Haheburayi 11
11
Yomatawero
1Kutawa ne, kukara ghushemwa muyinu yi twa kurupera, no kunongonona yinu eyi twa dhira kumona. 2Yoyishi pamatawero ghawo po ha wanenine hatukuru pakare‐kare ghushemwa. 3Pamatawero po twa dimukera eshi kaye, kapwire kuvareka pan̂ando dhaNyambi. Yodigho yinu yokumona ne mbadi ya tundire muyinu eyi tuna kumona.
4Yoyishi Abeli ne gha tawire, po gha yamberire kwaNyambi, muyambo ghokupiterera waKaghini. Pamatawero ghendi, po gha wanenine ngcamu kwaNyambi eshi, gha kare munu ghomuhunga. Nyambi ne gha menye‐menyenine miyambo dhendi, pamatawero no pamatawero ghogha ghofotji, shime ha ghamba ngambi kenge di ghafire kare.
5Pamatawero ghendi Henogo, ha mu tundithire po oku ye shime muyumi no mbadi ha mu wanine kumweya. Yoyishi Nyambi gha mu shimbire. Kukwendi ha nongonona eshi, kughutho ghokumushimba, gha parire thika di gha himine Nyambi. 6Ngeshi ku mbadi ghana tawa munu, kukwendi ghukukutu kutenda mahimeno ghaNyambi. Yoyishi, kehe yu ghokuhenya kwaNyambi, gha kone ndani kutawa eshi, Aye ne gha kara po, no karo eshi Aye ne gha ruwera awa ha mu shana.
7Apa gha tawire Noghe, gha fumanekire Nyambi no gha karire ghutawedhi, pakumushinga kuyinu eyi ya dhirire kuhokoka. Po gha tendirire dyato edi dya parithire hendi. Matawero ghendi, gha karire matetero ghokaye. Karo matawero gha, gho gha mu wanithire ghuyori ghokaye.
8Yoyishi, Abrahamu gha tawire, ho gha yuvire apa gha mwithire Nyambi eshi, gha dhirukere kudyango edi gha mu neghedhire edi sho gha kayore. Aye gha fungurukire no mbadi gha dimukire eshi kupi ghana kutamba. 9Yoyishi gha tawire, yo gha kutungerire muditunga dyomaturekero. Aye gha ka karire mugenda muditunga dyawanumaghana, Muyishashara gha ka tungire, pofotji naIsaka naJakopu, awa ha yorire pofotji nendi maturekero. 10Aye gha rurire thikuma mbara edhi dha tanara kashemandhugho kadho, naNyambi yomatangero nomutendi wadho.
11Yoyishi Abrahamu ne gha tawire, ho gha wanine mwana, ngambi kengedi gha kuruparire no ngambi kenge di gha karire Sara mbumi, gha wanine ngcamu dhokureta mwana. Yoyishi, aye gha kuruperire thikuma Nyambi, oyu gha yi mu toyedherire. 12Eyi ya hokokire kwamurume yu gha dhirire kukona kuwana mwana, mo ha tundire hana hohengi yira nungwedhi dhomuwiru, dhokudhira kukona kutara yira manona ghodiheke ghokumbombwa dhodikuruviya.
13Oku shime ha tawera hanu wa, ha fire no ha yawire eyi ha wa turekerire. Ene, ha yi kambekedherire kokayenda no ha yi kughire no ha dimukire eshi awo ne hagenda no hanumaghana pano pamuve. 14-15Hanu hokughamba kemo, hana kukudimukitha shemwa eshi, awo ne ditunga dyawo hana kushana. 16Ene wo nga ha ruranga ditunga dyawo dyoshemwa dyodiwiru. Po gha dhirerire kufa Nyambi honyi, pakumutoya wo eshi, Nyambi wawo. Karo Ye ghawa roghitherire mbara.
17Pamatawero ghendi Abrahamu, ha mu yerekire eshi, gha yambe mwanendi Isaka. Yashemwa, yoyu gha wanine maturekero. 18No kukwendi ha ninga eshi: “MwaIsaka mo wa kuwana hanahoka ghoye.” Naye gha kwindukire mukutupura mwanendi ghopithendi. 19Aye gha yidimukire eshi Nyambi ne gha kara nongcamu dhokutumuna mufu. No gha dimukire eshi mbo ghana mu hukera karo Isaka.
