Hakakolose 1
1
MbapiraKwawakakolose
1Edhi dha tunda kwaPaghulusi, mupostoli waKristus Jesusi pamahimeno ghaNyambi, namuyendhendi Timoteghusi.
2Kwawahe hoMukolose, awa ha kundama kwaNyambi. Hayendhange homakurupero mwaKristusi.
N̂eke nothiraro thaNyambi Wihetu yi kare nenu!
Atwe tuna kumutumera Nyambi papenu
3Apa tuna raperanga kwaNyambi ghoWiha Hekudyetu Jesus Kristusi, tuna mu tumeranga kehe pano Ye mudina dyenu. 4Yoyishi atwe ne twa yuva matawero ghenu ghomwaKristus Jesusi, noruhakitho rwenu rokwawatawi wahe. 5Matawero ghano, noruhakitho yakara pamakurupero agha ha mu turekera mwe, mudiwiru no gha mwa yuvire apa ha mu yuvithire ghushemwa eshi, mbudhi dhodhiwa. 6Mbudhi dhodhiwa dha thikera mumwenu. No thika di dhina kureta mbuyo no kutapathana dhina kutapathana mukaye kokahe, dyo yakara karo kukwenu kutunda mudiyuwa di mwa yuvire thin̂eke thaNyambi, ho mwa dimukire thika di tha kara mughushemwa watho. 7Amwe ne mwa yikuhongera kwaEpafrasi. Murughani netu ghomuhakwa nomukareri ghokukurupera waKristusi yu mwa rura muyoyihe. 8Aye yo gha tutongwerire ruhakitho rwenu ru gha mupire Mupepo.
Atwe tuna kumuraperera
9Yodigho, kutunda mudiyuwa dyodyarero di twa mu yuvire, mbadi twa thigha kumuraperera. Atwe kukumbera tuna kukumbera eshi mu yare noghunya‐nyami ghoghuhe nomaghano gha ghana kutapa Mupepo. Eshi kemo sho mu kone kuwana yidimuka yokuyara yomahimeno ghendi. 10Atwe tuna kumuraperera eshi, mbo mu kone kupara kudifumanekero dyaFumu, pakutenda vene thinu thi ghana himi. Mu kare ghuyeghave mu kehe thirughana thothiwa no mu kure muyidimuka yaNyambi. 11Nyambi gha mupe ngcamu dhodhihe nodifumanekero dyendi. Gha mu tanarithe no gha tape kukwenu ngcamu dhodhihe eshi, mu kone kukara ghudhughutjima, mumaghukukutu ghomahe. 12Mu tumere noghushamberera kwaWiha yu gha mu roghithera eshi, namwe mbo mu wane yiyora yi ha taterera hatawi muthishe. 13Aye gha tu shutura kumangcamu ghomakokore no gha tu rundwerera mughufumu waMwanendi ghomuhakwa. 14PaMwanendi twa wana twe makomweneno, mathigherero ghomaharwero.
Thirughana thaMwana
15Mwana ne thishwi thaNyambi,
thaNyambi ghokudhira kumona.
Mwana ne yomutango,
ho gha piterera yivareka yoyihe.
16Papendi gha varekire Nyambi yoyihe
yomudiwiru no yopamuve:
yoyihe yokumona
no yoyihe yokudhira kumona,
nomapuna ghawaengeli nawaraghuri,
nawakamakuto nomangcamu ghomahe.
Yoyiheya yapwire kuvareka Papendi no Kukwendi.
17Kughutho ghoyoyihe, Aye ku poghadi,
no Papendi ya tanarera yoyihe.
18Aye ne yomutwi ghoyipo yongirishe.
Aye yomatunderero ghoyinu yi,
Aye ne yomutango,
Yofotji yu gha vumbukire mwawafu,
kemo dyo gha tanga kutumbura dyango dyodihe.
19Nyambi gha ningire
eshi ghu kare ghuyara ghoghuhe Mumwendi
20no mo sho gha kare makushemwethaneno nendi.
Pamanyinga ghaMwanendi ghopathikurushe,
po gha pakerire thiraro,
Papendi gha kushemwithanithire yoyihe yopamuve
no yomudiwiru.
Nyambi gha kushemwethanine thinda karo nenu
21Namwe karo pakutanga, mwa karire kayenda naNyambi no mwa mu nyathire, muyipara yenu yoyimango. 22Ene pano, Naye thinda ghana kushemwithanitha nenu. Pakuninga eshi, Mwanendi ghafire thika munu mukumupongokitha. Mu pire ghuyi kughutho Wendi nokamyandhu‐myandhu temba. 23Ene mu kare ghutanara mumatawero no mwa tamangera mumakurupero ghombudhi edhi mwa yuvire, noyu ha yuvithire kwawanu wahe hokwishi dhodiwiru omu na karera me Paghulusi mupika.
Thirughana thaPaghulusi thothikuru thokungirishe
24Ame na shamberera kuyinyanda yange eyi na mu nyandera. Yoyishi, makuthakuthero ghaKristusi ne mbadi ghana huru. Name shime ha ni nyanda pamurandu ghokuyerana kungirishe dhokuyirama yendi, 25omu na kara me mukareri pathirughana ethi gha nipa Nyambi eshi ni yuvithe kukwenu n̂ando dhendi ghurikanya. 26Ethi ne thothithithatero thopatukuru ethi thondire rure ene pan̂anyi‐n̂anyi, thina hokoka kwawa ha mu kundama. 27Nyambi gha himine eshi gha mu dimukithe, edi wa kara ghukuru ghothin̂eke thendi no fuma dhothithithatero kumarudhi. Thithithatero thi ne yoKristusi, oyu ghadi nenu. Aye ne yomakurupero ghenu mughufumu. 28Oyu twa yuvitha hanu wahe noghunya‐nyami ghoghuhe no kuwadimukitha yoyihe eshi, tu kone kurikanyitha hanu wahe mwaKristusi. 29Ho na kwiman̂anya nongcamu dhange dhodhihe edhi gha nipa, edhi dhina kurughana mumwange thikuma.
Currently Selected:
Hakakolose 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
