Hakagalasiye 6
6
Mukughamwene mumaghukukutu ghenu
1Mwayendhange, ngeshi ghumweya ghana kwirwa endi ghana harura, amwe wa piteritha Mupepo, mwa kona kughamwena munu ghokenge yo pamupepo ghoghuwa. 2Mukughamwene mumaghukukutu ghenu no kemo sho mu kumithe mo muragho waKristusi. 3Ngeshi ghumweya ha ghayara eshi, aye ne thinu nane aye ne thinu vene, ghana kwangera thinda. 4Kehe yu gha kona kudimuka thirughana thendi thinda, no gha kwipure karo thinda koyi ghana kudhira kurughana ngeshi yihunga, gha kona kunyamwena po. Yidhire kurikanya pofotji no yawamweya. 5Kehe yu mbo ghana neghedha thinda ghushupi wendi koyi gha tendire.
6Munu yu gha wana thishongero mun̂ando dhaNyambi, gha yuvithe ko mitiri wendi, yinu yoyihe yoyiwa eyi ghadi nayo.
7Wa kwangera ghothinda: Nyambi mbadi ha pepanga Nendi. Yoyishi, ethi ghana kukuna munu mbo ghana thi pokora. 8Oyu ghokukuna mudipya dyendi yirama yendi, mbo ghana pokora muyirama yendi, kufa no‐ghuyi. Ene oyu ghokukuna mudipya dyaMupepo, mbo ghana pokora mwaMupepo moyo ghororuheya. 9Twa ghaya kutenda ghuhunga. Yoyi ngeshi mbadi sho tu kashe, mbo tuna pokora karo munako. 10Kenge tudi noruvedhe, tu tende twahe yoyiwa. Thikuma kwawatawi hayendhetu.
Mashingero ghoghuhura nodirumeritho
11Apa no kutjanga na kutjanga nonyara dhange nothinda kukwenu. Mu mone vene kumamun̂ando ghashaghukuru! 12Hanu wo hana kumuthineneka eshi, namwe karo ha mu ken̂e. Hana haka vene kukuroghithera eshi, maghana mba wa kuthakutha pamurandu ghothikurushe thaKristusi. 13Ngambi kenge di hapwa kuken̂a, mbadi ha koneka muragho hathinda. Ene wo hana haka vene namwe mupwe kuken̂a eshi, ha kone kufumaneka koyi yina hokoka kuyirama yenu. 14Kukwange pithange, Nyambi ngo gha shwene kukehe thinu eshi mbadi na kona kufumana nokamanatemba, shimengwa pathikurushe thaHekudyetu Jesus Kristusi. Yoyishi, pathikurushe kana fera kaye kukwange, name karo na fera kaye. 15Ngambi ha mu ken̂a munu endi mbadi ha mu ken̂a, mbadi po thinu. Keho kare ndani munu ghomupya. 16No waheya wa ha kutha yiparitha yi — Nyambi mbo ghana tapa thiraro nothin̂eke kukwawo, no kwaIsragheli waNyambi.
17Noyofotji temba gha kona kukukutitha yi. Yoyi ame ne na shimba kare thidimukitho thaJesusi payirama yange.
18Thin̂eke thaHekudyetu Jesus Kristusi mbo thi kare nomupepo wenu, mwayendhange! Amen.
Currently Selected:
Hakagalasiye 6: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