20Pamatawero ghaIsaka, po gha kandadhekire Jakopu naEsaghu, koyi mbo yihokoka kughutho.
21Pamatawero ghaJakopu, po gha kandadkerire ye hana Josefu kughutho ghokufa kwendi mughuwadi wawo. No gha raperire kwaNyambi oku ye ghana kunyumana kumutwi ghomutagha wendi.
22Pamatawero ghaJosefu, po gha yuvithire mudhirukero waWaisragheli no ghawa pire ndhagho eshi, ngepi di mbo ha vurukanga yishokora yendi.
23Pamatawero ghawiha nanyina Mosesi, po ha mundekerire rure rotughonda tuhatu, munyima dhomushamurukero wendi, apa ha mu monine eshi aye ne mwanuke ghomuwa. Nawo mbadi ha yapire kumarawero ghaFumu.
24Pamatawero ghaMosesi, po ha shwenenine kumutoya eshi mwikurwa Faragho oku aye ne mukuru. 25Aye ne gha tororire po mukunyanda pofotji nodiko dyaNyambi, kupiterera mukushamberera kapupi kamana mumaharwero. 26Dishamu dyopamurandu waKristusi gha di fumanekire ye eshi, ghutungi ghoghukuru, ghokupiterera ghushwi ghoghuhe waEgiptena. Yoyishi Aye ne gha tatererire ndjambi dhokughutho.
27Pamatawero ghendi, po gha thigherire kwendi Egiptena mukupira woma, kunyinya dhafumu. No gha tjimapire yira yu ghana kumona Nyambi ghokudhira kumona.
28Pamatawero ghendi, po gha tangerire Mosesi kwimba Paska no gha wethire makorogho ghoyero eshi, muengeli ghomupaghi maghana sho gha paghe hambedi waWaisragheli.
29Pamatawero ghaWaisragheli, po ha tjinaghanenine Dikuruviya dyoDikihu, yira pamuve ghongungu. Ene apa ha yiyerekire nawo Hakaegiptena kutjinaghana po, ko kufa kwawo kumeyu.
30Pamatawero ghaWaisragheli, gha yengadhokire matete ghaJeriko, apa ha dhingumwetwedhire dighumbo di munyima dhomayuwa kwoko nomawadi.
31Pamatawero ghaRagabu ghomukarungu, mbadi gha fire ye pofotji nawa ha karire ghuthururu kwaNyambi. Yoyishi gha tamburire hakahoka thiwana.
32Ame ne yinye sho ni ghambe shime karo? Yoyishi ruvedhe rokutwara yithimwetwedha yange kughutho, yokwaGideghoni no kwaBaraka, naSimsoni naJefta, yaDavita naSamweli nawaporofeta ne runa ni thighi. 33Pamatawero ghawo, po ha wanenine ghutungi ghoghufumu, ha rughanine no ha wanine eyi gha wa turekerire Nyambi, no ha vukire tunwa tonyime. 34Marara ghokwekeshera ha manine kudhimitha no ha yokokire kudimende. Ha wanine ngcamu mughukashu, ha tanarire muyita no ha hanyaghurire hakan̂ore dhawo. 35Hambuyama ha wa hutherire hafu wawo, pakuwavumbura mwawafu. Hatawi hamweya, mbadi ha hakire kutapa thinu kumukeya wawo. Ene hapwire kupagha. Yoyi ha hakire eshi mbo ha fumane kumuvumbukero mwene. 36Hamweya nawo ha pwire kushamuna no kuwamwashura. Ha wa ghangire no ha karire mun̂otwa. 37Wingi wawo hatawi ha pwire kupagha nomawe. No kuwatetaghura no ha wa keshaghurire nodimende. Awo ne ha rendarendire muyifurukutu yondjwi no yon̂ombo. Ha karire mukunyanda no murupetho rorukuru. 38Ene kaye mbadi ka wa tamburire, ha rendarendire mumamboreya no mumarundu no ha parire mumarundu no mumateke. 39Ngambi kenge di gha fumanine manongweno ghomatawero ghawo waheya, mbadi ha wanine eyi ha wa turekerire. 40Yoyishi Nyambi ne gha tu himena yinu yoyiwa yokughutho, ngeshi ha tu piri po twe, mbadi mba kuma kumahurero wo.
Currently Selected:
Haheburayi 11: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
