roruhe tunda mwaka yenda mwaka, ha yambanga miyambo dhorudhi rofotji. Keho ne muragho mbadi wa kona kuwayarithera, awa ha yirughana eshi ha kushuke kumaharwero. 2Ngo ha wa kushukithire parofotji awa nga ha yambanga miyambo, ha dhire kudimuka yiharura yawo, ngo dha shaghire miyambo dhi ha yambire. 3Ene pano maharwero ghana kutuvurukitha kehe mwaka kumiyambo. 4Yoyishi manyinga ghomandwedho no ghon̂ombo, mbadi wa kukona kutunditha po maharwero.
5Yo gha ningirerire Kristusi apa gheyire mukaye eshi:
“Oghu ne mbadi muyambo ghokupagha no ghoyidya,
oghu wa dhirire kuhaka We,
ene yirama yange yi wa nipire.
6Miyambo dhokukon̂erera nomiyambo dhomaharwero,
mbadi wa dhi menyamenyenine!
7Ko kuninga kwange eshi:
‘GhoNyambi, Ame ne neya,
kukutenda mahimeno ghoye.
Thika di ha yi ni tjangera mumbapira dhomuragho.’ ”
8Pakutanga gha ningire Ye eshi: “Miyambo dhokupagha no dhoyidya nomiyambo dhokukon̂erera no dhomaharwero, Owe ne mbadi wa dhi hakire no kudhimenyamenyana temba.” Ngambi kenge dha karire pathinamuragho. 9Munyima gha ningire eshi: “Mone, Ame ne neya kukutenda mahimeno ghoye.” Popo Nyambi gha tundithire po miyambo dhokutanga, no gha pakire po muyambo ghumweya. 10Yoyishi, Nyambi gha himine kutupongwera kuKwendi, apa gha yambire Kristusi yirama yendi parofotji no kuroruheya.
Muyambo waJesus Kristusi
11No karo, kehe mupristeri ghemana muyirughana yendi kehe diyuwa muyirughana yendi yoghukareri no gha yamba kehe pano, miyambo dhorudhi rofotji, dhokudhira kukona kutunditha po maharwero. 12Ene Jesus Kristusi, gha yambire muyambo parofotji kumaharwero no gha hungumana kehe pano, kurudyo rwaNyambi. 13Oku ghana kataterera kate mbo gha withe han̂ore dhendi. 14Pamuyambo ghofotji ghu, po gha kushukithire kumaharwero awa hapwire kupongwera kwaNyambi kuroruhe.
15Mupepo ghoKupongoka, naye kunongwenena ghana kuyitunongwenena. Pakutanga kuninga ghana kuninga eshi:
16“Oghu ne ghoghundambo ghu mbo ni nunga nawo
munyima dhomayuwa ghokughutho,
dyo ghana kughamba Fumu.
Ame, mbo na paka miragho dhange mumitjima dhawo,
no mbo na yitjanga mumaghano ghawo.”
17Shime ha ningi karo kughutho eshi:
“Kumaharwero ghawo no kumaghuyi ghawo
mbadi mbo ni vuruka ko nokamanana temba.”
18Yoyishi, apa pa kara mathigherero, mbadi pa nyanda shime miyambo.
Tu yende noghutjimapa kwaNyambi
19Mwayendhange, apa no tuna wana keho thero thomukeya thokwingena mundhugho dhokupongoka, pamurandu ghomanyinga ghaJesusi. 20Edhi ne ndhira dhodhipya dhokututwara kumoyo. Ndhira dhino gha dhi tu yandhwerera pathifikitho thoyirama yendi. 21No oku shime twa karera Nendi eshi yomupristeri Shokuru ghondhugho dhaNyambi, 22mu tu henyene kwaNyambi nomitjima dhodhihunga, nomatawero ghokuyara. Mitjima dhetu dhapwa kukushukitha roruhe kumakurembwerero ghomayi, noyirama yetu yapwa kuyogha nomeyu ghokupira nyata. 23Tu tanare keho thikuma kumakurupero ghoyi twa nongonona. Yoyishi Nyambi ne yomakurupero. Aye gha tenda eyi gha turekera. 24Natwe karo tu kuthigherere pakukutjokedha kuruhakitho, no kuyitenda yoyihunga. 25Atwe mbadi twa kona kupira pamakonganeno ghombunga dhawakriste, thika di ha yitwayera hamweya. Ene thikuma tu kutjokedhe pakuyenda ko, oku muna kumona eshi diyuwa dyomatetero ne dina kokera.
Nyambi ne kuhumbitha mirandu dhoghuhima
26Ngeshi ha tu harura ghuhima, oku twa wana yidimuka yoghushemwa, mbadiko keho muyambo ghokukona kudhongonona maharwero ghetu. 27Apa ne pa kara vene mataterero ghoyindhivi yomatetero nodirara dyokwekeshera, edi mbo dyan̂itha hakan̂ore dhaNyambi. 28Ngeshi ghumweya ha reghi muragho waMosesi, no ha kara nawatunonga hawadi ngambi hahatu hokutanaritha yi, kadi wa kumufera n̂eke, kumupagha vene. 29Ngepi di muna kughayara mwe, eshi mahumbithero munye mbo gha wana munu ghokunyatha Mwana Nyambi, nomanyinga agha gha mu pongokithire munu yu no kushamuna Mupepo ghothin̂eke? 30Atwe twa mu dimuka Oyu gha ghamba ngeno eshi:
“Ame ne na kara nongcamu dhokuhumbitha,
Yame mbo ni thigherera.”
No shime eshi:
“Fumu, mbo ghana tetera diko dyendi.”
31Ene dihudhi thikuma kuwera mumoko ghaNyambi dhomuyumi.
Ghudhughutjima ghomumatawero
32Mu vuruke kumayuwa ghopakare‐kare, apa gha mu kumithire Nyambi kuthishe. Eshi ngepi di mwa karire muyita apa mwa nyandire thikuma. 33Mumanako ghaya mwa karire payinyanda yokumushamuna, no kumukutha‐kutha pakumusherera thitunumeho, no parumweya mwa nyandire, yoyishi mwa kuvungire nawamweya awa ha parire kemo. 34Amwe ne mwa tokotire pofotji nawakan̂otwa. Ene apa ha mu kungurire ghutungi wenu, mwa yitawire noghushamberera. Pakuninga eshi amwe ne mwa dimukire eshi mwa kara noghutungi mwene ghushipu. 35Yodigho amwe, mbadi mwa kona kumwagha makurupero ghenu ghomatawero. Yoyishi agho ne gha kara nondjambi dhodhikuru. 36Amwe ne mu dhidhimeke muyoyihe eyi mwa nyanda pakutenda mahimeno ghaNyambi, no mbo muna tambura eyi gha mu turekera.
37“Yoyishi shime kapupi kamanana
no Yu ghana kwiya,
mbo gha neya ene mbadi gha kurangapa.
38No yu gha wana ghuhunga pamatawero ghomuMwange,
mbo ghana para,
ene ngeshi ha huka munyima,
Name karo mbadi mbo ni mu thotera.”
39Ene twe, mbadi twakakuhuka munyima no kuyongora, mbadi kemo, atwe ne twa tawa no mbo tuna para.
Currently Selected:
Haheburayi 10: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
