Hakagalasiye 4
4
1Pano na haka karo me kuyihukuruka eshi: ngeshi muyori shime mwanuke, mbadi dya kutjaka dikuto no dyamupika. Ngambi ngepi di ya kara yiyora yoyihe yendi. 2Kate kudiyuwa di gha pakire po wihe, gha kara kwishi dhawakakumurera no ghushwi wendi, kughuraghura ne muraghuri. 3Kemo karo kukwetu. Apa twa karire twanuke, twa karire twapika hokutanga hokaye. 4Ene pa dha kumine po nako dhi gha pakire po Nyambi, Aye gha tu tumenine Mwanendi. Aye gha mu shamurukire mbuyama, no kutunda kumushamurukero Wendi, gha karire kwishi dhomuragho. 5Eshi atwe twa kara kwishi dhomuragho, tupwe kukomonoka, kemo sho ha kone kututambura tu kare twana Nyambi. 6No yoyishi amwe ne mwanendi, yo gha tumenine Nyambi Mupepo waMwanendi mumitjima dhetu. No mumwetu ghana kwitha Ye eshi: “Abba!” Kuninga eshi: “Tate!” 7Yodigho owe ne mbadi shime ghomupika, pan̂anyi‐n̂anyi we ne ghomwana Nyambi. No yoyi wa kara ghomwanendi, yo gha kupera Nyambi karo yiyora.
Yikudhekara yaPaghulusi yokwaWakagalasiya
8Pa karire nako dhi mwa dhirire kudimuka Nyambi mwe no dhi mwa karire mwapika wawanyambi hombango. Awa ha dhirire kukara hanyambi hoshemwa. 9Ene pano muna dimuka Nyambi, ngambi kenge di ghana mu dimuka Ye. Ngepi karo di muna huka munyima no ghuhepwe ghokutanga? Muna haka kutangerera ko ghupika wenu ndi? 10Amwe shime ha mu vurukanga mayuwa ghamweya no tughonda no kwimba mafeste no myaka. 11Ame ne na yapa kuyirughana yange yoyikukutu. Kukwenu ngwa nyara‐nyara ya kurire.
12Na mu kanderera thikuma, mwayendhange. Eshi, mu kare thika di na kununga karo nenu me. Amwe mbadi mwa ni pethire nokamanana temba. 13Mwa dimuka eshi ngepi di ya hokokire eshi, na ni yuvithe pamutango mbudhi dhodhiwa kukwenu. Yoyi na korwire. 14No ngambi ngepi di wa karire mupindu wange kukwenu mumayerekero eshi, mu ni shwahure endi mu ni nyathe. Mbadi mwa yi tendire. Ene mwe mwa ni tamburire yira nomuengeli waNyambi. Shemwa yira yame Kristus Jesusi. 15Amwe mwa wanine shemwa fiyaghudhi. Ngepi di yina kara ne? Eyi ne na kona kuyimonongwenena: Ngeshi ngo dyo ya karire, ngo mwa kudhurire meho ghenu no kughatapa kukwange. 16Ame ne nomukan̂ore dhenu nidi, yoyi na kumutongwera ghushemwa ndi?
17Ghutoghoro wawo hanu ghokukwenu, mbadi wa shemwa. Awo hana haka kumutunditha kukwange eshi, mu tware n̂ando dhawo kughutho. 18Ghutoghoro ghothinu thothiwa, ghuhunga. Ene wa kona kukara po kehe pano, ene mbadi shimengwa oku name po. 19Mwanange, ame yira pakutanga ni di karo mutjitju dhomushamurukero kukwenu, kate mbo gha wane Kristusi thishwi mumwenu. 20Ame na haka eshi ngo ni kare nenu no kughamba nenu nodiywi dimweya. Keho kudhekera na kukudhekera thikuma kukwenu.
Hagara naSara
21Amwe mwa haka kukara kwishi dhomuragho. Mu ni tongwere eshi mbadi muna kuyuva yi ghuna kughamba muragho ndi? 22Yapwa kutjanga eshi, Abrahamu gha karire nohanendi hawadi hohatutughuru. Yofotji ghopamupika no yofotji ghopamukamadi wendi ghoshemwa. 23Mwanendi ghopamupika ha mushamurukire thika di ha shamuruka wahe. Ene ghopamukamadi wendi ghoshemwa, aye ne thika maturekero ghaNyambi. 24Munu mbadi gha kona kuyitjwathana mumaghanekero vene. Hakamadi hawadi wa, ha kara maghundambo mawadi. Ghumweya kutunda kudirundu dyaSinayi, aye ne mushamuruki wawapika. Ghundambo ghu ne yoHagara. 25Hagara thighanekitho thodirundu dyaSinayi, edi dya kara muArabiya. Adyo ne thothishwi thaJerusalema ghopashadyarero. Yoyishi Jerusalema nohanendi ne hapika. 26Ene Jerusalema ghomudiwiru, aye ne horo, no aye ne yonyokwetu. 27Yapwa kutjanga eshi:
“Shamberere
we mbumi ghushiwana hana.
Humwerere kuyishamberera,
owe wa dhira kukona kukara nyina,
yoyishi mukamadi ghokupira hana yu gha thigha murume,
mbo ghana wana hana hohengi
kupiterera mukarwereko yu ghadi na murume.”
28Namwe, mwayendhange, namwe pofotji yira Isaka yu gha kara maturekero ghawana Nyambi. 29Thika di ya karire munako dhi ha shamurukire katughurughana yira hamweya, kumukutha‐kutha katughurughana yu gheya paMupepo. No pashadyarero shime kemo. 30Ene ngepi yina kughamba Yitjanga? Ayo kughamba yina kughamba eshi: “Tjidhe mupika‐kadhi namwanendi. Yoyishi mwana mupika mbadi gha kona kuyora pofotji namwana mukamadi ghoshemwa.” 31Yodigho, atwe ne kadi twana mupika. Mwayendhange, atwe ne twana wamukahoro.
Currently Selected:
Hakagalasiye 4: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
