2 Hakorinte 7
7
1Mwahakwa, maturekero ghano, natwe ghetu karo. Yodigho mu tu thighe tu kushuke kuyoyihe, eyi ya haruritha thirama no mudhimu. Ho tu kare roruhe ghutawedhi kwaNyambi, no tu kutape kukwendi.
Yishamberera yaPaghulusi yokumwiyero waTitusi no yokumbudhi dhodhiwa
2Mu yandhurure mitjima dhenu kukwetu. Yoyishi, mbadiko yu twa tenda thinu thothiyi. Mbadiko yu twa shinyine, no mbadiko yu twa kungurire thinu. 3Eyi mbadi na kuyighambera kukumurundera, ene na manine kuyimutongwera pashakare eshi, mumitjima dhetu mu pare no mu fe netu. 4Ame na kumushwaghithera thiwana vene, name na kurupera thikuma papenu. No muyikudhekera yetu yoyihe, ne ya yara noghudhughutjima no yishamberera.
5Apa twa kumine muMasedoniya, mbadi twa wanine maturumuthero no dikuto temba. Kumitara dhodhihe twa wanine rupetho: Peghuru kadi wa kughamba, mwimi ne yikudhekera. 6Ene Nyambi mukakwimeka hakakuguva, yo ghana twimeka karo pamwiyero waTitusi. 7No kadi pamwiyero wendi keho, yoyi mwamwimekire namwe. Aye gha thimwetwedhire yodirura dyenu dyokutumona twe, no ngepi di mwa tu fererire n̂eke kuyoyihe yi ya hokokire, gho mwa toghoropire kunighamwena. Yoyiheya yi ne ya ni shambererithire thikuma.
8Ngambi kenge na mu tokotithire nomambapira ghange, mbadi na kuyinyatha. Ngwa na tokotire pakumona mbapira dhi dha mu tokotithire, ngambi kenge mwa tokotire kamanana. 9Pano nidi ne na shamberera thikuma. Kadi yoyi na mu tokotithire, na mu tokotithire eshi mu piruke. Mwa tokotire kehe pano thika di gha yihimine Nyambi. Atwe ne mbadi twa mu pethire nokamanana temba. 10Yoyishi yitokota, kumahimeno ghaNyambi ne mapirukero ghokumaghamweno. Kuyinu yino, mbadiko yu gha yi kudhekerire. No karo ya reta yitokota, yiyudhaghura yomukaye no yifa. 11Mu mone kuyiwana yomuyitokota thika di gha yi himine Nyambi kukwenu. Pan̂anyi‐n̂anyi keho, poyidi kukwenu karo yingi ne. Ya kara po ghutakamithi, dishamu, dikuto, ghutoghoro no mahumbithero ghoghuyi. Muyoyiheya yi, mwa neghedha eshi amwe ne mwa pira murandu. 12Yo na yi mu tjangerire kemo. Mbadi ya karire eshi, ghumweya ghopapenu ne ghuyi gha tendire, ngambi gha nyandire paghuyi. Ngambi kemo, ame na haka eshi mu dimuke kughutho waNyambi yoyihe yi mwa tu tendera. 13Shemwa, yo tuna kushamberera thikuma pano tudi.
Atwe ne mbadi tudi mumatjokedhero keho, yishamberera yoyikuru ne no kwaTitusi karo oyu ghadi mundjewa‐ndjewa. Wingi wenu mwaheya mwa mu hengaghurire. 14Ame na mu kughire kamanana mumwenu, ene mbadi mwa ni tokotithire. Thika di twa ghambire nenu roruhe mughushemwa, dyo ghudi ghushemwa pan̂anyi‐n̂anyi karo mwaTitusi yu twa kughire kukwenu. 15No ghunongo wendi ghokukwenu, kuvura ghuna kuvura thikuma. Pakughaya ye kukwenu mwahe mwe mwa karire noghutawedhi, no ngepi di mwa fumanekire no kumukutekera pakumutambura. 16Na shamberera thikuma eshi, na kona kumuthigherera mu kehe thinu.
Currently Selected:
2 Hakorinte 7: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
