Haheburayi 12
12
Makurupero ne gha kona kutanarera paJesusi
1Oku tudi nombunga dhodhikuru dhawatunonga tomatawero edhi dhina tu dhingumwetwedha, tu thighe keho ghukukutu wetu. Ho tu yape maharwero gha ghana kutuyapitha wangu. No tu dhondoke nomatjimapero, kate kumufunda oghu ghudi kughutho wetu. 2Tu toperere meho ghetu paJesusi. Yoyishi yoMatangero no Mahurero ghomatawero ghetu. Pamurandu ghoyishamberera eyi ya karire kughutho wendi, Aye, gha nyandire thikuma pathikurushe no mbadi gha fire honyi. Pan̂anyi‐n̂anyi, Aye ne ghana hungumana kurudyo rodipuna dyaNyambi. 3Mu ghayare Yu gha dhidhimeka yitenda yawakan̂ore hoyiharuri, awa ha mu pakerire n̂ore. Ndani po mbo mu dhira kutwama mumidhimu dhenu, gho mbo mu dhire kuwa.
Fumu ne kuhonga wa gha haka
4Amwe ne mbadi muna kumenena mo mukuwitha maharwero eshi, mu kare mun̂anani dhokufa no kupara. 5Karo mwe mwa vurama matjokedhero agha gha mu tamba, ha mu toye yira hana Nyambi eshi:
“Mwanange, wa nyatha yino yoyimbiru
ngeshi oku ghana kukuhonga Fumu
no wa nyeghenya
oku ghana kukuthighura
6yoyishi Fumu, kuhonga yu gha haka,
Aye, kuhumbitha yomuhe yu gha tambura yira mwana.”
7Mu dhidhimeke yihonga yira yikoreritha. Yoyishi Nyambi, yira hanendi ghana kumutenda. Endi ngwa poghadi mwanuke yu ghokudhira kupwa kuhonga kwawihe? 8Ene ngeshi kadi wa kumuhonga thika di hana kuhonga hamweya wingi wawo, ngo mwa kukare hanumaghana no kadi hanendi. 9Karo natwe twa karire nawawihetu pano pamuve, awa ha tu hongire. Ngeshi kemo ne, mbadi twa kona kukutapa karo thikuma kwaWihetu ghomudiwiru no tu pare ndi? 10Hawihetu ha tu hongire kanakoghana kuyihima yawo. Ene Ye, gha tu himena eshi mbo tu yerane kughupongoki wendi. 11Pakutuhonga roruhe, ya karanga yihonga panako dhodho. Ene kadi thinu thoyishamberera, eyi ne ya kudira. Munyima yina kureta kwawa hana kutawa mo, mbuyo dhothiraro no mahungameno. 12Yodigho mu tanarithe moko ghenu ghomakashu, no manwi ghenu ghokughara. 13No mu yende ndhira dhokughororoka. Ndani po mbo thi dhira kukundama thipo thokughara kuthipo mwene. Ene mbo thi neruka natho.
Mbadi mwa kona kumwagha n̂eke dhaNyambi
14Mu toghorope kuthiraro thawanu wahe, no mu pare mughupongoki. Ngeshi kupira po yi, mbadiko yu mbo gha mona Fumu. 15Mu koneke eshi, mbadi pa kona kukara yu ghana kumwagha n̂eke dhaNyambi. Mu koneke eshi, mbadi pa kona kukara yu gha kara yira mudhi ghoghururu, oghu ghuna kureta maghukukutu no kumangopitha hengi. 16Mu koneke eshi mbadi pa kona kukara mukakupara mughuyi no ghokunyatha Nyambi yira Esaghu yu gha ghurithire ghumbedi wendi, kuyidya yomughondhera ghodiyuwa dyofotji. 17Mwa yidimuka eshi ghapwire kumwagha, munyima dhokuninga eshi gha tambure makandadhekero. Aye ne mbadi gha wanine kanako ko kukuthighura, ngambi kenge di gha yishanine nomahodhi. 18Amwe ne mbadi mweyangire kudirundu dyokukona kukundama, dyomudiro ghokweskeshera, nomavuyi ghomudikitero, nomakore, nodingundunga, 19kudiywi dyotorombita mbadi mweyire ko no kumughuma ghodiywi dyoman̂ando temba. Keho awa ha yuvire diywi di, ha kandererire eshi, nokamanana temba mbadi dha kona kuhokora karo n̂ando kukwawo. 20Yoyishi muragho kuninga ghuna kuninga eshi: “Ngambi thiyama thokukundama kudirundu di, ha kona kuthipagha nomawe.” Ene wo mbadi ha ghu kwatire muragho ghu. 21Yihokoka yi, ya karire yikuru thikuma kate gha kughererire Mosesi eshi: “Ame ne na tutukwa kuwoma ghuno!”
22Ene amwe mweya kumakonaneno ghomashamberero, kudirundu dyaSiyoni no kumbara dhaNyambi ghomuyumi, mbara dhi ne yoJerusalema ghomudiwiru no mayovi ghawaengeli wendi, 23no kumakonganeno ghawan̂ombambedi, awa hapwa kutjanga mena ghawo mudiwiru. Amwe mweya kwaNyambi ghoMupanguri wawahe no kumidhimu dhawahunga awa ha yara, 24kwaJesusi ghoKatji koghundambo ghoghupya no kumatjakerero ghomanyinga, agha gha nongonona ghushemwa kupiterera manyinga ghaAbeli. 25Mu koneke, mbadi mwa kona kukanana Yu ghana kughamba. Yoyishi awa ha mu kananine apa gha ghambire n̂ando dhendi dhoghunyambi pano pamuve, mbadi ha parire. Twangatji keho mbo tu fa oku mbadi tuna kutegherera kukwendi Yu ghana kughamba mudiwiru? 26Mumayuwa ghaya, diywi dyendi ne dya kin̂ithire muve. Ene pan̂anyi‐n̂anyi, kuyuvitha ghana kuyuvitha Aye eshi: “Shime parofotji vene, mbadi mbo ni kin̂itha muve pithagho, ene no diwiru nadyo karo.” 27N̂ando dhi “shime parofotji vene” po mbo yikarera thiwana‐thiwana eshi yinu yi ha varekire yi ya kunyunga-nyungire pakutanga, mbo yina pu kutunditha po tarara, no mbo yina thighara po yokudhira kukunyunga‐nyunga.
28Mu tu tumere thikuma twe twa wana ghutungi ghokudhira kukunyunga‐nyunga. Mu tu karere Nyambi noghutumera nodikuto, noghukumbirupitha, thika di gha yihima Ye. 29Yoyishi Nyambi wetu ne yomudiro ghokwan̂itha.
Currently Selected:
Haheburayi 12: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
