Haheburayi 13
13
Yipara yoghukriste
1Mwayendhange, mwa kona kukuhakathana roruhe. 2Mwa vurama kutambura hagenda. Yoyishi pakutambura hagenda, ha tamburire hanu wamweya haengeli, oku mbadi hana yidimuka wo. 3Mu vurukange hakan̂otwa, yira oku mudi namwe mwathinda mun̂otwa. Nawa hadi murupetho, yira yamwe mwathinda hana kupetha.
4Mayekero, gha kona kughakutekera yomuhe. Mukukurupere pofotji muyipara yomayekero. Yoyishi hakarungu nawakakutjora mayekero, mbo hana kumu kundhango dhaNyambi thinda.
5Mu thighe ghumu nomanyinga. Mu kare nothiraro noyi mudi nayo. Nyambi thinda gha ghambire eshi: “Ame ne mbadi mbo ni kumwagherera, no mbadi mbo ni kuthigha mumaghukukutu.” 6Yodigho twa kona kughamba nomakurupero eshi:
“Fumu ne yoMughamweni wange,
mbadiko thi na kuyapa me:
thinye thokukona kutenda munu kukwange?”
Mu kughe Nyambi paJesus Kristusi
7Mu vuruke hakamiti wenu, awa ha mu yuvitha pakutanga n̂ando dhaNyambi. Mu ghayare yikara yawo kate kughuhura, no mu kuthe thitamenedhi thawo thomatawero, ethi ha mu thigherire.
8Jesus Kristusi ne yopeghundha no dyarero no kuroruheya. 9Mbadi ya kona kumupemukitha yihonga yimweya. Thiwapo ne mu tanarithe mitjima dhenu pathin̂eke, kadi pamuhingo ghoruditho. Awa ha tawire kumuhingo ghu, mbadiko thi ha wanine po.
10Twa karire nothinyaku ethi tha karire no yikarera yomuyambo ghothidhira, kumuhingo ghopakare, muyambo ghu mbadi ha konine kughudya hakakukarera. 11Manyinga ghoyiyama yomuyambo, gha gha twarire mupristeri shokuru, kumuyambo ghokumaharwero. Ene yirama yoyiyama yi yapwire kukon̂erera kununda dhomwara. 12Yodigho gha nyanderire naye Jesusi karo panunda dhomakorogho ghombara. Mukukushukitha diko kumaharwero ghadyo nomanyinga ghendi thinda. 13Mu tu shwaghe keho tu yende kununda dhomwara, tu kashimbe kunyanda ku gha shimbire Ye. 14Yoyishi mukaye kano, mbadimo twe matungo ghetu ghoshemwa. Atwe ne shime ha tu shana matungo ghokughutho. 15Mu tu tware ne keho pano muyambo ghodifumanekero, ghushipu kwaNyambi paJesusi. Difumanekero edi hana kureta kukwendi, pamiromo dhomanongweneno ghoDina dyendi. 16Mwa yongara mukutenda ghuhunga, no mukutughamwena. Yoyishi, oghu ne ghomuyambo ghokumenya‐menyitha Nyambi.
17Hakamiti wenu, ha koneka moyo dhenu no kuyithothonona kwaNyambi. Mu kare ghutumanethi kukwawo no mu wa ghamwene. Payinu yi, po ha kurughana yirughana yawo noyishamberera. Ene kadi notjitju mitjima, ngo mbadiko thi ya kumughamwena.
18Mu kare kengeyo mukuturaparera. Yoyishi yatwe tuna kuyinongonona eshi, yihima yetu ne ya rogha. Yoyishi tuna haka kuyereka mukutenda ghuhunga yoyiheya. 19Thikuma na kumuthundawedha mukuniraperera eshi, ngo gha ni huthe Nyambi wangu kukwenu.
Ndapero dhokwawatoyi
20Nyambi ghothiraro, oyu gha tumuna mukufa Hekudyetu Jesus Kristusi, pamurandu phomanyinga ghendi agha gha reta ghundambo ghororuheya, yo ghadi Mudithi Shokuru ghomutanga wendi. 21Ninge gha mupe yoyu Nyambi yoyiheya yoyiwa. Eshi mu kone kemo kutenda mahimeno ghendi. Gha tende mumwetu paJesus Kristusi, thothihe thi tha mumenya‐menyitha. Kukwendi thishe, kuroruhe no roruheya. Amen.
Makanderero ghoghuhura no dirumeritho
22Mwayendhange, ame kukanderera na kumukanderera thikuma eshi: Amwe ne mu kare noghudhughutjima, kuman̂ando agha hana kumutjokedha, ngambi kenge di na gha fupipitha pakughamutjangera.
23Mwa yidimuka shemwa eshi, muyendhetu Timoteghusi, kare gha shwagha mun̂otwa. Ngo gha tambukerere wangu, ngo na kwiye nendi apa na kuna mu dhingura.
24Mu tambure dirumeritho kwawakamiti wenu no kwawatawi wahe. Nawa ha tunda kuItaliya, nawo hana mu tumena dirumeritho.
25N̂eke dhaNyambi mbo dhi kare nenu mwahe!
Currently Selected:
Haheburayi 13: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
