Haheburayi 6
6
1Twa porera kukuyuvitha pakutanga yinu yaKristusi. Atwe ne tu rikanyithe ghushemwa ghombudhi. Karo mbadi tuna kuhukuruka kughamba, kumapirukero ghomuyiparitha eyi ya reta, kufa, endi kumatawero ghomwaNyambi. 2Ngambi kumatawero ghomwaNyambi, yihonga yodiyoghero no makambekero ghonyara, muvumbukero wawafu no ndhango dhororuhe. 3Yo tuna kuyirundurura shime kughutho oku ghana yi tutawedha Nyambi.
4Ngeshi ghawa munekerire Nyambi hanu pakutanga no ha wanine yitapa yomudiwiru no ha yeranine kwaMupepo ghoKupongoka, 5no kudimuka n̂ando dhodhiwa dhaNyambi nongcamu dhokaye kokughutho, 6munyima ne gho ha wire karo, eyi ne ghukukutu kukwawo mu kuwahutha karo kumapirukero. Yoyishi, mumwawo hathinda ha pamarera shime no kumushamuna thitunumeho pakumusherera. 7Eyi ne ya kara muve ghomushuwi‐shuwi ghomvura ghororuhe. Ngeshi ha ghu reta mukesho mwene kwawakakughuvunda, ghuna kupwa kukandadheka kwaNyambi. 8Ene ngeshi ha ghu ngambwathana nomakona noghurugha, wa pira mudyo no nako dhina kukokere eshi, Nyambi gha tupe thikuto. Ghuhura wagho ne mudiro.
9Keho mwahakwa, ngambi kenge tuna kughamba kemo tuna mu kurupera eshi, amwe ne mwahunga no mbo muna pu kughamwena. 10Nyambi ne kadi muyi: Aye, mbadi mbo gha vurama yirughana yenu no ruhakitho ru mwa neghedha kuDina dyendi no kukarera hayendhenu thika di muna kuwakarera. 11Eyi ne yo twa hima thikuma eshi, kehe yu ghopapenu gha kare noghutoghoro ghogho, yira pakutanga kate mbo yirikanye yinu yi mwa kurupera. 12Yodigho ne mbadi mwa kona kukara nowoma. Ene mu kuthe thitamenedhi thawa ha dhidhimekire mumatawero no ha yeranine kuyinu yi gha wa turekerire Nyambi.
Ghushemwa ghomaturekero ghaNyambi
13Apa gha tapire Nyambi maturekero kwaAbrahamu, mbadi pakarire ghumweya ghokupiterera yira Ye thinda, oyu sho gha tanarithere medhero. Yo gha kutanaritherire Thinda medhero, 14no gha ningire eshi: “Yashemwa, Ame ne mbona, kukandadheka noghutungi no mbona kuvurithera thikuma hanahoka woye.” 15Kemo dyo gha wanine Abrahamu eyi gha mu turekerire Nyambi, munyima dhokutaterera ghudhidhimeka. 16Hanu ne ha tapa medhero koyu ghawapiterera. Kukwawo yi ne matanaritho ghon̂ando, nomedhero gha, gha tunditha po n̂anani dhodhihe. 17Ene yoyishi Nyambi gha turekire kwawakakuyora matoyedhero eshi, manungero ghendi ghashipiraghuka, gha gha tanarithire Ye nomedhero ghomaturekero. 18Yinu yiwadi yi, yishipiraghuka, maturekero nomedhero ya negha ghushemwa eshi, n̂ando dhaNyambi ne mbo dhina kara po. Ene kukwetu twe twa kara nomatjirero ghokukwendi, dha tu tjokedha nongcamu, mu kukwata makurupero agha gha tu turekera. 19Makurupero ghetu, gha kara yira thidhughekitho thomoyo ethi tha tanara thokudhira kukunyunga‐nyunga no thi thonda muthifikitho thodiwiru. 20Omu mo gha tangerire kwingena Jesusi ghoMukamiti wetu, pamurandu wetu. No Aye mupristeri Shokuru yira Melgisedeki.
Currently Selected:
Haheburayi 6: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
