Hakagalasiye 5
5
1Kristusi gha tu shuturire eshi tu kare horo dhoshemwa. Mu tanare keho muhoro dhi no mbadi ha kona kumuthineneka karo eshi, mu kare kwishi dhodjoko dhoghupika.
Horo dhoGhukriste
2Mu mone, ame Paghulusi kutongwera na kumutongwera eshi: Ngeshi ha mu ken̂i mwe, Kristusi ne mbadi mbo gha wana mudyo kukwenu. 3Eyi ghudhundeka na kuyighamba me kwakahe yu ghapwa kuken̂a. Aye gha kona ndani kukoneka kehe muragho. 4Amwe muna kushana ghuhunga pakukoneka muragho, muna tjoro manungero ghenu naKristusi. Mwa yongaritha thin̂eke thaNyambi. 5Kukwetu twe twathinda, no pathirughana thaMupepo po gha kara makurupero no mataterero eshi, mbo tu wane ghuhunga pamatawero ghetu. 6MwaKristus Jesusi, mbadiko thinu thokuninga eshi, wapwa kuken̂a ndi, endi mbadi wapwa kuken̂a. Thinu thothikuru po ne, matawero ghopayitenda yoruhakitho.
7Amwe mwa karire thiwana mundhira. Yidye yu gha mu ghowithire eshi, mu kare ghuthururu kughushemwa? 8Yidye gha mu hongaghurire? Kadi Nyambi; Aye ne yo gha mwitha kughuturumuthi. 9Kamuhahaghana, kukona kuhahitha muhaha ghoghuhe. 10Dinungo dyetu naFumu dina nipa makurupero eshi, namwe mbo mu ghayare thika me. Ene munu yu ghokureta thivunganyi mumwenu, ngambi ngepi di gha kara, Nyambi mbo ghana mu mwashura.
11Kukwange me, mwayendhange, ngeshi ngo ni yuvithe shime eshi, munu ha kone kumuken̂a. Pashanye ne hana kunikuthakuthera shime? Munyima thikurushe thi tha reta maghukukutu, hana thi tunditha po. 12Ame na haka eshi hanu wahe wa hana kureta thivunganyi mukatji kenu, ha kupake ghunutura hathinda!
Mupepo waNyambi noyikara yetu yoghu areki
13Amwe mwayendhange, amwe mwapwa kwitha kuhoro. Mwa pomekitha horo dhenu pakutenda ghuyi. Ene mu kare pofotji muruhakitho. 14Miragho dhodhihe ha dhi paka mumuragho ghofotji ghuno eshi: “Hake muyendhoye thika di wa kuhaka ghothinda.” 15Ene mwe mukuhumaghure no mukupayaghure mwathinda. Mu takamithe eshi mwa kumanitherera po.
16Eyi na kuninga ne yino: Eshi mu ninge yipara yenu gha yiraghure Mupepo waNyambi. Ndani mbo mu dhira kutawa kuyirumbera yenu yoyirama. 17Eyi ya rumbera yirama yetu, ya kutjaka no yi wa hima Mupepo. No yi wa hima Mupepo yakutjaka no yi ya rumbera yirama. Yinu yiwadi yi ne pofotji. Yodigho, mbadi mwa kona kutenda thika di mwa hima. 18Ene amwe, ngeshi Mupepo ghuna kumupiteritha, mbadi mudi shime kwishi dhomuragho.
19Yirughana yoyirama ya kunegha yothinda. Ayo ne yino eshi: rungu, kupira ghukushuki, dishawana, 20kukarera hanyambi hombango ghurodhi, ghunyathi, thidhimbo, nya, ghupata mvo, makuyakunukero no makuharan̂anyeno, 21nya, ghudakwi, mandunda kuyinu yorungu no yinu yimweya yokemo. Ame kushinga na kumushinga kuyinu yi, thika di na mu shingire pakutanga: Oyu ghokutenda yinu yi mbadi mbo gha yora ghutungi waNyambi.
22Mbuyo dhaMupepo ne, ruhakitho, yishamberera, thiraro, ghudhughutjima, ghunongo, thin̂eke, makurupero, 23kukumbirupitha no makurawero ghoghuthinda. Kuyinu yokenge yi, muragho mbadi wa tenda po thinu! 24Awa ha hatera kwaKristus Jesusi, ha pamarera dirura dyomitjima dhawo noyirumbera yawo. 25Atwe twa para naMupepo, Mupepo ghu pake po karo yikaritha yetu. 26Twa kara dihuna, mbadi twa kona kukushamuna ngambi kukupakera nya.
Currently Selected:
Hakagalasiye 5: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
