2 Hakorinte 6
6
1Yira twakakurughana pofotji mwaNyambi, tuna kumutongwera mudimuke eshi, thin̂eke thaNyambi mbadi mwa thiwana nyara‐nyara. 2Aye ngeno ghana kughamba:
“Munako dhodhihunga na kuyuvire,
no mudiyuwa dyomaghamweno,
na kughamwenine.”
Mone, nako dhino ne dhadhihunga. Apa no ne dyodiyuwa dyomaghamweno.
3Atwe ne mbadi tuna haka kuwana ghuyi muyirughana yetu. Yo tuna kudhirera kutapa karo kwakehe yu, mayedhawero ghokutuyakunutha kukwenu. 4Ene muyoyihe tu dimuke eshi twakareri waNyambi. Yoyiheya yi mughudhughutjima tuna kuyitendera, no murupetho no muwoma no mukunyanda. 5Twa pwire kupumura no kutuvukumena mudorongo, no muyimbirimbimba, muyirughana yoyikukutu, mumithiku yinhwararo no twa fire ndhara. 6Kadi mumakoghawero twa yitjinaghanine, mughudimuka, mughukon̂otwedhi no mughuhungami. Yoyiheya yi twa yitenda paMupepo ghoKupongoka, paruhakitho roshemwa, 7pan̂ando dhoghushemwa no pangcamu dhaNyambi. Ghuhunga ne, thothitwa thetu thokumatumbandukero no thokukughamwenitha.
8Twa tambura dikuto no dishamu,
twapwa kumangopitha no kutukugha.
Kuna kututenda yira hapemukithi,
ene ngambi kemo, yatwe twamakurupero,
9ngeshi ngo twa ndambo,
ngo twapwa kudimuka thiwana,
ngeshi ngo twafu,
thika di muna kutumona ne twayumi,
ngeshi ha tu humbitha,
ene mbadi ha tu pagha,
10ngeshi twa tokotire,
roruhe twa karire noyishamberera,
ngeshi ngo twahepwe,
hengi ne tuna kutungitha,
ngeshi ngo twashivana thinu,
yatwe twatungi kuyoyiheya ne.
11Twa mu tongwerire yoyiheya, amwe Mwakakorinte. Mitjima dhetu ne twa mu yandhwerera. 12No mbadi twa mu dhindire. Amwe ne yamwe mwa tu dhindire. 13Nenu na kughamba yira hanange. Mu tu tendere natwe eyi twa mu tenderire: Mu yandhurure namwe mitjima dhenu.
Mashingero ghokuyikara yoghuhayidena
14Mwa koka djoko dhofotji nawakakudhira kutawa. Ngepi di sho gha kare makupakerero pakatji koghuhunga no ghuyi? Ngepi sho ghu kare ghundambo pakatji kothishe nomakokore? 15Ngepi di sho gha kare makuyuvero naKristusi namukamandungwa‐ndungwa? (Baliyati) Ngepi di sho di kare dirura dyamukakutawa, pofotji namukakudhira kutawa? 16Panye ne keho sho gha karere makupakerero ghotembeli waNyambi, no wanyambi ghombango? Atwe ne twa kara roruhe tembeli waNyambi ghomuyumi. Eyi ne thika di ghaningire Nyambi eshi:
“Mbo na tungu mukatji kawo no kuyendaghura momo,
no mbo na kara noNyambi wawo
awo ne mbana kara hakadiko dyange.”
17Yodigho: “Mu tunde kukwawo
no kukwenu temba,”
dyo ghana kughamba Fumu,
“no mwa kundama kuthinu thokudhira kukushuka.”
“Ndani po mbo ni mu tumbura,
18no mbo na kara no Wihenu,
namwe mbo muna kara hanange hohatutughuru,
nawambuyamaghana,”
dyo ghana kughamba Fumu,
ghoMukangcamu dhodhihe.
Currently Selected:
2 Hakorinte 6: MHW1986
Highlight
Copy
Compare
Share
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
