2 Hakorinte 8
8
Makutjakero ghokunyanda koghukriste
1Mwandenge, tuna himi eshi mu dimuke namwe yon̂eke dhi ha tamburire kwaNyambi hambunga dhaMasedoniya. 2Ngambi kenge ha wanine kunyanda kokukuru parupetho rwawo, yishamberera yawo ne, ya vurire thikuma. Endi ngambi kenge ha karire hahepwe thikuma, awo ne ha tungi pakukutapa kwawo. 3Ghushemwa na kumutongwera me, awo ne nongcamu ha kara, ngcamu dhokupiterera dhi ha rughanitha. 4Muyihima yawo, ha tu pambekire eshi, tu rughane nawo pofotji thirughana thoruhakitho kwawakakutawa hoMujudeya. 5Ayo ne ya vurire kupiterera yi twa ghayarire twe. Yoyishi ha kutapire hathinda pakutanga kwaFumu, munyima ne kukwetu. Yino ne yo gha haka Nyambi.
6Yo twepwerire Titusi eshi gha tende thitenda thino thoruhakitho, ethi gha tangererire kutenda kukwenu. No karo thikumenene mo pashadyarero. 7Thika di mwa kara kamwagha‐mwaghe muyoyihe; matawero, thitapa thokukona kurughanitha n̂ando dhenu. Yidimuka, ghutoghoro ghoghukuru no ruhakitho rwetu rokukwenu ne, mu vurithe karo thirughana thenu thoruhakitho.
8Mbadi na kutapa marawero kukwenu. Ene kuna kumeneghedha ghutoghoro wawamweya. Eshi tu yereke ghushemwa ghoruhakitho rwenu. 9Amwe ne mwa dimuka thin̂eke thaHekudyetu Jesus Kristusi, ngambi kenge di gha karire mutungi, pamurandu wenu. Mu kone namwe paghuhepwe wendi kukara mwatungi.
10Pano ne kuna kumupa dighano dyokumughamwena. Mwaka ghuya nga ghupu, kadi pithenu mwa tendire thinu thokutanga. Ene yamwe mwa himine karo pakutanga eshi mu tende thinu. 11Mu manithe karo popano yirughana yenu. Ghutoghoro ghokushwagha muyinu yenu yi ya kara po, ghu kure thika mahimeno gha mwa tangithire. 12Ngeshi mahimeno ghomahunga ha gha kara po, no mbadiko yu ghana kutapa thika di gha wana, Nyambi ghana kutumbura thitapa thi. Mbadi ghana kutaterera Ye, thi gha dhira kuwana ghumweya.
13Mbadi na kuninga eshi, mu kare mughuhepwe pamurandu ghokughamwena hamweya. Ene mbo yirikanye yoyiheya. 14Amwe mudi nayo, mwa kona kughamwena wa hana kunyanda. Ndani ngeshi ku hana wana wo, amwe ne mukunyanda, ha kona kumughamwena nawo karo. Po sho yirikanyenene. 15Yapwa kutjanga karo eshi:
“Oyu gha kara noyoyingi,
mbadi gha karine nayo pakutanga,
no ghotupu ne, kadi tumanana.”
Matumeno ghaTitusi
16Matumero kwaNyambi oyu gha tapire ghutoghoro kwaTitusi, gha mu ghamwene yira yatwe.
17Mbadi yatwe twa mu tamburire pakumutambura. Ene mughutoghoro wendi ghoghukuru. 18Pofotji nendi, tuna kutuma karo muyendhendi oyu ha kugha mumambunga ghomahe, mukurundurura mbudhi dhodhiwa. 19Ne mbadi pithayo, yino keho, mbunga dha mu tororire gha rughane netu thirughana thoruhakitho ethi tudi natho. Eyi, kudikuto dyaFumu tuna kuyitendera no thineghedhitho thomaghamweno ghetu. 20Pamuhingo ghuno, tuna kushinga yomuhe yu ghana kutughayarera eshi, ngwa twa horeka didhimawe dyomasherenyi. 21Twapwa kupaka po mukuthirughana ghuhunga. Ene kadi kughutho waFumu keho, no kwawanu karo.
22Pofotji nawo, tuna kutuma karo muyendhetu ghumweya. Rwingi twa mu yerekire pamihingo dhodhingi, ene twa monine ghutoghoro wendi ghomaghamweno. No pashadyarero, shime gha toghoropera. Yoyishi gha mu kurupera thikuma mwe. 23Pan̂anyi‐n̂anyi Titusi ne natanyi wange, oyu na kurughana nendi muyirura yenu yoyihe. Awa hayendhetu ne hayitumi yomambunga kudifumanekero dyaKristusi. 24Mu neghedhe ruhakitho rwenu kukwawo, mambunga ghomahe gha kone kumona no kudimuka eshi, atwe ne kukwenu tuna kurupera thikuma.
Currently Selected:
2 Hakorinte 8: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
