Hakaefesusi 1
1
Mbapira Kwawakaefesusi
1Edhi dha tunda kwaPaghulusi, ghomupostoli waKristus Jesusi pamahimeno ghaNyambi. Kwawahe hoMuefesusi wa ha tawa mwaNyambi no mwaKristus Jesusi. 2Neke nothiraro thaNyambi kukwenu ghoWihetu no thaFumu Jesus Kristusi!
Makughero kwaNyambi kuthin̂eke thendi
3Makughero kwaNyambi ghoWiha Hekudyetu Jesus Kristusi! Aye gha tu kandadheka mwaKristusi no makandadhekero ghaMupepo ghomahe agha ghadi mudiwiru. 4Aye dyo gha tendire karo kughutho ghokuvareka kaye. Eshi twa pwire kutorora mwaKristusi, tu pongoke no tu tjimape kughutho wendi. 5Paruhakitho rwendi, Aye mbo ghana tu tambwera pamahimeno ghendi ghothin̂eke, thika di gha yi pakirepo eshi, tu kare hanendi paJesus Kristusi. 6Yodigho tu kughe Nyambi pathin̂eke thendi thothikuru, pakutapa Mwanendi nyara‐nyara kukwetu paruhakitho rwendi. 7Pamanyinga ghaMwanendi, gha tu shuturire no gha dhimithire mirandu dhetu, pathin̂eke thaNyambi thothikuru, 8ethi gha tupa mughunya‐nyami wendi ghoghuhe no thi tha vuritha yidimuka yetu. 9Aye gha hima no gha nunga eshi gha tu yuvithe thithithatero thendi. 10No yirikanye paKristusi mu nako dhi gha paka po. Yighayara yendi ne eshi, yoyihe yomudiwiru no yopamuve, yi kare kwishi dhomutwi ghofotji, eshi kwishi dhaKristusi. 11PaKristusi twa karera twe diko dyaNyambi, thika di gha yi pakire po Ye pamutango. Kemo dyo gha himine Ye. Aye yu gha kona kutenda thika di gha yi hima, kudinungo dyodighano dyendi. 12Yodigho, atwe twa kurupera mwaKristusi, twa kona kukugha ghukuru ghoghuhunga waNyambi. 13PaKristusi mwa karera mwe diko dyaNyambi apa ha mu yuvithire ghushemwa, ghomakomweneno ghenu. Mwa dhi yuvire kate mwa tawire. MwaKristusi gha mu tarekire Nyambi naMupepo ghoKupongoka, pamaturekero ghendi eshi, mu kare hana Nyambi. 14Mupepo ghoKupongoka ne thipaka po eshi natwe mbo tu wane eyi gha turekera Nyambi, apa mbo ha komonoka wahe wa, ha kundama kukwendi. Podigho ne, tu kone kutumera ghukuru wendi.
Ndapero dhaPaghulusi
15Yodigho, kutunda pa na yuvire matawero ghenu ghokwaFumu Jesusi, noruhakitho rwenu rokwawatawi wahe. 16Mbadi na shagheka karo mukumutumera Nyambi. Apa na mu vurukanga mumandapero ghange. 17Na rapereranga eshi, Nyambi waHekudyetu Jesus Kristusi, Wiha ghodiko dyodiheya. Gha tape ghunyanyami kukwenu paMupepo no gha mu hokwere eshi, amwe ne mwa mu dimuka shemwa. 18Ame na kumukumbera eshi, gha kuvishure mupepo ghomeho ghenu, mu kone kudimuka methero ghomakurupero ghenu, no ghutungi munye ghu mwa kuyora, oghu ha turekera hatawi. 19No ngepi ghukuru ghongcamu dhendi dhi dha rughana mumwetu twatawi. Edhi dhongcamu dhofotji dhi dha rughana pangcamu dhendi. 20Edhi gha rughanithire apa gha tumunine Kristusi mwawafu, no dhi gha mu kun̂umekire kurudyo rwendi mudiwiru. 21Oyu ne gha pitererire makuto ghomahe nomangcamu ghomahe, ngcamu noghuraghuri no kehe ghufumu ghu ghuna kuraghura, kadi ghonako dhino keho ene no ghu ghonako dhokughutho. 22Kwishi dhendi gha tura Nyambi yoyihe. Aye gha mu yeyura kughutho ghoyoyihe, no gha mu paka gha kare yomutwi ghongirishe. 23Ngirishe ne yirama yendi, mayeraneno gha, gha rikanyithera mwawahe.
Currently Selected:
Hakaefesusi 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
