Hakagalasiye 3
3
Muragho endi matawero
1Amwe Mwagalasiye, mwa thuta ndi? Yidye yu gha tenda maghano ghenu thivunganyi? Jesus Kristusi gha mu yuvithire thiwana eshi, gha namba shemwa kuthikurushe. 2Ene na haka kudimuka thinu thofotji kukwenu: Mwa tambura Mupepo ghoKupongoka, pakukoneka muragho endi pakutawa mbudhi dhodhiwa? 3Apo mudi mwe ne mwayero ndi? Amwe mwa tangire noMupepo, muna haka n̂anyi‐n̂anyi kuhuritha mangcamu ghenu mwathinda ndi? 4Maghukukutu ghenu ne panyara‐nyara gha karire ndi? Agho mbadi gha karire panyara‐nyara! 5Oyu gha mupa Mupepo ghoKupongoka, noyu ghana kurughana nongcamu mukatji kenu. Eyi gha yitendara yi ne, yoyishi mwe ne mwa koneka muragho ndi, endi yoyishi mwe ne mwa tawa mbudhi dhodhiwa? 6Dyo ya karire roruhe naAbrahamu eshi: “Aye gha tawire mwaNyambi, naNyambi gha yi mu toyedhererire kughuhunga.”
7Yo muna kumonena eshi, awa hokutawa ne hanahoka waAbrahamu. 8Yitjanga ya dimukitha kughutho eshi, Nyambi gha wanithire karo hanu wa ha dhira kukara Hajuda ghuhunga pamatawero. Yo ya retera yitjanga pakutanga mbudhi dhodhiwa kwaAbrahamu eshi: “Marudhi ghomahe mbo ghana pu kukandadheka mumoye.” 9Yodigho eshi, awa ha tawa mbana pu kukandadheka pofotji naAbrahamu ghomutawi.
10Ene wahe wa ha tanarera pakukoneka muragho, mbana ghu mun̂utwa. Yoyi yapwa kutjanga eshi: “Mukan̂utwa, kehe yu ghokudhira kukumitha mo thiwana yoyihe yi ha tjanga mumbapira dhomuragho.” 11No eshi mbadiko yu ghokukona kuwana ghuhunga kughutho waNyambi pamurandu ghomuragho. “Eyi ne ya rogha, yoyishi oyu ghokuwana ghuhunga pamatawero, mbo ghana para.”
12Kumuragho, mbadi ya kara yira kumatawero. Yoyishi yitenda yemana eshi: “Oyu ghokutenda yi ghuna kughamba muragho, mbo ghuna mu paritha.” 13Kristusi gha tu komononine kun̂utwa dhi dha reta muragho, apa gha karire mukan̂utwa mudyango dyetu. Yoyi yapwa kutjanga eshi: “Mukan̂utwa kehe yu ha kureka kuthitondo.” 14Po mba kona karo kuwana wa ha dhira kukara Hajuda nawo ghutungi, kumakandadhekero gha gha tohedhererire Nyambi kwaAbrahamu. Kemo twa wana pamatawero Mupepo yu gha tu turekerire Nyambi.
Muragho nomaturekero
15Mwayendhange, ame kuna kutumbura thitamenedhi thomuyipara yetu yon̂anyi‐n̂anyi. Ngeshi ghundambo hana nungu hanu pofotji, pakutanga pathinamuragho. Noyofotji temba gha kona kutunditha po ngambi kuwedherpera ko yinu yimweya. 16Nyambi gha tapire maturekero ghendi kwaAbrahamu no kwamwanahoka wendi. Eyi, mbadi yina kuninga eshi: “Kwawanahoka.” Ene kadi hengi, no kwamwanahoka ghoye karo. Keho kwayofotji, oyu mwanahoka ne yoKristusi.
17Eyi na himi kuyighambera yino ne: Nyambi gha nungire ghundambo naAbrahamu no mbadi gha ghu tundithire po. Muragho ghu weyire munyima dhomyaka mathere mane nomakumi mahatu, mbadi wa kukona kushutura po. Eshi gha dhongonoke maturekero ghaNyambi ghokwaAbrahamu. 18Ngeshi munu ha wana yiyora yendi pamurandu ghomuragho, mbadi ghana kuwana karo maturekero. NaNyambi gha tapire n̂eke kwaAbrahamu, pamaturekero. 19Thitambo munye ne wa rughana muragho? Eyi ne ya munyima ha wedhererire ko, pamurandu ghomaharwero. No ethi ne thothitambo thonako eshi, kate mbo gheye Mwanahoka yu gha tamba maturekero gha. Haengeli ha tapire muragho mukatji kodiko. 20Ene ngeshi poghadi yofotji yu ghana kurughana, shemwa, mukatji, ngo mbadi ha mu nyanda. No Nyambi ne yofotji keho.
Hapika nawarunyana
21Eyi, kuninga yina kuninga eshi, muragho ne ghuna kurimbi nomatawero ghaNyambi ndi? Mbadi kemo! Ngeshi ngo wa karire po muragho ghu wa konine kutapa moyo ghoshemwa, munu ngo gha kona shemwa kuwana ghuhunga pakukoneka muragho. 22Ene thika di ya ghamba Yitjanga kaye kokahe karametera kumaharwero. Maturekero ha gha rikanyitha kwawatawi pithawo pamurandu ghomatawero ghawo mwaJesus Kristusi.
23Kughutho ghokwiya matawero gha, muragho wa tu kwatire. No wa tu kungire kate kunako dhi gheyire matawero. 24Yodigho, atwe wa takamithire muragho kate gheyire Kristusi, tu wane ghuhunga pamatawero. 25Ene apa nga dhiya nako dhomatawero, mbadi tudi shime kwishi dhongcamu dhomuragho. 26Pamatawero ghomwaKristus Jesusi, mwa kara n̂anyi‐n̂anyi mwahe mwanaNyambi. 27Yoyishi, amwe mwahe mwa kupakerera padiyoghero naKristusi. 28Yapira murandu yi, endi we ne ghoMujuda endi ghoMuhirika, ghomupika endi ghomukahoro, ghomurume endi ghomukamadi: mwaKristusi ne, mwahe mwayofotji. 29Ene ngeshi mwakaKristusi, namwe karo mwanahoka waAbrahama no hayori thika maturekero ghaNyambi.
Currently Selected:
Hakagalasiye 3: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
