2 Petrusi 1
1
Mbapira dhaPetrusi Dhoghuwadi
1Mbapira dhino, kwaSimon Petrusi dhina kutunda. Aye ne mukareri no mupostoli waJesus Kristusi. Kwawa ha wanena ghuhunga waNyambi wetu naMushuturi wetu Jesus Kristusi, matawero ghokuyara yira ghetu.
2N̂eke no thiraro, ngo yivure mumwenu, pakudimuka mwe Nyambi naJesusi ghoHekudyetu!
Mathero no matorwero ghamukriste
3Ngcamu dhoghunyambi wendi, dho dha tupa yoyihe eyi twa nyanda muyiparitha yetu no mukumukarera. Eyi ne yeya kukwetu, yoyi twa mu dimuka twe twapwa kwitha kuthishe thendi no pangcamu dhendi. 4Pakutenda yinu yi, po twa wanena yitapa yoyiwa no yokupiterera, eyi gha tu toyedhera. Payinu yi, po mbo mu parera kumaghuyi agha gha kara mu kaye, no mbo mu yerane namwe kuyikara yothinaghunyambi. 5Yodigho yashemwa mwa kona kukon̂omeka muyoyihe eshi, mu vurithe matawero ghenu no yinu yoyiwa noghuyidimuka. 6Ghudimuka ne nomakurawero, makurawero ne nomatjimapero, matjimapero ne nowoma ghokwaNyambi, 7woma ghokwaNyambi ne roruhakitho ropofotji, ruhakitho ropofotji, roruhakitho rokwawanu wahe.
8Ngeshi ha mu kara nayo yinu yi no kuyirundurura kughutho, mbo muna kara noghutoghoro, nombuyo dhokudimuka thiwana Hekudyetu Jesus Kristusi. 9Munu yu gha pira yinu yi ne muthuta thikuma, aye mukunga no gha vurama eshi, maharwero ghendi ghopakare ne ghapwa kukushura.
10Yodigho mwayendhange, mwa kona kutoghoropa thikuma kuyinu yi, mukuneghedha yipara yenu eshi, Nyambi ne yo gha mwitha no yo gha mu tororire. Ngeshi ha mu tendi yino, mbadi mbo mu pundadhoka nokamanana temba. 11Munyima po mbo ha mu pa matawedhero ghomukeya, mudiyuwa dyodikuru kumengeneno ghororuheya ghoghufumu waHekudyetu no Mukomononi wetu Jesus Kristusi.
12Pathinu thi po mbo ni mu vurukitha roruhe kuyinu yino, ngambi kenge di mwa tanarire mughushemwa oghu ha mu dimukitha. 13Ame ne na kara nofuma roruhe muthirughana thange. Pakumutjokedha mukumuvurukitha yinu yi, oku shime nomuyumi. 14Na dimuka eshi yifa yange ne kadi kayenda yidi. Hekudyetu Jesus Kristusi, naye gha yi ni dimukitha thiwana. 15Yo na kutoghoropera name eshi, munyima dhokufa kwange, namwe mbo mu vuruke roruheya yinu yino.
Ghufumu waKristusi no mbudhi dhawaporofeta
16Apa twa mu dimukithire ngcamu dhaHekudyetu Jesus Kristusi no mwiyero wendi, mbadi twa yi mu tongwerire muyifika‐fika, mgambi muyithimwetwedha yombango. Mbadi kemo, twathinda twa mumonine nomeho ghetu mughufumu wendi ghoghuhe. 17Aye gha wanine dikuto no ghufumu kwaNyambi Wihe, apa gha ghambire Fumu ghoMukakupiterera eshi: “Oyu ne Mwanange ghomuhakwa, Oyu na menya‐menyena.” 18Diywi di ne mudiwiru dya tundire, twathinda twa di yuvire apa twa karire pofotji Nendi padirundu dyokupongoka. 19Adyo ne dya tu tanarithire thikuma kumbudhi dhawapumbi, edhi dha karire yira munyenge ghokutumbuka mumakokore. Amwe, mbo muna tendi thiwana ngeshi mbo mu kare muthishe thendi, kate pa mbo di mu vera diyuwa no notaghomurughura mumitjima dhenu.
20Kupiterera yoyiheya yi, mwa kona kudimuka eshi mbadi mo ghupumbi muYitjanga, ghokukona kutjwathanitha ghothinda ghuhunga wagho. 21Yoyishi, mbadiko ghupumbi ghokuhokoka muyihima yamunu. Kadi kemo, shimengwa pamayendithitho ghaMupepo ghoKupongoka, po ha yawera hanu n̂ando dhi dha tunda kwaNyambi.
Currently Selected:
2 Petrusi 1: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
