Haheburayi 7
7
Ghuhunga ghoghupristeri waMelgisedeki wa piterera waAroni
1Melgisedeki ne gha karire fumu waSalemu, nomupristeri waNyambi Shokuru. Aye yo gha hanganine Abrahamu no gha mu kandadhekire, apa gha karire Abrahamu mundhira dhokuhuka, munyima dhokawitha hafumu. 2Yodigho Abrahamu gha mu pire yopadikumi payinu yoyihe, eyi gha ka kungurire muyita. Dina Melgisedeki dya ninga pakutanga eshi: fumu ghoghuhunga. Karo naye gha karire fumu waSalemu, kuninga eshi: fumu ghothiraro. 3Kukwendi ne mbadiko yithimwetwedha yokwawihe no kwanyina, ngambi kwawakerekandongo wendi ngambi yomatangero nomahurero ghomoyo wendi. Aye gha pitura yira Mwana Nyambi no gha kara mupristeri kuroruheya.
4Mu mone, eshi ngepi di gha kara mukuru yu murume. Oyu gha pire Abrahamu ghokerekandongo, yopadikumi payinu yoyiwa eyi gha ka kungurire muyita. 5Mukukutha muragho hapristeri homudira dyaLevi, ha karire nongcamu dhokuruweritha diko yopadikumi, kuninga eshi kwawayendhawo awa ha karire hanahoka waAbrahamu thika wo. 6Ene Melgisedeki oyu gha dhirire kukara mukadira dyaLevi, gha tumburire yopadikumi kwaAbrahamu, oyu gha pire Nyambi matoyedhero no gha mu kandadhekire. 7Eyi ne ya pira matamangerero eshi, mukuru yo gha kona kukandadheka kehe pano mwanuke. 8Hapristeri hoHalevite ha karire hanu hohafu, awa ha kongwedhanga yopadikumi. Ene Melgisedeki ha mu nongonona eshi aye ne muyumi. 9Munu gha kona kuninga karo eshi, Levi oyu gha kongwedhangire yopadikumi mudina dyaAbrahamu, yo gha tapire karo yopadikumi kwaMelgisedeki. 10Yoyishi oku nongayaro temba Levi apa ha kuhanganine haMelgisedeki naAbrahamu.
Kristusi noghupristeri waWalevite
11Mukutwara mughupristeri waWalevite, diko ne dya wanine muragho. Ngeshi ghupristeri ghuno ne wa rikanyenine mo, pashanye karo ha nyandera mupristeri ghumweya gho yikara yira yaMelgisedeki, eshi ha mu pake po. No dye yu ha ninga eshi aye ne mbadi wa kukara mupristeri yira yikara yaAroni? 12Ngeshi mbo peye mupristeri ghumweya, nomuragho nagho mbo ghuna piraghuka karo. 13Ene oyu hana kutongwera yinu yino, mukadiko dyadyo‐nadyo oyu gha dhirire kukarera panganyi yokuthinyaku. 14Eyi ne yapwa kudimuka kokuhe eshi, Hekudyetu ne mukadira dyaJuda. Ene yi ya kundamine kudiko di, mbadi, gha ghambire ko Mosesi yokukundama kughupristeri. 15Yinu yi yina rogherera thiwana eshi, pa kwiye mupristeri ghumweya, ghokupitura yira Melgisedeki. 16Aye mbadi mbo gha wana ghupristeri wendi pangcamu dhomuragho no kumahimeno ghodiko dyendi. Ene pangcamu dhomoyo ghokudhira kupwa. 17Aye ha mu nongonona eshi:
“Owe ne ghomupristeri kuroruhe
muyikaritha yaMelgisedeki.”
18Muragho ghopakare‐kare, wapwa kutunditha po. Yoyishi wapira ngcamu no wapira mudyo: 19nomuragho ghu, mbadi wa rikanyenine mo. Kumutara ghumweya wa retire makurupero mwene, agha gha tu kumithire pepi naNyambi.
20Eyi ne mbadi yapwire kutanaritha mukupira medhero. Halevite nawo hana kara hapristeri mukupira matanaritho ghomedhero. 21Ene Jesusi, ha mu pakire mo nomedhero ghaNyambi oyu gha ningire kukwendi eshi:
“Fumu gha yi tanaritha nomedhero
no mbadi mbo gha yihukuruka karo eshi:
‘Owe ne ghomupristeri kuroruhe.’ ”
22Kemo dyo gha karire Jesusi, maturekero ghoghundambo mwene.
23Poghadi karo makutjakero ghamweya eshi: Yoyishi hapristeri waLevi kwa wa ghowire kufa no mbadi ha thigharire po. Ene pakarire hengi awa ha wa randire. 24Yoyishi Jesusi gha kara kuroruheya, yo gha wanena ghupristeri ghokupiterera hamweya. 25Yodigho Aye gha kona karo kupiteritha hanu papendi kwaNyambi, awa mba komonoka pashadyarero no kehe pano: Aye gha para roruhe mukuwakumitha kwaNyambi.
26Kukwetu kwakarire mupristeri shokuru. Oyu gha pongokire. Oyu gha pirire mirandu noyu gha kushukire, yoYu gha tundithire mukatji kawayiharuri no ha mu nunekire gha piterere mawiru. 27Oyu gha dhirire kukara yira hapristeri hohakuru, awa nga ha yambanga miyambo diyuwa nodiyuwa. Pakutanga ha tupurangire miyambo kumaharwero ghawo hathinda, munyima dhawadiko. Ene Ye gha tupurangire roruhe ndupu kumaharwero, apa gha kuyambire thinda. 28Miragho dha paka po hanu eshi ha kare hapristeri hashokuru. Hanu ne ha kara noghukashu. Keho ne n̂ando dhi dha tanara pamedhero, edhi dheyire munyima dhomuragho, dho dhapaka po Mwana gha kare Mupristeri Shokuru kuroruhe no ghokuyara.
Currently Selected:
Haheburayi 7: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
